Buk blong Momon I Bin Toktok long Mi

Taem yangfala pikinini blong mitufala, Amanda, i bin gat tu yia, oli faenem se hem i gat lukemia (kansa blong blad). Kes blong hem i had, mo kansa blong hem i no finis afta long kimo tritmen (tritmen we oli yusum ol eksre blong kilim sik). Afta long hemia, oli mas operetem hem mo oli mas karemaot mit we i stap insaed long bun blong wan nara man blong givim long hem.

Taem hasban blong mi mo tufala boe oli bin stap hom long Yuta, mi bin stap wetem Amanda long wan nara stet, stat long Septemba i go kasem fas pat blong Jenuware. Mifala i no bin selebretem Krismas tugeta, be wetem en blong tritmen, mitufala i bin gobak hom.

Long fas visit blong mifala i go long hospital blong mekem jekap afta we mitufala i gobak hom, ol dokta we oli faenem bakegen lukemia ia long blad blong Amanda. Operesen i no bin wok. Taem mi harem nius ia, mi filim olsem se mi stap foldaon tru long floa. Famle blong mifala i bin gotru long plante wari, wok, mifala i seperet mo plante hadtaem. Naoia, bae mifala i lusum gel nomo.

Mi gobak hom long aftenun ia blong go luk tufala boe blong mi. Taem mifala i bin stap wet long hasban blong mi i kambak hom afta wok, mifala i tekem kopi blong mifala blong Buk blong Momon mo stat blong rid. Mifala i bin stap long 2 Nifae 9. Taem mifala i bin stap rid, ol toktok ia oli toktok long mi:

“Mi talem long yufala ol samting ia blong mekem se yufala i save glad mo leftemap ol hed blong yufala blong oltaem, from ol blesing we bae Lod God i givim long ol pikinini blong yufala.

“From mi save se yufala i bin stadi plante, plante long yufala, blong save long saed blong ol samting we bae i kam; from samting ia mi save se yufala i save we bae bodi blong mit mo bun blong yumi i mas kam roten mo ded; be, long ol bodi blong yumi bae yumi luk God. …

“From olsem we ded i bin kam long evri man, blong mekem plan we i fulap wetem sore blong bigfala Krieta i hapen, i mas nid i stap wan paoa blong laef bakegen. …

“O hamas nao gudfala fasin blong God blong yumi, we i mekem rere wan rod blong ronwe blong yumi aot long paoa blong rabis anamol ia; yes, anamol ia, ded. …

“Mo bae hem i kam long wol blong hem i save sevem evri man sapos oli lisin long voes blong hem; from luk, hem i harem nogud long ol soa blong bodi blong evri man, yes, ol soa blong bodi blong evri samting we i stap laef, ol man tugeta wetem ol woman, mo ol pikinini, we oli blong famle blong Adam.

“Mo hem i harem nogud long samting ia blong mekem se laef bakegen i save kam long evri man, blong olgeta evriwan i save stanap long fored blong hem long bigfala mo jajmen dei” (2 Nifae 9:3–4, 6, 10, 21–22).

Taem mi ridim ol toktok ia, Tabu Spirit i bin fulumap rum. Mi bin filim se Papa blong yumi long Heven i bin save nius we mi bin kasem long dei ia. Mi bin filim se ol toktok we profet Jekob i bin raetem moa long 2000 yia i pas, oli bin raetem blong mi from dei ia mo i kam stret long Sevya. Hem i bin save se mi no bin filim hapi mo mi harem nogud afta we mi harem se bae gel blong mifala bae i ded. Mo Hem i bin stap ia blong leftemap tingting blong famle blong mifala, wetem promes blong hem se Hem i bin mekem wan wei i rere blong wan dei, tru long paoa blong Laef Bakegen long Ded, bae “long ol bodi blong [mifala] bae [mifala i] luk God.”

Amanda i bin laef blong wan moa yia, be mi neva bin fogetem dei ia taem ol toktok blong Buk blong Momon i bin toktok long mi long taem blong nid blong mi, mo Lod i bin givim mi hop, kamfot, mo i mekem mi andastanem plan blong Hem.