Iosefa Samita O Se Aposetolo a Iesu Keriso

O aoaoga faaaposetolo a Iosefa Samita na amataina i le 1820. O le mafaufau loloto ai i fesili e uiga i mea tau lotu, sa lei umi ae ona iloaina e leai lava se auala e faamalamalama pe finauina ai se manatu o se tagata i se faaiuga pule malosi e uiga i le moni o ekalesia eseese po o latou aoaoga faavae. O le lei i ai o se faaaliga faalelagi, o lea sa na o le tasi ai se manatu na mafai ona faaopoopo atu i manatu na i ai, e le taulealea o Iosefa i “tauaiupuga ma le lasi o taofi” (Talafaasolopito—Iosefa Samita 2:10). Ae o fesili a Iosefa e uiga i mea tau lotu na taliina e ala i le faaaliga patino ma le faaali mai i le tino o le Atua le Tama ma Lona Alo paia ma soifua o Iesu Keriso—o se aafiaga ua ta’ua o le Uluai Faaaliga.

E pei foi ona i ai uluai Aposetolo, o le aafiaga na oo i ai Iosefa ma le Atua na tuusao ma patino. Sa le manaomia ni manatu o isi po o se iloiloga a se aufono e faamatalaina ai le mea na ia vaaia po o lona uiga ia te ia. O le faaaliga a Iosefa i le taimi muamua na avea o se aafiaga sili ona patino—o se tali i se fesili faapitoa. Ae peitai, i le aluga o taimi, i le faamalamalamaina e ala i aafiaga ma aoaoga faaopoopo, na avea ai ma faaaliga faavae o le Toefuataiga.

E pei lava o le faaaposetolo o lenei faaaliga i le moni o Keriso, o lona i ai, ma le Toetu ia Iosefa Samita, ae sa le na o le pau lea o le mea na finagalo Iesu e aoao atu ia te ia. O le lesona muamua a le taulealea o Iosefa na tupu mai le faaaliga o le mana atoatoa, pule aoao, ma le paia o Keriso. E tusa e tasi le uiga o le mana togiola ma le mana faaola o Keriso na muai aoaoina e Iosefa i le taimi na tatalo ai i le vao. A o amata ona tatalo o ia, “sa oo ina siomia au i le pogisa tele, ma sa peiseai o le a faaumatia faafuasei au” (Talafaasolopito—Iosefa Samita 2:15). Faatasi ai ma lona malosi uma na i ai, na amata ai ona ia valaau atu i le Atua e laveai o ia mai le malosi o lenei fili.

“O le taimi tonu lava o lou atuatuvale … , na ou vaai ai i se malamalama faaniutu. …

“Sa lei pine ona oo mai lea malamalama ae ou faalogoina loa ua tatalaina au mai le fili na taofia au” (Talafaasolopito—Iosefa Samita 2:16–17).

O le tauiviga a Iosefa Samita ma le fili e manatua ai se aafiaga na oo ia Mose, lea na aoaoina e le Perofeta i ni nai tausaga mulimuli ane. Ae peitai, e le pei o le taulealea o Iosefa, na vaai muamua Mose i le silisiliese o le Atua ona sosoo ai lea ma le tauiviga ma le mana o le fili ona faatoa laveaiina ai lea mai ona aafiaga. (Tagai Mose 1.)

O le eseesega o le faasologa o mea na tutupu e taua. O Mose na matua mamao lava ma na tele lona malamalama ma uunaiga ao lei tupu lenei mea. E ala i le faaalia o Lona mana maoae ia Mose a o lei fetaiai o ia ma le fili, na fesoasoani ai le Alii ia Mose e faatulaga lelei lona olaga. Ina ua uma ona ia iloa le mamalu o le Atua, na fai mai Mose, “O lenei, ua ou iloa i lenei mea o le tagata o se mea noa, o se mea ou te lei mafaufauina lava” (Mose 1:10). O lenei mea na tupu na mafai ai e Mose ona tatalia faaosoosoga a le fili na sosoo atu ai.

Ae o Iosefa Samita, i le isi itu, o se alii talavou e lei i ai se poto masani, o lona olaga atoa o le a feagai pea ma le mana o le tiapolo faapea ma faafitauli lofituina na aumaia ai. O le feagai muamua ma le tiapolo, ona faasaoina mai ai lea i ana osofaiga e ala i le faaali mai o le Tama ma le Alo, na aoaoina ai e Iosefa lenei lesona e le mafaagaloina: e tusa lava pe o le a le malosi e i ai le mana o le tiapolo, ae e tatau lava ona aluese i taimi uma e faaali mai ai le amiotonu.

