Aua Nei Galo o Oe o se Mamona

Soo se taimi tatou te sese ai, soo se taimi e itiiti ai mea tatou te faia nai lo mea e tatau ona tatou faia, i se ala moni lava, tatou te faagalo ai tina,” o le saunoaga lea a Peresitene Thomas S. Monson. Na ia faaopoopo mai, “E liliu mai tama mai le leaga ma faamatuu atu i o latou natura sili atu ona lelei pe a manatuaina tina.”¹

O le savali a Peresitene Monson ua avea lava ma malosiaga ia te au, na matua malosi lava ma o le taimi muamua na ou faitau ai i lana saunoaga, na ou manatua ai lou tina ma le fautuaga poto na ia tuuina mai ia te au i tausaga ua mavae, ao lei leva lena ona ou auai i le Ekalesia.

Sa avea lo’u tina ma se tagata o se isi ekalesia Kerisiano, ae sa agalelei lava o ia i faifeautalai o e na aoaoina au i le talalelei. O le taimi lava na ou filifili ai o le a avea au ma se tagata o le Au Paia o Aso e Gata Ai, sa ia lagolagoina au i taimi uma.

Na sologa lelei lava mea uma i lou olaga fou o se tagata o le Ekalesia, seia oo ina ou auai i le faamamaluina o le Aso o le Au Tusitala i lou atunuu moni o Peru. I se pati na ou auai atu i ai, na faatumulia le ea i talanoaga ma upu faamalo. Ona sosoo ai lea ma faamanuia. A o faateleina le toatele o le pati, na faapena foi ona faateleina le faaosoosoga ina ia ou inu pia faatasi ma au uo.

O le suiga lea e faia e tagata liliu mai i le Ekalesia pe a latou taliaina le talalelei o lona uiga masani lava o le tatau lea ona latou faia ni uo fou. I nisi tulaga, e pei ona ou aoaoina, o uo na i ai muamua e mafai ona avea ma meafaigaluega a le fili e faaosoosoina i tatou e soli poloaiga ma toe foi i auala tuai.

Ina ua ofo mai e la’u soa faigaluega ia te au se ipu pia, na ou tago i ai ma inu, ma inuinu ai lava. Ina ua uma le pati, na faasalaina au e lo’u mafaufau. Na ou toilalo. O le a se tala a lo’u tina o le a fai mai?

Ina ua ou taunuu atu i le fale, na ou alu filemu i totonu ma ou faasasao loa ou te moe. Na leai se tala a lou tina na fai mai, ae na ou lagona le maasiasi ma filifili ai loa ou te le toe alu i le lotu. O se vaiaso mulimuli ane, a o ma saofafai i le laulau ma ma aai i le aoauli, sa tilotilo sao mai o ia ia te au ma fai mai, “Atalii, ia aua lava nei galo o oe o se Mamona.”

Pe a ou alu ma sau mai le galuega, ou te ui atu i la’u uila i luma o le falelotu o le Ekalesia. Soo se taimi lava ou te ui atu ai, e faalavelave mai lava lou iloa o le sao ma le sese. I se tasi afiafi na tonu ai loa o le a ou le toe ola i lo’u tausalaina. Na faatu la’u uila i luma tonu o le ofisa o le peresitene o le paranesi, ma ou alu atu i totonu, ma talosagaina se faatalanoaga.

Na ou faamatalaina i le peresitene o le paranesi le mea na ou faia ma talosaga atu mo se faamagaloga, ina ua uma lea, ona ia tuuina mai lea o ni fautuaga ia te au. Mai lava i lena taimi, ou te lei toe solia lava le Upu o le Poto.

Ua silia ma le 20 tausaga talu ona maliu lou tina, ae o loo ou taumafai lava e manatua le mea na ia tau mai ia aua nei ou faagaloina. O au o se tagata o le Ekalesia a Iesu Keriso o le Au Paia o Aso e Gata Ai.