E Mafai Ea Ona Ou Faagalo i Lo’u Olaga ua Tuanai?

O se uiga mautinoa ma le fiafia e taua tele mo tagata e galulue i faafetauaiga, e pei ona ou faia. Ae o ni nai tausaga ua mavae, na ou lagonaina ai le lotovaivai ma na ou le manao e talanoa i se tagata. Na matuai tonu lava lenei mea i se tasi o aoauli.

Masalo na iloa lava i ou foliga le leai o sou agaga fiafia ina ua fesili mai se tasi o au soa faigaluega, o le na masani lava ona ma talanoa, ma fesilisili mai pe o a mai au. Na ou faamatala atu i ai, i le tuanai ai o le ono tausaga o lau faaipoipoga, o lenei ua ma tetea ma lou toalua. O le masina lenei na atoa i ai le ono o tausaga talu ona ma tetea, ma o lenei ua tutusa le umi ua ma tetea ai ma le umi na ou faaipoipo ai. Sa le toafilemu lou mafaufau ma lou loto, ma na faatumulia lou agaga i le tiga ma le faanoanoa. Na ou iloaina ua tele aafiaga o lau fanau ua ou misia, ma o le iloaina o lena mea na avea ma faasalaga tumau ia te au. Na tumu au i lagona o le tuua toatasi, ma na ou vaaia le leai o se tali—po o se faamoemoe foi—i le lumanai. Na ou fai atu i lau soa faigaluega, o lenei mea o le totogi lea o au mea sese.

Ona tali mai lea o lau uo, o se tagata o se isi ekalesia Kerisiano. “O le a le totogi o loo e taua?” na ia fesili mai ai. “Ua totogi e Iesu Keriso le tau, pe afai ua e salamo faamaoni i au agasala. Pe e te le manatua foi le mafuaaga na afio mai ai o Ia i le lalolagi?”

Na faateia au i lana tali, ma o ana upu na ou le magagana ai. Na tatagi pea i lou mafaufau i lena aoauli atoa. Ioe—e ui lava ina ou nofo ma taunuuga o au mea sese, ae na totogi e Iesu Keriso le tau. Aisea na ou le iloaina ai lenei mea? Na ou iloa le aoaoga faavae, ma na ou iloaina e moni. O le iloaina na i ai i le Togiola le mana i lou olaga na faatumulia ai au i lagona o le toafilemu ma le mafanafana lea ou te manatuaina lava e oo mai i le aso.

Ua mavae le tele o tausaga talu ona tupu lenei aafiaga i le galuega. Ae ua ou iloaina o nisi o taunuuga o a tatou amioga e tumau lava ma i tatou i o tatou olaga atoa. O le tele lava o ia taunuuga e aafia ai olaga o i latou e pele ia i tatou. Sa le faigofie lagona o le tuua toatasi, ae na fesoasoani ia te au ou te iloa ai ou vaivaiga ma ou ole atu ai mo se faamagaloga mai lou Tama Faalelagi ma tagata o e na sili ona aafia—o lau fanau ma lo latou tina.

E ese mai le lagona na ou lagonaina i lena aoauli, ua mafai nei ona ou faapea atu ua ou maua nei le toafilemu ma le faamoemoe. Ua ou iloa na totogi e Iesu Keriso le tau, ma ou te le masalosalo i lenei mea aua ua ou salamo. Na ia lagolagoina au i nei tausaga o tofotofoga. E ui lava o loo faaauau pea ou tofotofoga, ae ua ou iloa, a ou salamo, liliu atu i le Alii, ma tausi poloaiga, o le a faaauau pea ona Ia lagolagoina au.