Faamanuiaina Faalua

Na saunia e Angela Lee

Na suia lou olaga e faavavau ina ua ma o atu ma lou toalua i le fomai e siaki po o le a le itupa ma le alualu i luma o le ma pepe e lei fanau mai. Na ou tagi i le fiafia ina ua ma iloaina sa ou tauaveina se masaga. Ae na liua ou loimata i le faanoanoa ina ua faamatala mai e le fomai e tele ni faafitauli e ono le feola ai le masaga pe a fananau mai. Na fautua mai le fomai e faapau lou maitaga. Na fai mai o ia o le faaauau ai o le maitaga o se tulaga lamatia lava, ma e i ai se taimi o le a tatau ai ona ou nofo i le falemai.

E ui lava i tulaga matautia, ae na ma filifili lava e tuu pea lou maitaga.

O le ma malaga atu i le fale na ou iloaina ai le ogaoga o le tulaga. Na ou mafaufau pe o le a faapefea ona ou tuua lou toalua ma le ma fanau e toatolu, ae ou nofo mo se taimi faaumiumi i le falemai. O le iloaina atonu o le a fananau le au nai au pepe—ma atonu foi o le a maliliu—na avea lea ma se tulaga lofituina ia te au. Sa ou le mautinoa pe mafai ona ou onosaia lenei tofotofoga.

A na le faia lava lo’u faamanuiaga faaleperisitua e lo’u toalua ma lo’u tama faaletulafono, ou te le lagonaina le toafilemu. Na ou iloaina po o le a lava le taunuuga o le a i ai, o le a sologa lelei lava lo matou aiga. Na ou lagonaina le alofa o lou Faaola ma na ou iloa o le a faatasi mai o Ia ia i matou i le olioli po o le faanoanoa.

O se taimi mulimuli ane, na ou faatofa atu ai i lou aiga ma ou alu loa i le falemai ou te nofo ai mo se taimi na le mailoa. Sa mataituina e le aunoa ia le tata o fatu o pepe, ina ia mautinoa na saogalemu i laua. Sa faigata ia te au lou vaai atu ua faiifo le tata o o laua fatu, ma na ou mafaufau ai pe mata la te aulia atu le aso na faamoemoe e faafananau mai ai, i le 34 vaiaso. O le 25½ o vaiaso, na pau maualalo ai i se tulaga faaletonu le tata o le fatu o se tasi o pepe, na toetoe lava a leai se tata. Na filifili loa fomai afai e le toe foi le tata o lona fatu i le tulaga masani, o le a fai loa lou taotoga i se taimi vave e faafanau ai loa ia pepe. Na ou popole ina ua ou faalogo ua telefoni atu le tausimai i lou toalua ma tau atu i ai ua tapena au mo le taotoga ma na sauniuni foi le vaega e vaaia pepe fou.

Na ou iloaina ina ia ou manumalo mai lenei tofotofoga, na ou manaomia le fesoasoani a le Tama Faalelagi. Sa ou tatalo le leoa, ma augani atu ina ia toe manuia le ma pepe, ina ia mafai ai ona lava se taimi mo le masaga e tutupu ai i totonu o lou manava. Sa ou tatalo foi mo le faamafanafanaga. Na faapea foi ona ou toe lagonaina le toafilemu, e pei lava ona ou maua i le taimi na fai ai lou faamanuiaga faaleperisitua. Ou te lei iloaina pe o le a ola pe oti a ma pepe, ae na ou iloaina, pe o le a lava le tulaga e oo i ai, afai ou te liliu atu i le Alii, o le a fesoasoani o Ia i le tauaveina o lau avega. E pei ona iu i ai, na toe foi i le tulaga lelei le tata o le fatu o le pepe, ma sa le manaomia ai se taotoga.

Na faaauau mo le isi lua masina lou nofo ai i le falemai, ma na tele taimi na ma popole ai i le fesuisuiai o le tata o fatu o ma pepe. Ae o le mea e laki ai, sa lei toe pau maualalo se tata o fatu o se tasi o le masaga e pei ona sa i ai muamua. Na fananau mai o ma atalii o Ioane ma Iakopo i le 33 o vaiaso. Na felavesai o la uso i ni taaiga se valu, ma o Ioane—le alii lea na pau maualalo le tata o lona fatu—na faalua ona taai lona uso i lona ua. Na tuu le ma masaga i le potu o mai tigaina seia oo ina fetaui lelei le mafanafana o o laua tino ma a la’ua manava. E ui lava i faafitauli o pepe e fananau le au, ae na mafai lava ona o mai i le fale ia Ioane ma Iakopo ina ua uma aso e 19.

Ua savavai i le taimi nei le ma masaga, ma e leai lava ma ni aafiaga le lelei o vaaia mai lo la fananau le au. Ou te faafetai lava ona o le mea na amata o se tofotofoga na avea o se tasi o faamanuiaga silisili i lou olaga. Na foai mai ia te au ni atalii sili ona ola maloloina, ma na faamalosia ai lau molimau i le mana o le perisitua ma le tatalo. Ou te faafetai foi i le mafai ona ou iloa le toafilemu ma le alofa na ou lagonaina i le iloa lea na silafia lava e le Alii lou tulaga. Na ou iloa ai, faatasi ma le fesoasoani a le Alii, o le a tatou maua le malosi e onosaia ai o tatou tofotofoga.