O lenei lesona sa taua o le aoaoga faaaposetolo o Iosefa. Sa ia manaomia lenei malamalama e le gata ona o tofotofoga patino na faamalumalu mai mo ia, ae ona o le tetee lofituina o le a la faafeagai i le faavaeina ma le taitaiina o le Ekalesia.

Na alu le taulealea o Iosefa i le vao e saili le poto, ma na ia mauaina lava le poto. Na amataina ai ana aoaoga faaaposetolo. O nei lesona maoae faaaposetolo o le Uluai Faaaliga na aumai ai ma le natura faaletino o le Faaola ma le Tama Faalelagi, faapea ma uluai lesona faavae e faatatau i lo Laua mana—o ia mea taitasi o se poutu o le molimau faaaposetolo.

O uluai aoaoga faaaposetolo a Iosefa Samita na faaauau i le faaliliuga o le Tusi a Mamona. O Le Tusi a Mamona na maua ai e Iosefa “le atoatoaga o le Talalelei e faavavau” (Talafaasolopito—Iosefa Samita 2:34), o mataupu faavae na alagatatau ona malamalama i ai e ui lava ina le i faatulagaina le Ekalesia. Na faailoa atu i le Perofeta le tele o “vaega e tele ua malamalama” (1 Nifae 13:26) o molimau faaperofeta ma faaaposetolo e uiga i le Faaola, o ia mea uma na avea o ni faataitaiga mo ia.

E moni, o loo faaaoga e perofeta o le Tusi a Mamona le silia ma le 100 o autu i a latou aoaoga e uiga ia Keriso, lea na fesoasoani ia Iosefa e malamalama ai i le tiute paia o le Faaola.¹ Ona o le lelei o nei aoaoga, na vave ai ona masani Iosefa Samita i perofeta anamua, ma tuuina atu ai ia te ia se vaaiga i le faamoemoega paia o ona tiutetauave.

O Le Tusi a Mamona ua faamalamalamaina ai le aafiaga o le atulaulau uma i le Togiola a Keriso. O le taulaga paia a le Faaola e le gata mai i tuaoi o le Nuu Paia o Ona aso, pe faatapulaaina foi i le lalolagi faaaposetolo o le Toasefululua muamua. O le Togiola ua aofia ai foafoaga uma a le Atua—taimi ua tuanai, taimi nei, ma le lumanai. Ai se manaia o le aoaoga a Iakopo e uiga i le “togiola e le iu” (2 Nifae 9:7) i le mafaufau o le taulealea o Iosefa, ae maise lava le ese mai i aoaoga faaKerisiano i na ona po.

Ua faaalia foi e le Tusi a Mamona le aafiaga lautele o le Toetu ma isi aoaoga faavae e faatatau i ai. O saunoaga e uiga i lenei aoaoga faavae mai ia Liae, Iakopo, le Tupu o Peniamina, Apinati, Alema, Amoleka, Samuelu le Sa Lamana, ma Moronae o punaoa sili lea o aoaoga.

I le taimi o le faaliliuga o le Tusi a Mamona, na maua ai e le Perofeta ia aoaoga faaopoopo taua e uiga i le mana togiola ma le mana faaola o Keriso. O le 1828 na tauanau ai e Matini Harisi ia Iosefa e tuu atu ia te ia itulau muamua e 116 o le Tusi a Mamona ua uma ona faaliliuina. Ina ua leiloloa ia Matini Harisi ia na itulau, na lagona e le Perofeta le matuai faanoanoa tele.² Na tusia e lona tina, o Lusi Maka Samita e faapea, na alaga Iosefa: “Oi, lou Atua e! … Ua leiloa mea uma! ua leiloa mea uma! O le a se mea e tatau ona ou faia? Ua ou agasala—o au lava na faaosoina le toasa o le Atua. … O le a faapefea nei ona ou tu i luma o le Alii? O le a ea se aoaiga ou te le agavaa ai mai le agelu a le Silisili Ese?”³

E silia ma se masina na tuua ai e le alii ia Iosefa i lenei tulaga pagatia o le salamo.⁴ Ona oo mai lea o le toomaga ma le lesona faaaposetolo. Na tau atu e le Alii ia Iosefa:

“O galuega, ma manatunatuga atoa ma fuafuaga faafinagaloina a le Atua e le mafai lava ona taofi, pe mafai foi ona faaleaogaina. …

“Aua e ui lava ina maua e se tagata faaaliga e tele, ma maua le mana e fai ai galuega silisili e tele, a e afai na te mitamita i lona lava malosi, ma faaleaogaina faatonuga a le Atua, ae mulimuli atu i musumusuga o lona lava loto ma manaonaoga faaletino, e ao ina pau lava o ia ma faaoo atu ai i ona luma le taui ma sui a le Atua amiotonu” (MFF 3:1, 4).

