Profet Josef Smit

Buk blong Momon i wan spesel buk blong skripja mo i no gat wan narawan moa we i semmak. Nomata ol profet blong bifo oli bin raetem buk ia, hem i no kam long yumi long semfala wei we Baebol i kam long yumi. Baebol, oli bin raetemdaon long ol longfala pepa we oli rolem long taem blong Olfala Wol; mo oli raetem olsem ol seperet buk mo ol tija blong loa oli bin raetem kopi blong olgeta blong plante handred ia. Afta nomo long fo handred yia afta Jisas Kraes, oli bin putum tugeta ol seperet buk ia, mo mekem i kam wan buk nomo we yumi stap singaotem Tabu Baebol.

Be, Buk blong Momon, ol profet blong bifo oli bin raetemdaon olgeta long taem blong Niufala Wol, mo oli raetemdaon long ol pej we oli wokem long aean, mo wan profet—Momon (we i givim nem blong hem long taetol)—i bin raetemsot long namba faef handred yia A.K. mo mekem i kam wan rekod nomo we hem i bin raetemdaon long ol pej we oli wokem long gol. Boe blong hem, Moronae, i bin berem buk ia afta, mo i bin stap olsem kasem yia 1827, taem we Moronae, olsem wan man we i laef bakegen long ded, i bin givim buk ia long wan yangfala man we nem blong hem i Josef Smit.

Wanem i kam afta i stori blong olsem wanem Josef i bin kasem, transletem, mo pablisim histri ia, we naoia taetol blong hem i, Buk blong Momon: Wan Narafala Testeman blong Jisas Kraes. Sevya Hemwan i bin testifae se buk ia i tru (luk long D&C 17:6).

1. Long yia 1820, wan boe we i gat 14 yia, we nem blong hem, Josef Smit, i bin stap kolosap long Palmaera, Niu Yok. Nomata hem i yang, hem i bin wari long olsem wanem nao God i luk hem, mo hem i bin lus wetem fulap samting we ol defdefren Kristin relijin i mekem blong winim tingting blong ol man bitim ol narafala grup bakegen. Hem i bin gat strong tingting blong stadi long Baebol, nao Josef i bin mekem tingting blong i lukaotem waes tingting, mo hem i askem God, we “i stap givim long ol man long gladhat blong hem” (Jemes 1:5). Hem i bin go long ol bus blong ol tri kolosap long hom blong hem blong prea.

2. Taem Josef i bin nildaon mo prea, wan bigfala laet we i saen antap i kam daon, stret antap long hed blong hem. Insaed long laet ia, hem i bin luk tu Man. Papa we i stap long Heven i bin toktok mo talem, “Hem, Hem i Pikinini blong Mi we Mi Lavem Hem Tumas. Lisin gud long Hem!” Testemoni blong Josef Smit, 32667 852, pej 2. Lod i bin talem long Josef blong hem i no joenem eniwan long ol jos ia from se i no gat wan long olgeta i tru, be hem i bin promesem se ful Gospel, bae hem i kam blong save long hem samtaem long fiuja.¹

3. Tri yia i pas, mo long ol tri yia ia, Josef Smit i bin serem eksperiens blong hem wetem ol narafala man—mo oli bin mekem nogud long hem from hemia. Hem i talem se nomata we man i no laekem hem mo oli bin stap mekem nogud long hem from we hem i bin talem se hem i bin luk wan visen, yet, hemia i bin tru; mo … insaed long hat blong hem, hem i stap talem ol toktok ia: “From wanem yufala i tok agensem mi from we mi stap talem trutok? I tru, mi bin luk wan visen; mo huia mi blong mi stanap agensem God, o, from wanem wol i tingting blong mekem mi tanem baksaed long wanem we mi bin luk? From we mi bin luk wan visen; mi bin save hemia, mo mi bin save se God i bin save, mo mi no save tanem baksaed blong mi long hemia” (luk long Joseph Smith—History 1:25).

