O le autu o le Mutuale i le tausaga lenei o loo tau mai ai ia i tatou le auala e tatau ai ona avea i tatou ma faaaoao i le lalolagi.
12 Aua nei inoino se tasi i lou taulealea, a ia fai oe ma faaaoao i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia.
Aua Nei Inoino Se Tasi i Lou Taulealea
Na tau atu e Paulo ia Timoteo e le afaina lona laitiiti tele pe a oo mai i tulaga o le ola ai i le talalelei ma le auauna ai i le Ekalesia. E toatele tagata talavou na latou maua ni aafiaga mamana faaleagaga. Sue ia mau nei ma faitau i ai e uiga i nisi o i latou ia: 1 Samuelu 17:12–49 (Tavita), 2 Nifae 2:4 (Iakopo), Mamona 1:15 (Mamona), ma le Talafaasolopito—Iosefa Samita 2:7–20 (Iosefa Samita).
E faapefea ona e faaali atu lou tuuto i le talalelei i lenei taimi o lou olaga? Tusi e uiga i ai i lau api o talaaga.
Faataitaiga
Ata
President Thomas S. Monson
“E le tatau ona tatou faatalitali i se mala, i se mea matautia e tupu mai i le lalolagi o tatou ola ai, po o se valaaulia faapitoa e avea ai ma faaaoao—o le avea lea ma faataitaiga e mulimuli ai. Ua i o tatou luma o tatou avanoa ma ua i ai i le taimi nei. Peitai e mafai ona mou ese atu. E mafai ona maua i o tatou lava aiga ma mea tatou te faia i o tatou olaga i aso taitasi. Ua uma ona faasino mai e lo tatou Alii ma lo tatou Matai le ala: ‘Sa femaliuai o [Ia] ma agalelei.’ (Galuega 10:38.) Sa avea moni o Ia ma faaaoao e mulimuli ai—o se faaaoao o e ua faatuatua.
“O faapena ea i tatou?”
Peresitene Thomas S. Monson, “O Se Faaaoao o e Ua Faatuatua,” Liahona, Ian. 1993, 122.
Upu
Tatou te faaalia le tele o lo tatou loto pulea pe a tatou pulea a tatou upu (tagai Iakopo 3:2). Nai lo le upu leagaina o isi, o a tatou upu e tatau ona faagaeetia (tagai Efeso 4:29; MFF 108:7). Ina ia faaleleia atili lenei vaega, mo se faataitaiga, atonu o le a e tusia i lalo ni sini faapitoa ina ia tuuina atu se faamalo, tautala atu ma le agalelei i tagata o le aiga, faaaoga se leo ma ni faaupuga sili atu ona logolelei, ma aloese mai le palauvale ma gagana masoa.
Talanoaga
O le upu Eleni o lona uiga o le amio po o uiga faaalia.
Alofafua
Ata
Elder Joseph B. Wirthlin
“E ao ina tatou lulu i totonu o o tatou lava loto le fatu o le alofa, o le alofa mama lea o Keriso. O Ia o le faataitaiga sili o le alofa. O lona soifuaga atoatoa, aemaise lava lana taulaga togiola, o se lesona o le alofafua. O Ana galuega uma lava na faaalia ai le alofa moni, e le faatuaoia mo tagata uma ma mo i tatou taitoatasi. O lana faataitaiga ua aoaoina ai i tatou o le uiga o le alofafua, o le tuu ma le naunautai ma le fiafia mea tatou te mananao ai, mo le lelei o isi. Ou te talitonu o lo tatou alualu i luma i le faaeaga ma le ola e faavavau, e faalagolago i le lelei tatou te aoaoina ma ola ai i le mataupu o le alofa.”
Elder Joseph B. Wirthlin o le Korama a Aposetolo e Toasefululua, “O Fatu o le Faafouina,” Liahona, Iulai 1989, 9.
Faatuatua
Ina ia avea ma se faaaoao i le faatuatua, ia mulimuli i le aoaoga a le Aposetolo o Iakopo: “Ou te faaali foi ia te oe lo’u faatuatua i a’u galuega” (Iakopo 2:18).
Mama A’ia’i
Faitau upu o le viiga “Faapaia Mai Au” (Viiga, nu. 70), ma mafaufau loloto i le uiga o le avea ma se faaaoao o le mama a’ia’i.Mai le Faatonu: O lenei itulau ua na o se amataga mo au lava suesuega patino, ae le o se faamalamalamaga auiliili o fuaiupu o mau ua filifilia.