Suia o A’u Sini

I le sauniga faamanatuga i se tasi Aso Sa, na ou faalogologo ai ma le totoa i se failauga o talanoa mai e uiga i le inisitituti. Na ia faasoa mai le saunoaga a Elder L. Tom Perry o le Korama a Aposetolo e Toasefululua, e faapea, “O le [Inisitiuti] ua faatamaoaigaina ai lou olaga, ma ou te iloa o le a faapena foi ona faia mo oe. O le a tuuina ai se talita o le puipuiga e siomia ai oe ina ia e saoloto ai mai faaosoosoga ma tofotofoga o le lalolagi.”¹ O le taimi lena na ou iloaina ai o le moni o le saunoaga a Elder Perry ua faaali mai ia lava ia te au. Ou te matuai faafetai ona o faamanuiaga na oo mai ia te au ona sa ou auai i le inisitituti.

E lei umi, ae ou amataina se vasega inisitituti i aoaoga a Isaia. E oo mai i le aso, o loo tumau pea ona avea ma vasega e aupito sili ona suia ai olaga ua ou aveina. O lena semesa na avea o se taimi na sili ona ou le mautonu ai; sa le ogatasi au sini uma ma mea na tatau ona faamuamua ma mataupu faavae o le talalelei. Ae ui i lea, na ou auai atu e le aunoa i le inisitituti ma auai i le tele o talanoaga faafesagai ma le faiaoga o le inisitituti e uiga i aoaoga faavae o le Ekalesia. Mulimuli ane, na suia ou manatu, ma na faifaimalie lava ma le faaeteete ona suia au sini ina ia fetaui ma le fuafuaga a le Alii mo au.

A na ou le faalogo lava i le saunoaga sii a Elder Perry i le sauniga faamanatuga i lena Aso Sa, ou te le iloaina lelei le auala na avea ai nei sini fou ma faamanuiaga ia te au. Na matauina le lelei teisi o lou olaga atoa ina ua ou auai i le inisitituti. Na sili atu ona ou mataala i le Agaga ma na seasea ona ou gauai i faaosoosoga. Na faaleleia atili ou uiga ma lau vaaiga mamao ona o lou auai [i le inisitituti].