Ia Sii Ae o Tatou Leo o le Lapataiga

O le tiute ia lapatai i lo tatou tuaoi e pau tonu i o tatou luga uma, o e ua taliaina le feagaiga o le papatisoga. E tatau ona tatou talanoa i a tatou uo ma aiga e le auai i le ekalesia e uiga i le talalelei. O lo tatou faamoemoega o le valaaulia o i latou e aoao e faifeautalai faamisiona, o e ua valaauina ma vaetofia e aoao atu. Afai ua filifili se tagata e talia la tatou valaaulia e aoaoina, ua maua ai se “igoa e faailoa atu” o se folafolaga maoae lea, o se tagata atonu o le a mafai ona ui ifo i le vai o le papatisoga ona tumau faamaoni ai lea.

I le avea ai ma se tagata o le Ekalesia, ia e nofouta o le a faapea ona talosagaina oe e faifeautalai faamisiona po o faifeautalai a le uarota po o le paranesi, mo se avanoa latou te fesoasoani atu ai ia te oe i le faia o se lisi o tagata e mafai ona e faasoaina atu i ai le talalelei. Atonu o le a fautuaina oe e faifeautalai e mafaufau i tagata o lou aiga, tuaoi, ma paaga. Atonu latou te talosagaina oe e faatulaga se aso o le a e taumafai ai e saunia le tagata po o le aiga ina ia aoaoina e faifeautalai. Na ou i ai i lena aafiaga. Ona sa taliaina e lo matou aiga lena valaaulia mai faifeautalai, o lea na faamanuiaina ai au e faia le papatisoga o se fafine ua oti lana tane i le 80 ma ona tupu o ona tausaga, lea sa aoaoina e tamaitai faifeautalai.

Ina ua tuu ou lima i luga o lona ulu e faamau o ia o se tagata o le Ekalesia, na musuia au e faapea atu, o lana filifiliga ina ia papatiso o le a faamanuiaina ai augatupulaga o lona aiga, o e mulimuli mai ma e na muamua atu ia te ia. E oo lava ina ua maliu o ia, sa mafai ona ou i ai i totonu o le malumalu faatasi ma lana tama tama a o faamauina o ia ia te ia [lona tina].

Atonu na e maua foi ni aafiaga faapena i tagata na e valaauliaina ina ia aoaoina, ma ua e silafia ai o nai taimi laiti faapena o le olaga e sili atu ona suamalie. O le fetalaiga a le Alii i faifeautalai ua moni foi mo i tatou uma: “Ma o lenei, afai o le a tele lo outou olioli faatasi ma se agaga e toatasi ua oulua aumaia ia te au i le malo o lou Tama, faauta i le sili atu o lo outou olioli pe afai lua te aumaia ni agaga e toatele ia te au!” (MFF 18:16).

E moni lava le fetalaiga a le Alii i faifeautalai ma i tatou uma lava: “Ma o lenei, afai o le a tele lo outou olioli faatasi ma se agaga e toatasi ua oulua aumaia ia te au i le malo o lou Tama, faauta i le sili atu o lo outou olioli pe afai lua te aumaia ni agaga e toatele ia te au!” O le a le faaaogaina e le Alii le upu lapatai pe a na fai e leai se tulaga matautia. Ae e le toatele ni tagata tatou te iloa ua latou iloaina. Ua latou aoao ia le amanaia le tele o faamaoniga e faapea, o le lalolagi ua amata ona toilalo ma o o latou olaga ma o latou aiga ua le maua ai le filemu lea na latou manatu e mafai ona i ai. O lena naunautaiga e le amanaia ia faailoga o le matautia, e faigofie ai ona e manatu faapea: “Aisea o le a ou talanoa atu ai e uiga i le talalelei i se tagata, e foliga mai o loo fiafia lava [i le olaga o loo i ai]? O le a le tulaga matautia e i ai mo i latou po o au foi pe afai ou te faia se mea pe le ta’u atu foi?”

Ia, atonu e faigata ona vaaia tulaga matautia, ae e moni lava, mo i latou ma mo i tatou foi. Mo se faataitaiga, i se taimi i le olaga a sau, o tagata uma na e feiloai i ai i le olaga lenei, o le a latou iloa le mea ua e iloa i le taimi nei. O le a latou iloa na pau lava le ala e ola faavavau ai faatasi ma o tatou aiga ma faatasi ai ma lo tatou Tama Faalelagi ma Lona Alo o Iesu Keriso, o le filifili lea e ulu atu i le faitotoa e ala i le papatisoga i lima o i latou ua i ai le pule mai le Atua. O le a latou iloa ai, na pau lava le ala e mafai ai ona faavavau faatasi aiga o le talia lea ma tausi ia feagaiga paia o loo osia i malumalu o le Atua i lenei lalolagi. O le a latou iloa na e iloaina. Ma o le a latou manatua pe na ofoina atu ia i latou le mea na ofoina atu e se isi ia te oe.

