Sapos Yumi No Stap Gat Tu Tingting

Insaed long Buk blong Momon, yumi stap ridim abaot ol yang man we oli givim eksampol, mo oli no bin fraet, oli gat strong paoa long tingting, mo oli bin strong long bodi. “Yes, oli bin ol man we oli ones mo oli tru, from we ol papa mo mama blong olgeta i bin tijim olgeta blong holem ol komanmen blong God mo blong wokbaot stret long fored blong hem” (Alma 53:21). Olgeta fetful yang man ia oli bin givim ona long mama blong olgeta—long eksampol blong olgeta mo long tija blong olgeta.

Ol mama blong ol soldia blong Hileman oli bin stap laef long wan taem we i no semmak long hemia blong yumi. Situesen blong olgeta i had mo i fulap long denja, mo oli bin askem ol yut blong oli difendem fridom blong bodi mo spirit blong olgeta. Tedei, yumi stap long wan wol we yumi stap “Olgeta ya we yumi stap faet agens long olgeta long laef blong yumi, oli no man. Yumi stap faet agens long ol devel we oli stap olbaot long wol ya. Hemia ol lida blong olgeta, mo olgeta we oli gat paoa, mo ol jif blong olgeta we oli stamba blong ol fasin blong tudak blong wol ya” (Efesas 6:12).

Ol taem blong jalenj oli stap singaot blong i mas gat ol strong papa mo mama mo gudfala eksampol we i stap tijim trutok we ol soldia blong Hileman oli bin save long hem: “tingting blong olgeta i strong fulwan, [se] God bae i sevem olgeta” (Alma 56:47). Blong stap tijim mo soem eksampol blong trutok ia tedei, i nidim blong yumi mas lukaotgud tu long hem. Be, yumi no nid blong fraet. Taem yumi save huia yumi, mo huia hem i God, mo yumi bin mekem ol kavenan wetem Hem, yumi—olsem ol mama blong ol soldia ia—bae i stap olsem wan bigfala paoa blong mekem gud.

I luk olsem se wanwan long ol 2060 soldia blong Hileman, mama blong olgeta i bin gat paoa long laef blong olgeta. Be ol mama ia oli no bin mekem samting olgetawan. Tugeta, wetem ol man mo woman we oli stret mo gud, ating ol mama ia oli bin joenem fet mo eksampol blong olgeta blong tijim paoa blong ol kavenan. Ol yang pipol blong taem ia oli bin andastanem kavenan ia we papa mo mama blong olgeta i bin mekem blong nomo go faet bakegen. Mo nomata i luk se bae i no posibol, wan Papa long Heven we i gat lav i bin openem wan wei blong ol papa mo mama ia oli kipim kavenan blong olgeta—mo blong oli holem taet fridom blong olgeta (luk long Alma 56:5–9). Yumi, semmak, yumi mas ona long ol kavenan blong yumi blong mekem se ol pikinini mo ol yut—ol pikinini blong yumiwan mo olgeta we oli stap insaed long ol wod, ol branj, ol ples raonabaot, mo ol komuniti—oli andastanem mo sapotem fasin blong kipim ol kavenan.

Taem yumi ona long ol kavenan blong yumi, Papa long Heven i mekem wan wei i rere long yumi. Long laef, yumi mas folemgud evriwan ol kavenan blong yumi. Eksampol, yumi save mekemgud blong stap prea, blong stap stadi long ol skripja, blong gat wan tempol rekomen we i laef, blong dresap gud, blong ona long Sabat dei. Taem yumi mekem olsem, ol pikinini blong yumi bae oli save mo talem: “Mifala i gat tingting we i strong fulwan [se] ol mama blong mifala i bin save” (Alma 56:48).

Ol Lata-dei Sent woman we oli stap luksave se paoa blong olgeta i kam long Atonmen blong Lod, oli no stap givap long ol taem we i had tumas mo ol taem we i strong tumas. Olsem ol woman we oli kipim kavenan, yumi mas kam ol top woman blong stap holemtaet, stap fidim, stap protektem ol pikinini mo ol yut, blong mekem se wan dei, bae yumi save talem abaot jeneresen ia we i stap kam antap: “Neva mi bin luk wan fasin blong no save fraet we i bigfala olsem” (Alma 56:45).

Juli B. Bek, Rilif Sosaeti jeneral presiden.