O nei upu na faamatalaina lelei ai le mea na oo i ai Iosefa Samita. Na ia aoaoina lelei ai lava le natura o le valaauga faaaposetolo ma lē foi e tatau i ai le faamaoni o le Aposetolo, i mea uma lava. “E ui ina faaleaogaina e tagata faatonuga a le Atua, ma inosia ana afioga,” ae na tau atu ia Iosefa, “ae ui i lea na tatau ona e faamaoni” (MFF 3:7–8). Na le mafai e Iosefa Samita ona faaaoga papatusi mo se vaitaimi ma na aoaoina o ia i se lesona taua naua. Mulimuli ane, ona toe faafoi ifo lea o papatusi, ma toefuatai lona tofiga o se faaliliutusi.

E ese le taua o lesona na tuuina atu e le faaliliuga o le Tusi a Mamona a o tuputupu ae Iosefa Samita i lona valaauga faaaposetolo! O le Tusi a Mamona o le “maa auau a la tatou ekalesia”⁵ aua o loo i ai le tele o molimau faaperofeta e uiga ia Keriso ma e avea o se molimau faitino o le Toefuataiga.

Ina ua maea le faaliliuga o le Tusi a Mamona i le 1829 ma le faatulagaina o le Ekalesia i le 1830, na maua e Iosefa Samita le avanoa e maua ai aoaoga faifaipea faaaposetolo e ala i le faagasologa o le faaliliuina o isi tusitusiga paia. O lenei mea na aofia ai tausaga e tolu o le faaliliuina o le Tusi Paia ma, i le amataga o le 1835, i le faaliliuga o le tusi a Aperaamo. O le faaliliuga a Iosefa Samita o le Tusi Paia na faalauteleina ai lona malamalama e uiga i le tiute o perofeta o le Feagaiga Tuai ma Aposetolo o le Feagaiga Fou. Na iu ai foi i se faaaliga faaopoopo, ua taua o le tusi a Mose.

O le tusi a Mose na tuuina atu ai i le Perofeta se malamalamaaga taua e uiga i le galuega a le Faaola, e aofia ai Lona tiute i le Foafoaga. “Sa oo ina fetalai mai le Alii ia Mose, ua faapea mai: … O Au o le Amataga ma le Gataaga, o le Atua e ona le malosi uma; na ou faia nei mea e ala atu i lou Atalii e Toatasi na Fanaua” (Mose 2:1). Ma le isi, na Ia fetalai mai, “Ma e le mafaitaulia lalolagi ua ou foafoaina; … ma na ou foafoaina ia lalolagi e ala atu i le Atalii, o lou Atalii lea e Toatasi na Fanaua” (Mose 1:33).

O le tusi a Mose ua faamanino mai ai le faia a Keriso i le Tama i le muai olaga ma toe faamautuina ai le malamalamaaga o le Perofeta i le mana maoae o le amiotonu. O se tasi o lesona aupito matagofie o lesona uma faaaposetolo na oo mai ia Iosefa Samia i lenei faaaliga o le faamautuina lea o le alofa o le Atua. Na matuai ese lava mai le faatusatusaga saua, le faamagaloina, ma le faamasinoga na talitonu i ai le toatele e uiga i le Atua; ua faaalia mai e le tusi a Mose se Atua e le uma lona agalelei. Na vaai Enoka i le “Atua o le lagi … [ua] tutulu” (Mose 7:28) mo i latou o e o le a le taliaina o Ia. I lona fia iloa pe na mafai faapefea lea tulaga, na tuuina mai ai ia Enoka se tali na i ai se lagona masani faaletusipaia: “[Sa] ou poloaiina foi i latou, ia latou fealofani, ma e ao ina latou filifilia au, lo latou Tama. … O lea, pe le tatau ea ina laue le lagi i lo latou iloa o le a puapuagatia i latou ia? (Mose 7:33, 37; tagai foi Teuteronome 6:5; Levitiko 19:18; Mataio 22:37–39).

E ala mai i le faaliliuga o le tusi a Mose, ua atili ai ona masani le Perofeta i le mana togiola ma le mana faaola o le Faaola. E pei ona fetalai mai le Alii, na foafoaina lenei lalolagi “ai le upu a lou mana” (Mose 1:32) mo le faamoemoega ina ia faataunuuina “le faaofuina o le tagata i le tino ola pea ma le ola faavavau” (Mose 1:39). E tele ni tausaga na muamua atu na aoaoina ai e le Faaola ia Toma ma le Toasefululua e faapea “O au nei le ala, ma le upu moni ma le ola: e le alu atu lava se tasi i le Tama, pe a le ui mai ia te au” (Ioane 14:6), na Ia faaali atu foi ia Mose e faapea “o le ata lenei o le faaolataga mo tagata uma, e ala atu i le toto o lou Atalii e Toatasi na Fanaua, o Le o le a afio mai i le vaeluaga o taimi” (Mose 6:62).

