O Le Vaiaso a Peni

Na tuu e Peni lona lima i luga o le atopau sa i ona autafa i totonu o le taavale. Na momoli atu o ia e Tina ma Tama i le fale o Tamamatua. Na alu Peni e nofo ia tamamatua mo se vaiaso atoa se tasi. Leai ni uso, leai se tuafafine pepe—na o Peni lava ma Tamamatua.

Sa talanoa atu Peni i a Tamamatua e uiga i le vaiaso o le a la faatasi ai. Na fai mai Tamamatua o le vaiaso lea o Peni ma e mafai ona la faia mea uma e fiafia i ai Peni. Na tilotilo atu Peni i fafo o le faamalama. Pe na ia manatuaina mea uma e tapena mai? Na ia tapenaina mai lona pulou fagota laki, o lana mata tioata mo le la, ma ana tusi e fiafia i ai.

“Ia, manatua,” na fai mai ai Tina mai le nofoa pito i luma, “O Tamamatua e le o se tagata o le tatou ekalesia. O ia o se tagata lelei ma o se tamamatua lelei. Ae o nisi mea i lona fale o le a foliga mai e ese ia te oe.”

“E pei o le a?” Na iloa e Peni e le alu lona tamamatua i le lotu. Ae na te lei mafaufauina pe o le a ese faapefea lena mea.

“E tatau ona e faamanatu i ai o oe e te le inu lauti faaaisa,” na fai mai ai Tama.

“Ua lelei,” o le tala lea a Peni.

“O le a e le alu i le lotu i le Aso Sa, ae e mafai ona e tausia ia paia le aso Sapati i isi auala,” o le tala lea a Tina.

“O le a ou faia,” na fai atu ai Peni.

Ina ua latou taunuu atu i le fale o Tamamatua, na faatalitali mai Tamamatua mo i latou i luga o le faapaologa. O Peni lava na muamua i fafo o le taavale. “Tamamatua!”

“O a mai lau fitu tausaga e sili ona ou fiafia i ai?” Na fusi mai e Tamamatua Peni. “Ua e sauni mo lou vaiaso faapitoa? E filifili oe i mea ta te faia faatasi.”

“E mafai ona ta o ta te fagogota?” Na fesili ai Peni. “O lea na aumai lo’u pulou fagota laki.”

“Ioe e mafai,” le tala a Tamamatua.

“Ma e mafai ona ta o i le su?” Na fesili ai Peni. “O lea na aumai la’u mata tioata mo le la.”

“Ioe e mafai,” le tala a Tamamatua.

“Ma e mafai ona ta faitau faatasi?” Na fesili ai Peni. “O lea na aumai a’u tusi ou te fiafia i ai.”

“Ioe e mafai,” na fai atu ai Tamamatua. “Ma ou te manatu e tatau ona ta o i se faatauga e filifili ai sau meaatalo i le faleoloa.”

“Oka,” o le tala lea a Peni. “O le a matuai manaia lava lenei vaiaso!”

O le Aso Faraile, na o ai Tamamatua ma Peni e fagogota.

O le Aso Toonai, na o ai Tamamatua ma Peni i le su.

O le aso na sosoo ai, na kuka ai e Tamamatua se ti panikeke. “O nei o le ta aso faatau,” o le tala lea a Tamamatua.

“Ta’i manaia!” O le alaga fiafia lea a Peni. “O le a le ituaiga meataalo e tatau ona ou aumaia?”

Ona manatua ai lea e Peni—o le Aso Sa. E faapefea ona ia faamatala atu ia Tamamatua e le faatau i le Aso Sa?

Ina ua uma le ti, na fai e Peni se tatalo i totonu o lona potu. Sa ia ole atu i le Tama Faalelagi e fesoasoani mai ia te ia i le faamalamalamaina ia Tamamatua e uiga i le tausia o le paia o le aso Sapati.

Ina ua uma le tatalo, ona saofai ai lea o Peni i luga o lona moega. Na valaau mai Tamamatua ia Peni, “Sei fai o’u seevae, ona ta o ai lea.”

Na manava tele i totonu Peni ona tu lea i luga. Na tau atu ia Tamamatua o nonoa ona seevae.

“Tamamatua, faafetai lava mo le aveina o a’u e fagota ma le su. Ae o nei ou te iloa e tatau ona ta malolo.”

“O le a le uiga o lau tala?” Na fesili atu ai Tamamatua. “Na ou folafola atu ta te o e faatau.”

“Ua ou iloa, ae e te manatu e mafai ona ta o i se isi aso?”

“O a mai oe? Ua e ma’i?”

“Leai, Tamamatua,” na fai atu ai Peni. “O nei o le Aso Sa. Ma o le matou fale matou te le faatau i le Aso Sa.”

Na leai se tala a Tamamatua.

“E mafai ona ta nonofo i le fale nei?” Na fesili ai Peni. “E mafai ona ta savalivali. E mafai ona faitau a ta tusi.”

Na ataata atu Tamamatua ia Peni. “Ioe e mafai,” na ia fai atu ai. “O lou lava vaiaso lenei, e pule ai lava oe.”

Na tuuina atu e Peni se opo lapoa ia Tamamatua. “Na ou iloa lava o le a matuai manaia lenei vaiaso,” na fai atu ai Peni.