Taem Laen blong Buk blong Momon

Ol Man blong Jared

Grup ia i livim Taoa blong Babel mo i kasem ol Amerika samples long ol yia 2200 B.K. Oli bin kam plante kasem samples long ol yia 600 B.K., taem ol wo oli bin prapa spolem evriwan be Koriantuma nomo i stap. (Luk long Ita 1–15.

Ol Man blong Nifae

Grup blong Lihae i bin aot long Jerusalem samples long ol yia 600 B.K. mo i kam kasem ol Amerika. Sloslo laen blong hem i bin seraot. Afta we Lihae i ded, olgeta we oli stret mo gud oli bin folem boe blong hem, Nifae, i go long Not. Oli kam blong save olgeta olsem ol man blong Nifae. (Luk long 1 Nifae 1–22; 2 Nifae 1–5.)

Ol Man blong Leman

Afta long ded blong Lihae, olgeta we oli nogud oli bin stap wetem boe blong hem, Leman. Mo oli kam blong save olgeta olsem ol man blong Leman. (Luk long 2 Nifae 5.)

Ol Man blong Myulek

Myulek, wan boe blong king Sedekaea, i bin lidim wan grup stat long Jerusalem samples long yia 587 B.K. mo i bin kam long ol Amerika. Oli bin faenem Koriantuma. (Luk long Omnae 1:14–21.)

Mosaea₁

Samples kolosap long yia 225 B.K. ol man blong Nifae oli kam ol nogud man, mekem se Mosaea₁ i bin lidim wan grup blong ol man blong Nifae we oli stret mo gud oli go long Sarahemla mo oli joenem ol man blong Myulek. Oli bin singaotem olgeta ol man blong Nifae. Mosaea₁ i bin kam king blong olgeta we i stret mo gud. King Benjamin i boe blong hem. (Luk long Omnae 1:12–23.)

Senif

Samples long yia 200 B.K. Senif, wan long ol man blong Nifae, i bin tekem wan grup i go Saot blong karembak ol graon blong ol man blong Nifae. Taem Senif mo grup blong hem i kasem ples, ol man blong Leman i mekem olgeta oli prisena. Afta long hemia, King Mosaea₂ i bin sendem Amon blong go faenem grup, mo Amon i bin mekem King Limhae i jenisim laef blong hem. (Luk long Mosaea 7; 9–22.)

Alma₁

Alma₁ i bon long medel blong ol pipol blong Senif, mo hem i kam wan long ol nogud pris blong King Noa. Oli bin kilimded profet Abinadae afta we hem i bin askem King Noa blong sakem sin blong hem. Be Alma₁ i bin bilivim ol tijing blong Abinadae mo i bin ronwe wetem wan grup blong ol man we oli bin biliv, mo afta, i bin joenem ol man blong Nifae. (Luk long Mosaea 11; 17–18; 23–24.)

Alma₂ mo Ol Boe blong Mosaea₂

Taem oli bin ol yang man, Alma₂ mo ol boe blong King Mosaea₂ oli bin wok blong spolem gud Jos. Wan enjel i bin tok strong long olgeta, mo oli bin sakem sin blong olgeta. Alma₂ i bin kam wan lida we i stret mo gud. (Luk long Mosaea 27–29.) Ol boe blong Mosaea₂ oli kam ol misinari long ol man blong Leman. Afta long plante sakses, olgeta mo Alma₂ oli bin joen wan bakegen mo oli bin glad. (Luk long Alma 17–26.)

Ol Stilman blong Grup blong Gadianton

Paoa blong sikret grup blong kilimded man i bin strong gud taem sosaeti i nogud; mo hem i no gat paoa nating taem sosaeti i bin stret mo gud. Taem i kasem samples long ol yia 350 A.K. oli bin putum sefti blong evri pipol long denja. (Luk long Hileman 2; 6; 4 Nifae 1:42–46.)

Jisas Kraes

Afta long Laef Bakegen long Ded blong Hem long Jerusalem, Sevya i bin kamaot long ol Amerika, i bin tijim ol pipol, i bin tijim gospel blong Hem, mo i bin oganaesem Jos blong Hem. Blong 200 yia folem visit blong hem, ol pipol oli bin stap laef long pis. (Luk long 3 Nifae 11–28.)

Ol Man blong Nifae Oli Lus Evriwan

Sloslo, rabis fasin i kambak, ol wo oli gohed, mo ol man blong Nifae oli bin lus evriwan long faet. Wan man nomo i laef, Moronae, mo hem i bin kipim histri blong ol man blong Nifae, mo afta, i bin berem histri ia bifo hem i ded. (Luk long 4 Nifae 1:24–28; Momon 8:1–8; Moronae 10.)