O le Uluai Faaaliga i le vao, o le faaliliuga o le Tusi a Mamona, o le toe iloiloina o le Tusi Paia, o le faaaliga i le tusi a Mose, ma le faaliliuga o le tusi a Aperaamo, ua faataatia ai le faavae autu o le Ekalesia, o se vaega tele lava na ala mai i le vave o le faalauteleina o le malamalama ma le molimau o le Perofeta o Iosefa Samita e uiga ia Iesu Keriso.

O faaaliga na tuuina atu ia te ia ma tuufaatasia i le Mataupu Faavae ma Feagaiga o loo i ai se oa tele o le malamalama e uiga i le Faaola. E mafai e se tagata ona sailiili i le tele o autu ma mau e faatatau i autu e ala i le Taiala i Autu ma le Taiala i Mau e faatatau ia Iesu Keriso, ae le malamalama ai lava i le loloto o faamatalaga e uiga i le Faaola lea na aumaia e le Perofeta o Iosefa Samita i le lalolagi. Ou te faafetai i [lou] iloa o Iesu sa “i ai i le amataga faatasi ma le Tama” (MFF 93:21). Ou te faafetai ina ua ou iloa na “puapuagatia [o Ia] i mea uma mo [au], ina ia [ou] le puapuagatia pe afai [ou] te salamo” (MFF 19:16).

Ae ou te faafetai foi mo se isi mea e uiga i le galuega a le Faaola ua faapea ona ootia ai lava lo’u agaga. O le suesueina o folafolaga a Malaki, o le asiasiga muamua a Moronae ia Iosefa, o fetalaiga a le Faaola ia sa Nifae, ma le asiasiga a Elia i le Malumalu o Katelani, ua ou iloa ai e alofa le Atua i Lana fanau ma ua ia saunia se ala mo i latou taitoatasi e toe foi atu ai ia te Ia. E leai se isi aoaoga faavae ua ou iloa e sili ona tauamiotonuina, leai se aoaoga e sili atu ona aumaia ai le faamoemoe nai lo le faaolaina o e ua maliliu. Ou te matuai faafetai lava mo faaaliga ua aoaoina ai au o le Togiola a le Faaola e oo atu lava ia i latou o e na soifua, alofaina, auauna, ma faamoemoe mo se aso e sili ona lelei, ae peitai e lei faalogo lava ia Iesu pe maua foi le avanoa e taliaina ai Lana talalelei. O lenei lava malamalama e tasi ua lava lea ou te liliu mai ai i le talalelei pe afai e leai lava se isi mea ou te iloaina. O i, ia te au lava ia, o le molimau tupito lea e uiga ia Iesu Keriso ma Lana taulaga togiola.

O le a se faaupuga e mafai ona faia e uiga i le mana faaola le mafaatusalia o Keriso? O le mea na aoaoina e Iosefa Samita i le Vao Paia e uiga i le faatoilaloina e le mana amiotonu o tiapolo ua faaataata mai ai le vaaiga faaiu. E pei ona faaali mai e le Alii:

“O au, ina ua uma ona faia ma faataunuuina le finagalo o le ona au nei, o le Tama lea, e uiga ia te au—na faia lenei mea ina ia ou faatoilaloina mea uma ia te au—

“O i ai pea le mana uma, e oo i le faaumatiaga o Satani ma ana galuega i le iuga o le lalolagi, le aso tele mulimuli o le faamasinoga” (MFF 19:2–3).

O a tatou lava molimau e uiga i le Faaola ua mamanuina i le molimau ma aoaoga a le Perofeta o Iosefa Samita. E leitioa lava a aoao mai le Perofeta e faapea “o mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, na maliu o Ia, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”⁶

O le molimau faaaposetolo a Iosefa Samita i le moni e faavavau o le Toetu o Iesu Keriso, faapea foi ma lona malamalama i le mana togiola ma le mana faaola o le Faaola, e sili atu ona vaaia i le molimau matagofie, mamana ma le manino a le Perofeta lava ia:

“O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!

“Aua na ma vaaia o ia, i le itu taumatau lava o le Atua; na ma faalogoina foi le siufofoga o molimau mai o ia lava lea o le Toatasi na Fanaua e le Tama—

“E mai ia te ia, ma ui mai ia te ia, ma o ia, na foafoaina ai lalolagi uma, o e nonofo ai foi o atalii ma afafine na fanaua e le Atua” (MFF 76:22–24).

Ou te matuai faafetai tele mo le valaauga faaaposetolo o Iosefa Samita.