Buk blong MomonKi Ston blong Relijin blong Yumi

Ol brata mo sista blong mi we mi laekem tumas. Tedei mi wantem blong tokbaot wan long ol presen we i moa impoten we oli givim long wol long taem tedei. Presen ia we mi stap tingting long hem, i moa impoten long eni niu kriesen we i kamaot long indastri o teknoloji. Hem i wan presen we valiu blong hem i moa bigwan long ol man bitim ol gudfala niu samting we oli faenem long eria blong helt. Hem i moa hevi long man bitim eni divelopmen long saed blong fasin blong travel long plen o travel i go long spes. Mi stap tokbaot presen we i Buk blong Momon, we i kam long ol man 156 yia i pas.

Presen ia, han blong Lod i bin mekem i rere ova long wan taem blong moa long wan taosen yia, mo afta Hem i bin haedem blong i stap gud mo oli no spolem blong jeneresen blong yumi i save yusum. Ating i no gat wan samting we i testifae klia moa long hamas buk blong skripja ia blong tedei i impoten bitim wanem we Lod Hemwan i talem abaot buk ia.

Tru long maot blong Hem, Hem i bin talem witnes blong Hem se buk ia (1) i tru (luk long D&C 17:6), (2) i tekem trutok mo toktok blong Hem (luk long D&C 19:26), (3) oli transletem wetem paoa we i kam long heven (luk long D&C 20:8), (4) i tekem ful gospel blong Jisas Kraes (luk long D&C 20:9; 42:12), (5) i kam tru long insperesen mo ol tijing blong ol enjel oli konfemem (luk long D&C 20:10), (6) i givim pruf se ol tabu skripja oli tru (luk long D&C 20:11), mo (7) olgeta we oli kasem buk ia wetem fet bae oli kasem laef we i no save finis (luk long D&C 20:14).

Wan seken strong testemoni long hamas Buk blong Momon i impoten i blong luk long wanem taem stret Lod i mekem se buk ia i kambak long ful taem ia blong Restoresen. Wan samting nomo we i bin kam fastaem, hem i Fas Visen. Long bigfala taem ia, Profet Josef Smit i bin lanem stret se God i olsem wanem, mo se God i gat wan wok blong hem i mekem. Buk blong Momon i kam afta long hemia.

Tingting long hemia, long wei ia se, hemia i minim wanem moa? Buk blong Momon i kam bifo we prishud i kambak. Oli bin pablisim sam dei bifo we Jos i bin oganaes. Olgeta Sent oli bin kasem Buk blong Momon blong oli ridim bifo oli bin kasem ol revelesen we i tokbaot ol bigfala doktrin olsem ol trifala digri blong glori, selestial mared, o wok blong olgeta dedman. Buk i kam bifo oli bin oganaesem ol kworom mo Jos. Yu no ting se hemia i stap talem wan samting abaot fasin we Lod i lukluk long tabu wok ia?

Taem yumi luksave olsem wanem Lod i stap filim abaot buk ia, bae i no mas wan sapraes long yumi se Hem i stap givim tu ol tabu woning long olsem wanem nao yumi kasem buk ia. Afta we Hem i talem se olgeta we oli kasem Buk blong Momon wetem fet, mo stap mekem ol stret mo gud wok bae oli kasem wan hat blong king blong glori we i no save finis (luk long D&C 20:14), nao Lod i stap talem woning ia se olgeta we oli mekem hat blong olgeta i strong mo oli no stap bilif, bae oli kasem wan panismen (luk long D&C 20:15).

Long 1829, Lod i bin givim woning long olgeta Sent se oli no mas pleiplei wetem ol tabu samting (luk long D&C 6:12). I tru we Buk blong Momon i wan tabu samting, mo yet, plante oli stap pleiplei wetem, o long nara toktok, oli no tingting hevi long hem, mo stap tekem olsem se i no wan impoten samting.

Long 1832, taem sam long ol fas misinari oli bin kambak long ples we oli go wok long hem, Lod i bin tok strong long olgeta from se oli no tekem Buk blong Momon i hevi. Olsem wan risal blong fasin ia, Hem i talem se tingting blong olgeta i kam tudak. Taem oli no tingting hevi long tabu buk ia i no mekem nomo se oli lusum laet we i stap long olgeta, be tu, i mekem se ful Jos i stap kasem panismen, wetem evri pikinini blong Saeon. Mo afta, Lod i talem se bambae oli stap anda long panismen ia kasem taem we oli sakem sin mo oli tingbaot niu kavenan, we i Buk blong Momon (luk long D&C 84:54–57).