E faigofie lava ona faapea, “E le o le taimi sao lenei.” Ae o loo i ai le matautia i le faatuai. O tausaga ua alu, na ou faigaluega ai mo se tamaloa i Kalefonia. Sa ia faafaigaluegaina au; na agalelei o ia ia te au; ma na foliga mai sa maualuga lava lana vaaiga ia te au. Atonu sa na o au lava le tagata o le Au Paia o Aso e Gata Ai na masani lelei i ai. Ou te le iloa po o a mafuaaga uma na ou maua na ou faatalitali ai mo se taimi sili ona lelei e talanoa atu ai ia te ia e uiga i le talalelei. Ae ou te manatua lou lagonaina o le faanoanoa ina ua ou iloaina, ina ua litaea o ia ma na mamao foi le mea na ou nofo ai, ua maliliu i laua ma lona faletua a o malaga atu i laua i le leva o le po i lo laua fale i Carmel, Kalefonia. Na alofa o ia i lona faletua. Na alofa o ia i lana fanau. Na alofa foi o ia i ona matua. Na alofa o ia i fanau a lana fanau, ma o le a alofa o ia i lana fanau ma o le a manao latou te mafuta faatasi e faavavau.

Ia, ou te le iloa pe o le a faapefea ona taulimaina le tumutumu o tagata i le olaga a sau. Ae faapea la o le a ou feiloai atu ia te ia, ma o le a vaai mai o ia i ou mata, ma o le a ou vaaia ai i ona mata le fesili: “Hal, na e iloaina lava. Aisea na e le tauina mai ai ia te au?”

Pe a ou mafaufau ia te ia ma pe a ou mafaufau i le fafine ua oti lana tane na ou papatisoina ma lona aiga o e o le a faamauina nei ia te ia ma le tasi i le isi, ua ou manao ai e fai le mea sili atu. Ua ou manao e faateleina lou malosi e valaaulia ai tagata ina ia aoaoina. Faatasi ai ma lena naunautai ma le faatuatua o le a fesoasoani mai le Atua ia i tatou, o le a tatou faia le mea e sili atu ona lelei.

E muamua lava le alofa i mea uma. O se galuega agalelei se tasi, e seasea ona lava lea. Ua faamatalaina e le Alii le alofa e tatau ona tatou lagonaina, ma e tatau foi ona iloa i totonu ia i tatou, e tagata tatou te valaaulia, i upu faapenei: “E onosai le alofa,” ma e “ufiufi i mea uma, e talitonu i mea uma, e faamoemoe i mea uma, e onosai i mea uma” (1 Korinito 13:4, 7).

Ua ou vaai i le uiga o le “onosai” ma le onosai i mea uma.” Na siitia mai se aiga i se fale na latalata mai ia i matou. Na fou lava le fale, ma o au o se tasi lea o le aufaigaluega a le Au Paia o Aso e Gata Ai na faaaluina ni nai po i le fuafuaina o togalaau. Ou te manatua le po mulimuli, na ou tutu ai i autafa o le tama o le aiga ina ua uma la matou galuega. Sa ia iloiloina la matou galuega ma fai mai ia i matou na tutu latalata ane, “O le fanua lona tolu lenei ua faia e outou o Mamona mo i matou, ma ou te manatu o le faiga aupito manaia lenei.” Ona ia fai mai lemu lea ae mausali ia te au e uiga i le faamalieina tele na ia maua i le avea ai ma se tasi o lana lava ekalesia, o se talanoaga sa masani ona ma faia i tausaga na nofo ai o ia iina.

O lena taimi atoa, o galuega agalelei na faasafua atu ia te ia ma lona aiga sa le muta lava, aua na matuai alofaina lava i latou e tuaoi. I se tasi afiafi, na ou sau ai i le fale ma vaaia ai se loli na tu i le auala o lo latou fale. Na tau mai ia te au e faapea o le a siitia atu i latou i se isi setete. Na ou alu atu i ai e vaai pe mafai ona ou fesoasoani atu. Ou te lei matauina le alii na ou vaaia o lauina meaafale i totonu o le loli. Na fai mai filemu o ia ina ua ou latalata atu, “Talofa, Uso Eyring.” Na ou le matauina o ia aua o ia lea o le atalii, ae ua matua nei, na nofo ai iina, ua faaipoipo, ma siitia ese. Ma ona o le alolofa o le toatele o tagata ia te ia, ua papatisoina ai nei o ia o se tagata o le Ekalesia. Ou te le iloa le iuga o lena tala aua o le a leai sona iuga. Ae ou te iloa na amata i le alofa.

