Faamatalaga

Ou te faafetai lava mo le Liahona, o Mati 2007, lea o loo talanoa mai ai e uiga i auala e sauniuni ai e fai se misiona talai. Na ala mai i lana savali na faapea ona ou faia ai se filifiliga mautu e fai se misiona. O nai masina mulimuli ane, na maua ai lo’u valaauga. O tusiga i le Liahona na fesoasoani ou te iloa ai o le taimi lenei ua valaauina ai au e le Alii e fesoasoani ia te Ia i Lana galuega. O le Liahona e taialaina i tatou e fai ia filifiliga sa’o.

Sister Juvy Sevilla, Filipaina

E ese le pele o le Liahona ia te a’u; Ou te le iloa pe faapefea ona ou ola e aunoa ma le Liahona. O le mea moni, e taua tele lana saofaga i lou liliu mai i le 21 tausaga ua mavae. O le taimi lena, o le ala na faailoa mai ai i tusiga ia aiga ia te au na matuai ou faagaeetia ai lava: o aiga e tatalo faatasi, o aiga e o faatasi i le lotu, o aiga na faailoa atu lo latou alolofa. O na mea uma na ootia ai lou loto ma fesoasoani ou te malamalama ai i le talalelei. Faafetai ia te outou uma mo le galuega matagofie o loo outou faia.

Beatrice Sunke, Suitiselani

E i ai sa’u uo na faaipoipo talu ai nei, ma sa ou tuuina atu ia te ia se mekasini o le Liahona o loo talanoa mai ai e uiga i le faaipoipoga ma le tiute paia ia alofa le tasi i le isi ma tausi e le tasi le isi. E ui lava ina o la’u uo e le o se tagata o le ekalesia, ae sa la faitauina ma lona toalua le mekasini, ma na faafetai mai lava o ia aua ua fesoasoani e faamalosia ai lana faaipoipoga. O le Liahona e aumai ai faamanuiaga i tagata o le ekalesia faapea foi ma tagata e le auai i le ekalesia.

Beatriz de Guaigua, Venesuela

E fia faailoa atu lava lou loto faafetai i le Tama Faalelagi faapea ma faatonu mo le tuuina mai o le Liahona mo i tatou e maua ai Lana savali i lenei itu o le lalolagi. O le Liahona ua ou maua ai lo’u lototele ou te tu atu ma le le fefe i taimi uma, e oo lava i le lotolotoi o a’u uo, ma taumafai e aveese ia manatu le lelei o loo ia i latou e uiga i le Ekalesia. Faamolemole ia faaauau pea le galuega lelei. Ou te iloa o le a salalau atu le talalelei i lenei itu o le lalolagi.

Asuquo Dominic Ekpenyong, Nigeria

O au o se tagata fou o le Ekalesia, ma e tele ni mea e uiga i le talalelei ua ou iloaina mai le Liahona. E ese le fiafia o tamaiti matou te potu faatasi i le Liahona. Latou te faatalitali i ai i masina uma lava, e ui lava ina latou auai i se isi tapuaiga. Na fai mai se tasi o a’u uo o le mekasini aupito sili lea ona manaia ua ia vaaia i lona olaga. Sa matou fiafia uma lava i le siata faaletupe (tagai i le “Pepa o Galuega o le Paketi” i le faaopoopoga Ia Saunia Mea Tatau Uma, Sete. 2007), ma sa tautino tagata uma e mulimuli i ai, sei vagana ai le totogiina o le sefuluai, o loo fuafua au uo e fai ni teugatupe.

Raja Salamon, Initia

A o ou faitau i le lomiga o Me 2007 o le Liahona, sa matuai ou ootia lava i le saunoaga a Elder Jay E. Jensen, “O Le Mana e Faafailele Ai i Viiga.” E i ai foi sa’u molimau malosi e uiga i le mana o viiga. O Fepuari 2000, a o ou faalogologo i se alaleo o le leitio i le lotoifale, sa ou faalogoina ai se pese ou te lei faalogo muamua i ai. Sa le gata ina ou fiafia i le see malu o le musika, ae na ou fiafia foi i le usuina e le vaega na pepese ma le savali na aumai e le pese. Na ou iloaina mulimuli ane o lenei pese na usuina e se vaega na taua o le Au Paia o Aso e Gata Ai. Na ou manao ia ou maua ia upu uma o lenei pese. O lea na ou filifili ai e tatau lava ona ou asiasi atu i lenei lotu. O le Aso Sa muamua lava na ou auai atu ai, o la’u galuega muamua lava o le aumai o se tusipese. A lele—o le viiga numera 17, “O Mai, Outou o le Au Paia.” Na ou papatiso i ni nai masina mulimuli ane.

Richard S. Scotland, Liberia