Manatu mo Afiafi Faaleaiga

O nei fautuaga faaleaoaoga e mafai ona faaaoga i potuaoga faapea foi i le aiga. E mafai ona e fetuunaia nei manatu i lou aiga po o le vasega.

“Faatamaoaigaina o Au Suesuega o le Mataupu Faavae ma Feagaiga,” i. 10: Ia talanoaina ma tamaiti matutua atu auala eseese e o atu ai i le Aoga Sa ua saunia lelei e aoao ma auai i talanoaga. Fai atu ia i latou e faatu se sini faapitoa ina ia saunia lelei mo le Aoga Sa i lenei tausaga, pe faatu se sini o se aiga e galulue faatasi i ai. Fesoasoani i tamaiti e laiti ifo ia faatutu ni sini e fetaui ma o latou gafatia, e pei o le aumaia o tusitusiga paia i le vasega, vave i le vasega, tatalo mo le faiaoga, po o le sii i luga o o latou lima. Ia talanoaina auala e mafai ona fesoasoani atu ai le tasi i le isi ina ia ausia au sini.

“O Se Faaaoao o e ua Faatuatua,” i. 36: Tuu atu i tagata o le aiga e tusi ni auala na latou vaai ai i isi o avea “ma se faaaoao o e ua faatuatua.” Ia fetufaai atu lau lisi, ma talanoa ni auala e mafai ai e tagata taitoatasi o le aiga ona avea ma se faataitaiga lelei. Faatutu ni sini ina ia faia faapea.

“O Le Faaaliga Taleni,” i. U8: Faitau le tusiga, ma faailoa atu po o le a le taleni na iloa e Marie o loo ia te ia. Ina ia fesoasoani ia iloa e tagata o le aiga ia a latou taleni o loo natia, tuu atu i tagata taitoatasi e faamatala mai se taleni a le tagata o loo i lona itu tauagavale. Afai e lava le taimi, e mafai ona e faaauauina lenei faiga i nisi o taimi. Faaiu i le faitauina o le Moronae 7:47 ma le upusii o loo sosoo ane ai mai ia Elder L. Tom Perry.

“O Le Vaiaso a Peni,” i. U14: Faitau le tusiga, ma matau le lototele na manaomia e Peni i le taimi na fai atu ai i lona tamamatua e aua nei o e faatau i le Aso Sa. Ia talanoaina pe mafai faapefea e tagata o le aiga ona maua le lototoa pe a taumafai e tausi poloaiga. Ia faatino nisi o tulaga e manaomia ai le lototele e filifili le mea tonu.