Lona lua, e tatau ona avea i tatou ma faataitaiga sili atu o mea tatou te valaaulia isi e fai. I se lalolagi pogisa, o le a sili atu ai le taua o le poloaiga lenei a le Faaola: “Ia faapea ona pupula atu lo outou malamalama i luma o tagata, ina ia latou iloa la outou amiolelei, latou te vivii atu ai i lo outou Tama oi le lagi” (Mataio 5:16).

O le toatele o i tatou e matamumuli lava i le mafaufau e faapea, atonu e tau le iloa mai la tatou moli laitiiti o faataitaiga. Ae e sili atu nai lo lou iloa, o loo matauina lava oe ma lou aiga. O se taimi ua tuanai na ou maua ai le avanoa ou te auai atu ai ma lauga i ni fonotaga lea na toeitiiti atoa le 300 o faifeau ma taitai o isi atunuu na auai. Na ou feiloai taitoatasi atu i le toatele o i latou na mafai ona ou oo atu i ai. Na ou fesili atu ia i latou pe aisea na latou matuai faalologo ai i lau savali, lea na ou toe faamatalaina ai le amataga o le Ekalesia, ma faamatala ai le Uluai Faaaliga i le taulealea o Iosefa Samita faapea foi ma perofeta soifua. O tagata uma, na tutusa lava tali na latou tuuina mai. Na latou faamatalaina se tala e uiga i se tagata po o se aiga—o tagata o le Ekalesia na latou iloaina. Na tele ina ou faalogoina [le faamatalaga lenei], “O i latou o se aiga aupito lelei ua ou iloaina.” Na masani ona latou talanoa mai e uiga i se taumafaiga i le lotoifale po o se tali atu i se faalavelave lea na galulue ai tagata o le Ekalesia i se auala mataina.

O tagata na ou feiloai i ai i lena fonotaga, latou te lei iloaina le moni o le aoaoga faavae, ae na latou vaaia muamua ona fua i olaga o tagata o le ekalesia, ma o lea na saunia ai i latou e faalogologo. Na latou saunia e faalogo i upumoni e uiga i le Toefuataiga—e mafai ona faamauina aiga e faavavau ma o le talalelei e mafai ona suia ai o tatou lava natura. Na saunia i latou ona o a outou faataitaiga.

O le mea lona tolu e tatau ona faia ia sili atu le lelei, o le valaaulia lea faatasi ma se molimau. O le alofa ma faataitaiga o le a tatalaina le ala, ae e manaomia lava ona tatala o tatou gutu ma molimau atu. O loo fesoasoani ia i latou le mea moni faatauvaa lenei: o le upumoni ma le filifiliga e le mavavaeeseina le fesootaiga. O loo i ai nisi filifiliga e tatau ona faia e le fanau uma a lo tatou Tama Faalelagi e agavaa ai mo se molimau o upumoni faaleagaga, ma o le taimi lava tatou te iloa ai se upumoni faaleagaga, ua tatau loa ona tatou filifili pe o le a mulimuli ai o tatou olaga i lea tulaga. Pe a tatou molimau atu e uiga i le upumoni ia i latou e pele ia i tatou po o uo, e tatau ona tatou faailoa atu i ai filifiliga e ao ona latou faia i le taimi lava latou te iloa ai mo i latou lava na upumoni. E lua ni faataitaiga taua o loo i ai: o le valaaulia o se tasi e faitau le Tusi a Mamona ma le valaaulia o se tasi e malie e aoao [o ia] e faifeautalai.

Ina ia tatou iloa e moni le Tusi a Mamona, e tatau ona tatou faitauina ma faia le filifiliga o loo maua i le Moronae: tatalo e iloa ai pe moni (tagai Moronae 10:3–5). Pe a tatou faia lena mea, e mafai ona tatou molimau atu mai aafiaga patino i a tatou uo e faapea, e mafai ona latou faia lena filifiliga ma latou iloa ai lena lava upumoni e tasi. Pe a latou iloa o le Tusi a Mamona o le afioga a le Atua, o le a latou feagai ma se isi filifiliga: pe latou te taliaina le valaaulia e aoao i latou e faifeautalai. Ina ia faia lena valaaulia ma molimau, e tatau ona e iloa o faifeautalai ua valaauina o ni auauna a le Atua.

