Sailia o se Viiga e Sili ona ou Fiafia i Ai

Na lapataia e lo matou peresitene o le misiona ia faifeautalai i le Misiona a Ghana Accra ina ia “tumau i le taulai [atu i le galuega faafaifeautalai].” Na lauiloa o ia i le faaaogaina o lenei fasifuaitau. I se tasi o a matou konafesi faalesone, na ia fautuaina ai ni auala e mafai ai ona matou faia lenei mea, ma o se vaega autu i lana lisi o le i ai lea o se viiga e sili ona fiafia i ai.

Na ia tauina mai ia i matou, ia filifili se viiga e sili ona matou fiafia i ai, tauloto, ma usu i taimi e tofotofoina ai i matou pe faanoanoa ai. Na ou faalogoina pea le iu leo o lenei saunoaga i lou mafaufau i le aso atoa.

Sa ou misia lou aiga. Na leai se tasi o lou aiga na tusi lata mai nei ia te au, ma na ou lagona ai lava le faanoanoa. Sa ou tau le taulai atu i le talaiga. O le taimi lenei na manaomia ai lou filifilia o se viiga e siitia ai lou agaga. Sa ou masani i le tele o viiga i la tatou tusipese lanumeamata, ae o le fea le viiga e sili ona ou fiafia i ai?

O lena afiafi, na ou aumaia ai se tusipese tuai ma sue i ona itulau lautetele, i le sailiga o se viiga na i ai sona uiga faamafanafana ia te au. Na faafuasei ona ou maua se manatu. Na asiasi mai Elder Sheldon F. Child o le Au Fitugafulu, a o avea lena ma Peresitene o le Eria a Aferika i Sisifo, i la matou vaega i le nofoaga autu e aoao ai faifeautalai ma saunoa mai e uiga i le Togiola. Na faaiu lana saunoaga, “A na malamalama uma outou faifeautalai talavou i le Togiola a lo tatou Alii o Iesu Keriso, semanu e le manaomia ni tulafono o le misiona.”

O le ituaiga viiga lena na ou manaomia. Sa ou le toe faanenefu. Afai e i ai sau viiga e uiga i le Togiola, o le a ou lagona le alofa o lou Faaola, ma faamafanafanaina, ma tumau le taulai atu i le mea ua finagalo o Ia ou te faia.

Na iu ina ou filifilia le viiga numera 73, “Ua Ou Iloa Lo’u Faaola.”

O le aso, ou te faafetai ai lava i lou peresitene o le misiona mo lana fautuaga poto. O lenei ua i ai lau viiga e sili ona ou fiafia i ai e taulotoina, lea ou te mafaufau loloto i ai i taimi uma ma manatua e usuina i taimi faanoanoa, tofotofoga, ma faigata. “Ua ou iloa lo’u Faaola. Ua soifua Ia i luga. … Tu e faamanuia mai.”