Iloaina o le Atua

O le toeitiiti atoa o lou 18 tausaga, na ou alu atu ai i se taulaga laitiiti e igoa o Soldotna, i Alaska, ou te faigaluega ai mo le taumafanafana. O le taimi muamua lea ua ou nofo ese ai mai lo’u aiga. Na fai e ou matua se fetuunaiga ina ia ou faigaluega ma nofo i sa laua uo lelei lava o le au Wright, sa i ai so latou faleoloa i le taulaga. Sa ou faamoemoe ia lava ni tupe ou te maua mo le kolisi. Sa ou faamoemoe foi ou te toe foi atu i lou aiga ma se tali i se fesili na faafia ona oso mai i lou mafaufau: E i ai moni ea se Atua?

Sa manaomia ona ou maua se tali mo au lava. O lea na tonu ai ou te tatalo i po uma ma fesili atu i le Atua pe moni o Ia. I se isi itu na ou faapea, afai e i ai se Atua, o le a tali mai o Ia i lau tatalo. Afai ou te le mauaina lava se tali, ona ou iloa ai lea e le o i ai o Ia. E faigofie lava, o ou mafaufauga ia.

I le fale o le au Wright, sa ma potu faatasi ai ma le la tama teine o Lisa. Na foi mai o ia mai le Iunivesite o Polika Iaga mo le taumafanafana, ma sa ma galulue faatasi i le faleoloa. Na ou fiafia lava ia Lisa mai lava i le amataga. Na lalelei, atamai, to’a, ma naunau o ia i le olaga. O lena taumafanafana na ma faaaluina faatasi ai le toetoe o itulau uma o aso uma lava.

Na ou fiafia lava ou te faalogologo ia Lisa o faamatala mai e uiga i le olaga i le kolisi. Na foliga mai lona olaga e fiafia ma matua tutoatasi lava. O le olaga o Lisa na faatulagaina lelei ma paleni, ma na mautu le faatulagaina o mea tonu na ave i ai le faamuamua.

Na tupu atili lou faamemelo ia Lisa a o ou matauina lona faitauina o tusitusiga paia i aso uma ma tatalo i taeao ma po taitasi. Na ou fia fesili atu ia Lisa pe na faapefea ona ia maua lona faatuatua i le Atua ae na ou matamuli ona o le leai o sou faatuatua. Ou te manatua lou taoto ai i le moega, ma manatunatu po o a tala a Lisa e talanoa atu ai i le Atua i ana tatalo.

O po uma lava na ou tootuli ai i tafatafa o lou moega ma fai se tatalo puupuu, e fesili atu ai i le Atua pe o i ai o Ia iina. Peitai, ou te lei lagonaina lava se mea faapitoa pe faaleagaga. Ou te lei faalogo i se leo. Na tutusa lava ou lagona i le taimi na uma ai au tatalo ma le taimi ou te lei tatalo ai. O lenei faiga masani i le po na alualu ai lava mo le lua masina. I le lotovaivai, na ou iloa ai le faateleina o lou masalosalo i le Atua.

I se tasi po, a o ou lagonaina le matuai fia foi i lou aiga, sa faapea ona ou tagi. Na matuai ou manao lava ia ou latalata atu i lou aiga, uo, ma siosiomaga na ou masani ai. O le tiga o le fia talanoa i se tagata na iloaina ma alofaina au, o lea na ou tootuli ai i le tatalo. “Le Atua e, ua ou matuai manaomia lava Oe i le taimi nei,” na ou amata tatalo ai. Mo nai minute na sosoo ai, na sasaa atu ai ou lagona moni i lou Tama oi le Lagi. Na ou tauina ia te Ia mea uma lava. Na ou talanoa ia te ia e pei lava na ou talitonu na i ai o Ia iina.

Na siomia au i se mafanafana. Na amata ona ou lagonaina e pei lava ua afio mai le Tama Faalelagi ma opo au i Ona aao. Sa ou le toe lagona le tuua toatasi. Na siomia au i le alofa ma le filemu. Na ou iloaina sa i ai se Atua.

Na ou mafaufau pe aisea ua silia ai ma le lua masina o faatali se tali i lau tatalo. Na aumai ia te au le tali e leIeremia 29:13: “E saili mai outou ia te au, tou te maua foi, pe a outou saili mai ia te au ma o outou loto atoa.”

Na iu ina ou maua se tali i lau tatalo ina ua ou saili loloto i lou loto. Na tuu lou faatuatua i le i ai o se Atua. Sa ou saili i le maualuga o le lagi i au upu ma loimata.

Ua suia lou olaga ona o lena po e tasi. Na ou auauna atu i se misiona ma faaipoipo i le malumalu. Ua faaauau ona faateleina lou faatuatua i le i ai o le Atua.

E masani ona ou toe mafaufau i lena taumafanafana i Alaska. A na leai le faataitaiga a Lisa, semanu e le mafai ona ou tutumau i na masina i le tatalo. Na semanu ou te fiu ma ou le iloaina ai le alofa o lou Tama Faalelagi. O le a faavavau pea ona ou faafetai ia Lisa ma lana faataitaiga. Na fesoasoani o ia ina ia ou iloa le Atua ma lagona Lona alofa mo au.