Ating from we yumi gat Buk blong Momon wetem yumi blong ova long wan handred yia mo haf i mekem se i no impoten tumas long yumi tedei? Yumi stap tingbaot o no, niufala kavenan ia we i Buk blong Momon? Insaed long Baebol, yumi gat OlTesteman mo Niu Testeman. Toktok ia testeman hem i Inglis toktok blong wan toktok blong Gris we oli save transletem tu olsem kavenan. Yu ting se hemia nao wanem we Lod i minim taem Hem i bin singaotem Buk blong Momon se hem i “niu kavenan”? I tru, hem i wan nara testeman o witnes abaot Jisas. Hemia i wan long ol risen from wanem yumi bin ademap, i no longtaem i pas, ol toktok ia “Wan Nara Testeman blong Jisas Kraes” long taetol blong Buk blong Momon.

Sapos Lod i bin tok strong long olgeta Sent bifo from we oli stap tekem Buk blong Momon i nating nomo, bae yu ting se bae yumi no kasem wan panismen we i semmak sapos yumi mekem semmak? Lod Hemwan i testifae se buk ia i impoten long taem we i no save finis. Olsem wanem? Bae wan smol namba olsem yumi nomo bae i mekem se ful Jos i stap anda long panismen from we yumi stap pleiplei wetem ol samting we oli tabu? Bambae yumi talem wanem long Jajmen dei taem bae yumi stanap long fored blong Hem mo fesem ae blong Hem we i luk yumi mo askem sapos yumi stap long medel blong olgeta we oli talem se oli fogetem niu kavenan?

I gat tri bigfala risen from wanem ol Lata-dei Sent oli mas mekem stadi blong Buk blong Momon i kam olsem wan samting blong mekem long ful laef.

Faswan i we Buk blong Momon i ki ston blong relijin blong yumi. Hemia toktok blong Profet Josef Smit. Hem i testifae se “Buk blong Momon i moa stret long eni narafala buk long wol, mo i ki ston blong bilif long God blong yumi.”¹ Wan ki ston i ston we i stap long medel blong wan ak. Hem i holem evri nara ston i stap long ples blong olgeta, mo sapos yu karemaot, ak ia i foldaon.

I gat tri wei we Buk blong Momon i ki stron blong relijin blong yumi. Hem i ki ston long witnes blong yumi long Kraes. Hem i ki ston blong doktrin blong yumi. Hem i ki ston blong wan testemoni.

Buk blong Momon i ki ston blong witnes blong yumi long Jisas Kraes, we Hemwan i konaston blong evri samting we yumi mekem. Hem i wan witnes we i talem strong mo klia se Jisas i laef. I no olsem Baebol, we i bin pas tru long ol jeneresen blong ol man we oli bin kopi long hem, ol transleta, mo ol man blong relijin we oli nogud we oli bin jenisim toktok blong hem; Buk blong Momon, hem i kam stret long man we i bin raetem i go long man we i ridim, hemia long wan translesen step nomo. Nao testemoni blong buk ia abaot Masta i klia, i strong, i klin evriwan, mo i gat ful paoa. Be hem i mekem moa. Plante long Kristin wol tedei, oli stap sakemaot Sevya olsem wan hae man. Oli stap gat kwestin long saed blong merikel blong taem we Hem i bon, stret laef blong Hem, mo i tru we Hem i bin laef bakegen long ded. Buk blong Momon i stap tijim, wetem ol klia toktok we i no gat tu mining abaot trutok blong evri samting ia. Hem i givim tu wan ful eksplenesen long doktrin blong Atonmen. I tru, buk ia we i kam long heven i wan ki ston blong talemaot long wol se Jisas Hem i Kraes.²

Buk blong Momon i ki ston tu blong doktrin blong Laef Bakegen long Ded. Olsem we mi bin talem bifo, Lod Hemwan i bin talem se Buk blong Momon i tekem ful gospel blong Jisas Kraes (luk long D&C 20:9). Hemia i no minim se hem i gat evri tijing, evri doktrin we bae oli talemaot. Be, hem i minim se insaed long Buk blong Momon, bae yumi faenem ful doktrin we yumi nidim blong fasin blong sevem yumi. Mo oli tijim olgeta i klia mo i simpol blong mekem se ol pikinini tu oli save lanem ol wei blong fasin blong sevem man mo kam olsem wan god. Sapos i no gat hemia, plante long wanem we oli stap tijim long ol nara skripja bae oli no klia tumas mo i no gud tumas.