E mafai ona e maua lena molimau e ala i le filifili e valaaulia faifeautalai i lou fale e aoaoina lou aiga po o au uo. O le a talia fiafia e faifeautalai le avanoa. Pe a outou nonofo faatasi ma i latou a o latou aoao atu, e pei ona ou faia, o le a e iloa ai ua musuia i latou i le mana e sili atu i lo latou matutua ma o latou tomai. Ma, pe a e valaaulia isi e filifili ina ia aoaoina e faifeautalai, o le a mafai ona e molimau atu o le a latou aoaoina le upumoni ma tuuina atu ni filifiliga o le a oo atu ai i le fiafia.

Atonu o nisi o i tatou o le a faafaigata ona talitonu ua lava lo tatou alolofa, pe ua lava le lelei o o tatou olaga po o tatou mana e molimau atu ai ua lava lea mo a tatou valaaulia i o tatou tuaoi e taliaina ai. Ae ua silafia e le Alii tatou te ono maua ni lagona faapena. Faalogo i Ana tuleiga faamalosiau, lea na Ia faatonuina ina ia faamuamua i le Mataupu Faavae ma Feagaiga, ina ua Ia tuuina mai ia i tatou la tatou tiute: “Ma o le leo o le lapataiga e oo atu i tagata uma lava, i fofoga o ou soo, o e ua ou filifilia i nei aso e gata ai” (MFF 1:4).

Ona toe faalogo lea i Lona faamatalaina o tulaga manaomia o na soo—o i tatou: “O le a oo mai mea vaivai o le lalolagi ma lepetia i lalo mea sili ma le malolosi” (MFF 1:19).

Ma mulimuli ane: “Ina ia mafai ona folafola atu le atoatoa o lau tala lelei e e vaivai ma lotomaulalo e oo i tuluiga o le lalolagi” (MFF 1:23).

Ma le isi foi: “Ma afai [e] lotomaulalo i latou e mafai ona faamalosia i latou, ma faamanuiaina mai luga” (MFF 1:28).

O lena faamautinoaga na tuuina atu i uluai faifeautalai o le Ekalesia ma faifeautalai o aso nei. Ae ua tuuina mai foi ia i tatou uma lava. E tatau ona tatou faatuatua e mafai ona lava lo tatou alolofa ma lava le pa’i mai o le talalelei i o tatou olaga, e mafai ai ona lagonaina la tatou valaaulia e filifili e pei o loo sau mai le Matai o le ona le valaaulia.

O Ia o le faataitaiga atoatoa o le mea e tatau ona tatou faia. Ua e lagonaina Lona alofa ma Lana tausiga e tusa lava pe e te lei tali atu, e pei foi ona le tali mai i latou na e oo atu i ai ma le talalelei. Na Ia valaauliaina oe mai lea taimi i lea taimi ina ia aoaoina e Ana auauna. Atonu e te le’i anoanoa ia asiasiga a faiaoga o aiga ma faiaoga asiasi po o se telefoni atu a le epikopo, ae o Ana valaaulia na e fesoasoani atu ma aoaoina oe. Ma na faamanino mai e le Alii i taimi uma ia taunuuga, ona tuu lea o i tatou e filifili mo i tatou lava.

O le mea na aoaoina atu e le auauna a le Alii o Liae i ona atalii ua fetaui lea mo i tatou uma: “O lenei foi ou atalii e, ou te loto ina ia outou vaai i le Puluvaga sili, ma ia outou faalogo atu i ana poloaiga; ma ia faamaoni i ana fetalaiga, ma filifili i le ola faavavau, e tusa ma le finagalo o lona Agaga Paia” (2 Nifae 2:28).

Ma mai ia Iakopo ua tatou maua mai ai lenei faamalosiauga e talafeauga ma la tatou tautinoga e molimau atu, e pei ona tatau ai, o le filifili ina ia aoaoina e faifeautalai o le filifili lea e ulu atu i le auala e agai atu i le ola e faavavau, o le meaalofa sili lea o meaalofa uma a le Atua: “O lenei, ia outou lototetele, ma ia manatua ua tuusaoloto lava outou—ina ia filifili e outou le ala o le oti faavavau, po o le ala o le ola faavavau” (2 Nifae 10:23).

Ou te molimau atu e na o le taliaina ma ola ai i le talalelei toefuataiina a Iesu Keriso e aumai ai le filemu na folafolaina mai e le Alii i lenei olaga ma le faamoemoe i le ola faavavau i le olaga a sau. Ou te molimau atu ua tuuina mai ia i tatou le avanoa ma le tiute ina ia ofoina atu le upumoni ma filifiliga ia e taitai atu ai i na faamanuiaga i le fanau a lo tatou Tama Faalelagi, o o tatou uso ma tuafafine ia. O Iesu o le Keriso, o loo soifua o Ia, ma o Lana galuega lenei.