4. Long 21 Septemba 1823, Josef i bin stap prea taem laet i bin fulumap bedrum blong hem, mo wan enjel, we nem blong hem Moronae, i bin kamaot long hem. Moronae i bin talem long Josef abaot buk ia we ol profet blong bifo oli bin raetemdaon. Histri ia, we oli raetem long ol pej we oli wokem long gol, oli bin berem long wan hil we i stap kolosap. Josef i kasem toksave se bae hem i mas transletem histri ia.

5. Nao laswan, long 22 Septemba 1827, Josef i bin kasem buk ia, i tekemaot buk ia insaed long wan ston bokis we oli bin berem andanit long wan bigfala ston long wan hil kolosap long Palmaera, Niu Yok.

6. Olsem we i wan nomol praktis long ol rurol eria long taem ia, Josef Smit i no bin skul gud. Blong helpem hem wetem translesen, God i bin givim hem wan tul blong bifo blong transletem ol toktok, we oli singaotem Yurim mo Tumim. Hem i bin gat blesing tu blong gat help blong ol man we oli save raetem wanem we hem i talemaot taem hem i bin stap transletem buk ia. Long olgeta we oli bin stap raet blong hem, i gat waef blong hem, Emma; Matin Haris, wan gudfala fama; mo Oliva Kaodri, wan skultija. Ful wok blong translesen ia i bin finis long tri manis taem, afta we Oliva i bin stat blong stap raet blong hem.

   Emma i bin tokbaot se i olsem wanem blong wok olsem man blong raet blong Josef: “I no gat man i save talem ol toktok blong wanem i stap long buk ia, be nomo, sapos hem i kasem long God; from we taem mi bin stap raet blong Josef, bae hem i talem ol toktok long mi, aoa afta aoa; mo taem mifala i kambak afta long kakae, o afta we mitufala i stop smol taem, bae hem i statem stret long ples we mitufala i bin stop long hem, mo hem i no lukluk long buk o wet se bae mi ridim smol pat long hem.”²

   Josef i bin eksplenem mining blong taem ia we Buk blong Momon i kam. “Tru long paoa blong God, mi bin transletem Buk blong Momon aot long lanwis blong ol saen, we i wan save we i bin lus long wol ia; mo long taem ia, mi bin stap miwan, mi, wan yangfala we i no skul gud, blong faet, wetem wan niu revelesen, agensem waes tingting blong wol mo ol fulap save we i bin lus blong eit handred yia.”³

7. Long ol 18 manis we hem i bin gat buk ia, Josef i bin wan man ia nomo blong luk o holem buk ia. Trifala man—Oliva Kaodri, Deved Witma, mo Matin Haris—i bin testifae se enjel Moronae i bin soemaot ol pej we oli wokem long gol i go long olgeta tri, mo oli bin save se buk ia, “oli bin transletem tru long presen mo paoa blong God, from we voes blong Hem i bin talemaot long yumi.” Eit narafala man tu i bin testifae, se oli bin luk mo oli bin holem ol pej we oli wokem long gol.⁴

8. Long Ogis 1829, Josef i bin saenem wan kontrak wetem wan man blong pablisim ol buk, Egbet B. Grandin blong Palmaera, Niu Yok, blong hem i printim buk ia. Matin Haris i putum fam blong hem olsem sekiuriti blong pem mane blong printim buk, mo long 26 Maj 1830, Buk blong Momon i bin stap blong man i pem.

9. Long 6 Epril 1830, samples 60 pipol i bin kam tugeta long wan wud haos long Feyet, Niu Yok. Long ples ia, olsem we Lod Jisas Kraes i bin lidim hem, Josef Smit i bin oganaesem Jos blong Sevya, i bin putumbak Jos olsem we i bin stap bifo, wetem ol aposol mo ol profet we oli bin lidim, mo olgeta ia oli kasem raet blong toktok long bihaf blong God. Revelesen we i bin kam afta long Josef Smit i bin givim nem ia long Jos ia: Jos blong Jisas Kraes blong Ol Lata-dei Sent (luk long D&C 115:4).