Laswan, Buk blong Momon i ki ston blong testemoni. Semmak olsem we ak i foldaon sapos oli karemaot ki ston, bae ful Jos i stanap o foldaon wetem trutok blong Buk blong Momon. Ol enemi blong Jos oli andastanem samting ia i klia. From hemia nao oli mekem fulap samting blong traem sakemaot Buk blong Momon; from we sapos oli save sakemaot, Profet Josef Smit i go wetem tu. Mekem tu se bae yumi no save klemem ol ki blong prishud, mo revelesen, mo Jos we i kambak. Be semmak, sapos Buk blong Momon i tru—mo plante milian i testifae naoia se oli gat wan witnes blong Spirit se buk i tru—nao wan i mas akseptem ol klem we yumi mekem abaot Restoresen mo evri samting we i kam wetem.

Yes, ol brata mo sista we mi laekem tumas. Buk blong Momon i ki ston blong relijin blong yumi—ki ston blong testemoni blong yumi, ki ston blong doktrin blong yumi, mo ki ston blong witnes blong Lod mo Sevya blong yumi.

Nambatu bigfala risen from wanem yumi mas mekem Buk blong Momon i senta blong stadi blong yumi, hem i from we oli bin raetem blong taem blong yumi. Ol Man blong Nifae oli neva gat buk ia; mo Ol Man blong Leman tu long taem bifo. Hem i from we hem i blong yumi. Momon i bin raetem kolosap long en blong laef blong ol pipol blong Nifae. Folem insperesen we i kam long God, we i luk evri samting stat long stat, hem i bin raetemsot handred yia blong histri, i bin jusum ol stori, ol toktok, mo ol samting we i bin hapen we bae i helpem gud yumi.

Wanwan long ol bigfala man we oli bin raetem Buk blong Momon oli bin testifae se hem i stap raet i go long ol fiuja jeneresen. Nifae i bin talem: “Lod God i bin promes long mi se ol samting ia we mi raetem bae oli kipim mo sevem, mo givim daon long ol pikinini blong mi, long wan jeneresen i go long narafala jeneresen,” (2 Nifae 25:21). Brata blong hem, Jekob, we i bin kam afta long hem, i bin raetem ol semfala toktok: “From [Nifae] i bin talem se bae oli raetem histri blong ol pipol blong hem long ol narafala buk blong hem, mo se mi mas sevem ol buk ia mo pasem i go daon long ol pikinini blong mi, stat long wan jeneresen i go long narafala jeneresen (Jekob 1:3). Inos mo Jerom, tufala i bin talem se tufala tu i stap raet, i no blong ol pipol blong olgeta, be blong ol fiuja jeneresen (luk long Inos 1:15–16; Jerom 1:2).

Momon hemwan i bin talem: “Yes, mi toktok long yufala, yufala smol haf blong laen blong Isrel we i laef yet” (Momon 7:1). Mo Moronae, las man we i bin raet, i bin luk dei mo taem blong yumi. Hem i talem se: “Lod i bin soem long mi, ol bigfala mo gudfala samting long saed blong samting we i mas kam klosap, long dei ia, taem we ol samting ia bae i kamaot long medel blong yufala.

“Luk, mi toktok long yufala olsem se yufala i stap long ples ia, be yufala i no stap. Be luk, Jisas Kraes i bin soem yufala long mi, mo mi save ol wok blong yufala” (Momon 8:34–35).

Sapos oli bin luk dei blong yumi mo oli bin jusum ol samting we bae i impoten moa long yumi, yufala i no ting se long fasin ia nao bae yumi mas stadi long Buk blong Momon? Yumi mas askem oltaem long yumi se: “From wanem Lod i bin givim insperesen long Momon (o Moronae o Alma) blong putum hemia insaed long rekod? Wanem lesen nao mi save lanem aot long hemia blong helpem mi blong laef long dei ia mo taem ia?”

