Viiga i se Falesa Tele

O Setema i le 2004 na matou malaga ai i Netherlands faatasi ma le fanau a lau fanau e toalua, o Jim ma Arianne, e faamanatu le 60 tausaga o le faasaolotoina o Take i le taimi o le Taua Lona Lua o le Lalolagi. Sa valaaulia i matou e le Vaega o Talafaasolopito o Take e auai atu i le faamanatuga aua o lo’u uso o Evan, o se pailate fesoasoani o se vaalele faapa pomu o le ituaiga B-24, na maliu ai a o fesoasoani i le faasaolotoina [o Take] i le 1944.

A o matou i ai iina, sa matou o atu i Hommersum, e i talaatu teisi o le tuaoi e agai i Siamani, e auai i se sauniga na faapaiaina ai se faatagata i le nofoaga na pau ai le vaalele a lo’u uso. O i maua ma Father Gerard Thuring, o se tasi na faamaopoopoina lea fuafuaga, na lauga i le taimi o le sauniga, ina ua maea, ona usuina ai lea e le tamaitai e 17-tausaga o Arianne le viiga o le tagavai a le I.S., o le “The Star-Spangled Banner,” ae o Jim, e 15 tausaga, sa fesoasoani e sisi le fu’a a le I.S.

Ina ua maea, sa ou fai atu ia Father Thuring matou te fia auai i le Misisa faapitoa o le saolotoga i le aso na sosoo ai i lana falesa i Oosterhaus. Sa ia taliaina fiafia lo matou manao ma valaaulia i matou e auai atu. Ona ou maua lea o le lototele e fautua atu ai o le a fiafia Arianne, o le sa ou faafesootaia muamua, e pese i le sauniga.

Sa ia fesili mai ma le te’i, “O le a lana pese o le a usu?”

“‘O Le Atua Lo’u Tama,’”¹ na ou fai atu ai.

Sa mafaufau mo sina taimi lenei alii lelei ma le agalelei ona faapea mai lea, “O i tatou uma lava o fanau a le Atua. Ia tatou faia faapena.”

Matou te taunuu atu mo le Misisa o le saolotoga i le taeao po o le aso na sosoo ai, ua tumu lava le falesa. Ina ua ma’ea se vaega o le polokalama, na valaaulia mai e Father Thuring ia Arianne e alu atu e usu lana pese. Ina ua uma ona momoli atu o ia i le pito i luma, sa faapea mai loa o ia [Father Thuring], “O le a tatou faalogologo atu i se pese mai le teine Mamona mai Iuta.”

E aunoa ma se tusipese po o se piano, na amata loa ona pese Arianne. A o faalogoina lona iuleo i taualuga maualuluga o le falesa, na amata ona fetagisi tagata o le aulotu ina ua latou malamalama i le savali faamafanafana o le viiga.

Ina ua tuua le sauniga, na toatele tagata o le aulotu na faailoa mai le agaga faafetai ma le alofa ia Arianne mo le usuina o le viiga. O le aafiaga o se faamanatu mamana e faapea, o i tatou uma lava—e tusa lava pe o le a le atunuu, tapuaiga, po o le gagana—o ni fanau a le Atua.