Faatumauina o le Olaola o le Suesueina o Tusitusiga Paia

Ua tele taimi ua ou faitauina ai le Tusi a Mamona, ma vaavaai i ni autu ma ni aoaoga eseese i ia taimi taitasi. O le taimi lenei, sa ou filifili ai e faia ma se manatu sa ou fia iloa atili e uiga i perofeta o le Tusi a Mamona. Ina ua ou amata i le 1 Nifae, sa ou tusia ni faamatalaga e uiga ia Liae i ni vaega se ono: aoaoga, uiga faaletagata, mafutaga ma le aiga, mafutaga ma le Atua, mafutaga a le Atua ma ia, ma auala na ia maua ai faaaliga. Ona ou suesue foi lea i ia lava mea i isi perofeta e sosoo ai o Nifae ma Iakopo. O loo ou taumafai e sue ia uiga tutusa o tamalii e valaauina e le Alii o ni perofeta ma ia iloa ia aoaoga autu a perofeta taitasi.

Ou te fesili a o ou faitau. O au fesili e faia i ni vaega se lua. Muamua, ou te taumafai ia ou malamalama i le mau ma vaai pe o le a sona faatatauga i lou olaga. E fai au fesili e pei o le: O le a se mea o lo’u olaga e pei o le tulaga lenei? O le a le mataupu faavae o loo aoaoina? Aisea na faaaofia ai lenei mea e le tusitala? E faapefea ona ou faaaogaina i lou olaga i le taimi lenei? Lona lua, ou te fesili e uiga i mea o loo ou tauivi ai i lou olaga: o tulaga po o faafitauli o loo ou sailia se tali. O nei tulaga o soo se mea lava mai le taulimaina o se tulaga faaleaiga e oo i le faia o se suiga i galuega. A o ou faia nei fesili, ou te iloa mulimuli ane, na ou faaaluina le taimi atoa o la’u faitauga tusitusiga paia i na o ni nai fuaiupu, a o ou taumafai e faalogo i le Agaga ma saili po o le a le mea o loo taumafai le Alii e aoao mai ia te au. Ua ou iloa e oo mai tali pe a ou faitau ma ou mafaufau i fesili.

Soo se taimi lava ou te faaaogaina ai tusitusiga faavae, ou te faia faatasi ma se faamoemoega. Ou te taumafai ia ou maua le naunau e suesue mo se mea o le a manaia ma aoga ia te au faapea ma isi. Ou te sailia se nofoaga e leai se pisa ma ni talanoaga. Ou te aloese mai mea e fai ma faalavelave ma lafoai ni mafaufauga e le faatatau i tusitusiga paia. Ina ia faia lenei mea, ou te vaai faalemafaufau i se tulaga faaletino o nofoaga na tutupu ai mea ou te aoaoina ma ou ola ai e pei a’u o se tagata matamata. E faapena ona o’u uai atu o lea e matuai aveese ai lava lou mafaufau mai le lalolagi o loo siomia ai a’u.

A o ou mafaufau i taimi o lo’u olaga na ou matuai suesue ai i tusitusiga paia, o taimi uma lava sa ou tusia ai se api o suesuega lea sa faapea ona ou tusia ai manatu ma fuaitau o mau sa musuia ai au. O lea sa ou aumaia ai se tamai api ma se peni ma tuu faatasi ma au tusitusiga paia. O le taimi muamua, o le tusiaina o mea na ou faitauina sa faia o se tiute; na tele se taimi ma ni taumafaiga na alu ai. O le mea moni, sa na ona ou manao e fai sina faitauga puupuu faaleagaga ona toe faaauau lea o au galuega i aso uma. Ae sa ou taumafai pea lava, ma na iu ina avea ma ni mea moni nei mau. Sa oo ina ou mafaufau, iloiloina ia fuaitau, ma faatatau i lou olaga. O fuaitau faigofie na aumaia ai ni tali i faafitauli luitauina faamatua. Na lei umi ae ou iloaina e mafai ona ou tusia ni faamatalaga, ma sa leai lava se umi i lo le nao le faitau. Na ou iloa ai foi, a o ou toe faitauina ni manatunatuga ua te’a, ou te maua ai ni tali i fesili ma atugaluga o loo i ai i le taimi nei. Na pei lava na tuuina mai e le Alii se vaaiga manino ia te au i le lua vaiaso a o lei oo i le taimi ou te manaomiaina ai.