Mo i gat wan eksampol mo afta wan moa eksampol long olsem wanem ansa i kam long kwestin ia. Eksampol, long Buk blong Momon, yumi faenem paten blong stap rere from Seken Kaming. Wan bigfala pat blong buk i lukluk nomo long sam yia stret bifo Kraes i go long Amerika. Taem yumi stadi gud long taem ia, yumi save faenem from wanem sam oli bin lus long ol strong jajmen we i bin kam bifo Hem i bin kam, mo wanem i tekem ol narawan oli stanap long tempol long graon blong Baontiful (Plante) mo oli pusum han blong olgeta long ol mak blong han mo leg blong Hem.

Aot long Buk blong Momon, yumi lanem olsem wanem ol disaepol blong Kraes oli bin laef long ol taem blong wo. Aot long Buk blong Momon, yumi luk ol nogud wok blong ol sikret plan we oli tokbaot klia mo mekem man i seksek. Insaed long Buk blong Momon, yumi faenem ol lesen we i stretem fasin blong gat hadtaem mo apostasi. Yumi lanem plante abaot fasin blong mekem misinari wok. Mo moa bitim eni nara ples, yumi luk insaed long Buk blong Momon, ol denja blong laekem ol samting blong wol mo putum hat blong yumi long ol samting blong wol ia. Bae i gat eniwan i save gat tu tingting se buk ia i blong yumi mo insaed long hem yumi save faenem bigfala paoa, bigfala kamfot, mo bigfala protektsen?

Nambatri risen from wanem Buk blong Momon i impoten tumas long ol Lata-dei Sent, i kamaot long toktok we i kam long Profet Josef Smit we hem i bin talem fastaem. Hem i bin talem: “Mi bin talem long ol brata se Buk blong Momon i moa stret long eni narafala buk long wol, mo i ki ston blong bilif long God blong yumi, mo wan man bae i kam moa klosap long God sapos hem i folem ol tijing blong hem, bitim eni narafala buk.” Hemia i nambatri risen blong stap stadi long buk ia. Hem i helpem yumi blong kam kolosap moa long God. Bae i no gat wan samting moa we i moa dip insaed long hat blong yumi we i wantem tumas blong kam kolosap long God, blong yumi kam moa olsem Hem long evri dei wokbaot blong yumi, blong yumi filim se Hem i stap wetem yumi oltaem? Sapos i olsem, nao i no gat wan narafala buk moa we bae i helpem yumi wetem hemia be Buk blong Momon nomo.

I no se Buk blong Momon i stap tijim yumi nomo long trutok, nomata hem i tru we hem i stap mekem hemia. I no se Buk blong Momon i stap olsem wan testemoni abaot Kraes, nomata hem i tru we hem i stap mekem hemia tu. Be i gat wan moa samting. I gat wan paoa insaed long buk ia we bae i stat blong kam insaed long laef blong yu stat long taem we yu tinghevi blong stadi long buk ia. Bae yu faenem bigfala paoa blong stanap agensem temtesen. Bae yu faenem paoa blong stap longwe long harem nogud. Bae yu faenem paoa blong stap long stret mo smol rod. Ol skripja, oli singaotem olgeta ol toktok blong laef (luk long D&C 84:85), mo i no gat wan ples moa we hemia i tru bitim insaed long Buk blong Momon. Taem yu stat blong stap hanggri mo tosta from ol toktok ia, bae yu faenem laef i stap kam bigwan mo bigwan moa.

