O Se Faaaoao o e ua Faatuatua

E mafai e uunaiga a se alii talavou po o se tamaitai talavou se toatasi ona faia se eseesega i le lalolagi? O le tali o le ioe!

Ua tuuina atu e le Faaola o Iesu Keriso ia te oe le faatuatuaga i Lona suafa, lea na e mauaina i le papatisoga. Ua Ia faatuatuaina oe e fai ma sui o le Ekalesia ma lou aiga e ala i le ola ma le agaga faafetai i se olaga lelei. Ua Ia talosagaina oe ina ia “fai oe ma faaaoao i e ua faatuatua,” o se tasi o le a tosina mai ai isi ia te Ia, faia ni vavega, ma fesoasoani ia te Ia i le fausiaina o le malo o le Atua i le lalolagi.

O le autu o le Mutuale i le 2009 o loo maua i le 1 Timoteo 4:12, lea na tuuina atu ai e le Aposetolo o Paulo le fautuaga i lana uo talavou o Timoteo. O le mea na aoao atu e Paulo ia Timoteo ua faatatau foi ia te outou, aua o outou, ua pei foi o Timoteo o se tagata faatuatua! “O outou o ni agaga faapitoa ua filifilia e soifua mai i lenei vaitaimi” ina ua toefuatai mai le talalelei a Iesu Keriso. O outou o se vaega o se tupulaga faamanuiaina i “tiutetauave o le fausia o le malo o le Atua.”¹ E mafai ona e faatosinaina le lalolagi atoa e ala i le mana o lou faatuatua ma au faataitaiga amiotonu. Na silafia e Paulo lena mea e uiga ia Timoteo, ma matou te iloa lena mea ia te outou!

Na tuuina mai e Peresitene Thomas S. Monson se fautuaga sili ona manaia i le auala e mafai ai ona avea i tatou ma se “faaaoao o e ua faatuatua.” Na saunoa o ia: “Ia pasia lenei suega i au faaiuga uma e te mafaufau i ai: O le a lana mea e fai ia te au? O le a lana mea e fai mo au? Aua nei faamamafaina lau anavatau o le amio i lou faapea, ‘O le a se manatu o isi tagata?’ ae ia faapea, ‘O le a so’u manatu ia te au lava ia?’ Ia uunaia oe e lena leo filemu ma le itiiti. Manatua na faaee e se tasi ua i ai le pule ona lima i luga o lou ulu i le taimi o lou faamauga ma faapea atu, ‘Ia talia le Agaga Paia.’ Tatala o outou loto, ma o outou agaga, i le leo o lena siufofoga faapitoa o loo molimau atu i le upumoni.”²

O tagata faatuatua ua i ai ni molimau patino o loo tuputupu pea e uiga ia Iesu Keriso, ua latou iloa le faamanuiaga tele o le molimau patino, ma latou te mananao e faasoa atu o latou malamalama i isi. E mafai ona faasoa atu lau molimau e ala i au upu ma au faataitaiga.

Na aoao mai foi Peresitene Monson: “A mausali le faavae o lau molimau … ona uunaia ai lea o mea uma e te faia i lou olaga atoa. O le a fesoasoani e te iloa ai pe faapefea ona faaalu ou taimi, ma pe o ai foi e te filifilia lua te fegalegaleai. O le a aafia ai lou faiga o lou aiga, ma au fegalegaleaiga ma isi. O le a aumaia ai le alofa, filemu, ma le olioli i lou olaga.”³

Ua outou ola i se lalolagi e faatautava mo lou taimi ma lou taulaiga. O loo outou feagai ma le tele o uunaiga ma ua osofaia e le mau leo eseese. O nisi taimi e te le mautonu ai pe o le a le mea e tatau ona fai ma po o le a foi le mea e sa’o. O vaiaso taitasi e te maua ai le avanoa e te ai ma inu ai i le faamanatuga ma faafou ai lau feagaiga e “manatua pea [le Faaola] ma tausia Ana poloaiga” (MFF 20:77). A e faia lenei mea, ua e faaali atu i le Tama Faalelagi lou naunau e tauave i ou luga le suafa paia o Lona Alo. O au upu ma amioga e faaali atu ai i isi o loo e tausia moni au feagaiga. A o e faafouina ma tausia au feagaiga, o le a taitaiina oe e le Agaga Paia ma “e faaali mai ia te outou mea uma tou te faia” (2 Nifae 32:3).

O tulaga faatonuina o loo i le Mo Le Malosi o le Autalavou o le a faamalosia ai oe ma fesoasoani e te tu mausali ai o se faaaoao. A o e ola i nei tulaga faatonuina, o le a e maua le taitaiga ma le mafutaga faifaipea a le Agaga Paia. A o e ola i nei tulaga faatonuina, o le a e maua le taitaiga ma le mafutaga faifaipea ma le Agaga Paia. “O le a e maua lagona lelei e uiga ia te oe lava, ma o le a avea foi oe ma faatosinaga lelei i olaga o isi.”⁴ O le a e fiafia, ma o le a tosina atu au uo ma lou aiga ia te oe e ala i le malamalama ma le fiafia e te faasusuluina atu.

O lea matou te fesili atu ai ia te outou, “E mafai e se alii talavou po o se tamaitai talavou se toatasi o loo taumafai e ola i le talalelei ma ia avea o se faaaoao agavaa i e ua faatuatua ona faia se eseesega i le lalolagi?” Matou te iloa ma o matou loto atoa o le tali o se ioe malosi! Matou te talitonu afai e te mama i ou mafaufauga, talanoaga, ma amioga, o le a e faia se eseesega. Matou te talitonu ia te outou!