Ana ou le maua lava le manatu o le tatalo ae lei amataina la’u faitauga ou te le matauina le tele o le alualu i luma o lou malamalama i savali na o loo i totonu o tusitusiga paia. Na ou iloaina o le tatalo faamaulalo a o lei amataina se faitauga e mafai ai ona talanoa mai le Agaga Paia i lo’u mafaufau. O se tatalo faamaoni, e tau atu ma le manatu tonu i lou Tama o i le Lagi, e mafai ai ona fesootai atu lo’u agaga i le Agaga Paia a o ou suesue ma mafaufau loloto i mau. Mulimuli ane, na ou maua i tusitusiga paia le tele o tali i fesili. O le taulai atu o au tatalo i ni fesili faapitoa, e talafeagai ma ou tulaga o i ai nei, ma le ole atu i le Tama Faalelagi e faamanuia mai i lo’u mafaufau ma lo’u malamalama, ua mafai ai ona ou maua ni vaaiga fou i vaega na ou popole ai i lo’u olaga. A o ou saili ma le faamaoni i le taitaiga a o lei amata ona ou faitau, ou te maua ai ni vaega o mau e mafai ona ou faatatauina ia te au lava (tagai 1 Nifae 19:23).

A o ou auauna atu o se faifeautalai faamisiona i le Misiona a Chile Santiago i Sisifo, na ou maua ai se vaaiga taua i le suesueina o tusitusiga paia ma le auala e mafai ona sili atu ai le aoga mo tagata sailiili ma au lava. I se tasi aso a o [ma] aoaoina se aiga lelei lava, na ou lagonaina se musumusuga manino ina ia le gata ia uunaia i latou e faitau le 3 Nifae 11 ae ia tuuina atu foi ia i latou se faamoemoega e faitau ai. Nai lo le na o le molimau atu o le a latou aoao ai e uiga i le asiasi atu o le Faaola i Amerika, na ma luiina foi i latou e vaavaai po o a mea na aoao atu e le Faaola, ae maise lava o le mea muamua na Ia aoaoina atu. Ma le isi, sa ma faaaafia ai tamaiti e ala i le faamatalaina atu o le faitauina e pei o se suega oloa; a o ma faia lea tulaga, sa ma maua lo latou taulaiga atoa mai e aunoa ma le faalavelaveina. Faatasi ai ma le fiafia o tamaiti e fesoasoani atu i o latou matua i le sailia o oa natia o upumoni o loo i totonu o le Tusi a Mamona, sa sili atu ona ma lagonaina o le a mulimuli ai lava le aiga i la latou tautinoga.

Ina ua ma toe foi atu i le aso na sosoo ai, sa le gata ina faitauina e le aiga, ma sa le gata foi ina latou iloa le aoaoga muamua a Keriso i Amerika anamua, ae sa latou iloiloina foi le tele o Ana aoaoga i le mataupu atoa. E oo lava foi i tamaiti sa fiafia lava.

Sa umi la matou taumafaiga i la matou suesuega faaleaiga o tusitusiga paia. O le tau faagauai mai o tamaiti, sa faigata, o lea na matou faataitaia ai faaleaiga le auala lenei. Sa ma feauauai ma lou toalua i le faitauina leotele o lauga o le konafesi aoao i le aiga, a ma tau atu i se mau, ma te tauina atu [e sue e le matou aiga]. A maua e le ma fanau, ona faailoga lea o le mau e tagata uma ona faitau lea e se tagata se toatasi. A o matou faia faapea, sa tau le mau le nonofo a le ma fanau i o latou nofoa, ma tusitusiga paia ma ni peni i o latou lima. A uma la, latou te faapea mai, “Oi, faamolemole, toe tasi lava se mau?” Matou te faaumaina a matou suesuega o tusitusiga paia i le usuina o se viiga. A matou sauni e usu le pese faaiu, ma te faaali atu i le ma fanau le faiga e mafai ona latou sueina ai ia mau o loo i le pito i tua o le tusipese. Latou te sueina se mau se tasi na matou faailogaina, ona matou usuina lea o se pese o loo faamamafaina ai le mataupu faavae o le talalelei na matou aoaoina. O se suesuega o tusitusiga paia na matuai aoga lava!