Brata blong yumi we yumi lavem tumas, Presiden Marion G. Romni … i bin testifae abaot ol blesing we i save kam long laef blong olgeta we bae oli ridim mo stadi long Buk blong Momon. Hem i bin talem:

“Mi filim save stret se sapos, insaed long ol hom blong yumi, ol papa mo mama i stap ridim Buk blong Momon wetem prea mo oltaem tufalawan mo wetem ol pikinini blong tufala, spirit blong bigfala buk ia bae i kam protektem ol hom blong tufala mo evriwan we i stap laef insaed long hem. Spirit blong stap gat respek bae i kam antap; respek long wanwan long olgeta mo tingting long wanwan long olgeta bae i gro. Spirit blong stap rao bae i aot. Ol papa mo mama bae oli givim kaonsel long pikinini blong olgeta wetem moa lav mo wetem moa waes. Ol pikinini bae oli obei moa mo bae oli folem moa kaonsel we papa mo mama blong olgeta i givim long olgeta. Stret mo gud fasin bae i fulap long ol hom mo laef blong yumi, mo i tekem wetem olgeta pis, glad, mo hapines.”³

Ol promes ia—blong gat moa lav mo gud spirit insaed long hom, blong gat moa respek bitwin papa, mama mo pikinin, blong gat moa spirit mo stret mo gud fasin—oli no ol promes blong nating, be i stret wanem we Profet Josef Smit i bin minim taem hem i bin talem se Buk blong Momon bae i helpem yumi blong kam kolosap moa long God.

Ol brata mo sista. Mi plis long yufala wetem evri hat blong mi, blong yufala i tingting wetem bigfala respek long hamas nao Buk blong Momon i impoten long yuwan mo long Jos olsem wan grup.

Ova long 10 yia i pas, mi bin talem toktok ia long saed blong Buk blong Momon:

“Bae laef we i no save finis blong yumi bae i dipen long olsem wanem yumi stap tekem buk ia? Yes. Bae hem i wan blesing o bae i wan panismen blong yumi.

“Evri Lata-dei Sent i mas mekem se stadi blong buk ia i wan samting we hem i stap mekem long laeftaem blong hem. Sapos no, hem i stap putum sol blong hem long denja mo i no wantem save long samting we bae i mekem se bae hem i gat yuniti long saed blong spirit mo save long laef blong hem. I gat wan samting i defren bitwin wan konvet we i stap bildimap hem antap long ston blong Kraes tru long Buk blong Momon mo i stap holem taet rel blong aean ia, mo wan we i no stap mekem.”⁴

Mi konfemem ol toktok ia long yufala long tedei. Bae yumi no stap stap anda long panismen, wetem trabol mo jajmen blong hem, from we yumi stap tekem bigfala mo naes presen ia we Lod i givim, i nating. Be bae yumi winim ol promes we i kam taem yumi holemtaet gud buk ia insaed long hat blong yumi.

Insaed long Doctrine and Covenants, seksen 84, ol ves 54 i go kasem 58, yumi ridim se:

ol maen blong yumi long ol taem we i pas finis, oli bin kam tudak from yumi no bilif, mo from se yumi bin tingting nating long ol samting we yumi bin akseptem.

Mo fasin ia blong tingting nating mo fasin blong no biliv i mekem se ful jos i stap anda long panismen.

Mo panismen ia i stap antap long ol pikinini blong Saeon, mo tu, evriwan.

Mo bambae yumi stap anda long panismen ia kasem taem we yumi sakem sin mo yumi tingbaot niu kavenan, we i Buk blong Momon mo ol komanmen blong fastaem we Lod i bin givim long yumi, we i no blong talem nomo, be blong go mekem folem wanem we Lod i bin raetemdaon—

Blong mekem se yumi save karem i kam ol frut ia we oli stret long kingdom blong Papa blong yumi; sapos no, bae wan trabol mo jajmen i stap blong Lod i kapsaedem antap long ol pikinini blong Saeon.

Folem las jeneral konfrens, mi bin kasem plante leta we i kam long ol Sent, tugeta olgeta we oli yangfala mo olfala, we i kam raon long wol we oli bin akseptem jalenj blong ridim mo stadi long Buk blong Momon.

Mi bin glad tumas long stori blong olgeta long olsem wanem nao, laef blong olgeta i bin jenis mo olsem wanem oli bin kam kolosap moa long Lod from we oli bin komitim olgeta. Ol bigfala testemoni ia oli bin konfemem long sol blong mi, ol toktok ia blong Profet Josef Smit se i tru we Buk blong Momon i “ki ston blong [relijin] blong yumi” mo wan man mo wan woman i save “kam moa klosap long God sapos hem i folem ol tijing blong hem, bitim eni narafala buk.”

Hemia i prea blong mi, se Buk blong Momon i save kam ki ston blong laef blong yumi.