Drim blong Lihae

Hamas i impoten blong ridim, stadi, lukluk insaed mo tingting hevi long ol skripja mo speseli Buk blong Momon, i kamaot klia long plante poen insaed long visen blong Lihae abaot tri blong laef (luk long 1 Nifae 8).

Stamba samting long drim blong Lihae i tri blong laef—wan pikja blong “lav blong God” (luk long 1 Nifae 11:21–22). “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis” (Jon 3:16). From hemia, taem we Lod Jisas Kraes i bon, laef blong Hem mo sakrifaes blong Hem we i pemaot man, oli ol bigfala saen blong lav we God i gat long ol pikinini blong Hem. Olsem we Nifae i testifae, lav ia hem i, “samting we evri man i wantem moa plante long ol narafala samting,” mo olsem enjel i bin talemaot long visen blong hem, hem i “hem i wan glad we i bigwan olgeta long sol” (1 Nifae 11:22–23; luk tu long 1 Nifae 8:12, 15). Japta 11 blong 1 Nifae i tokbaot gud evri smol pat blong tri blong laef olsem wan saen blong laef, ministri, mo sakrifaes blong Sevya—“ol samting long saed blong ol wok we God i kam daon blong mekem wetem man” (1 Nifae 11:16).

Frut we i stap long tri ia, i wan saen blong ol blesing blong Atonmen. Blong tekem frut blong tri, hem i ripresentem blong kasem ol odinens mo ol kavenan we tru long olgeta, Atonmen i save wok fulwan long laef blong yumi. Frut, oli tokbaot se hem i “gud tumas blong i save mekem man i hapi” (1 Nifae 8:10) mo i givim bigfala glad mo i givim tingting blong wantem serem glad ia wetem ol narafala man.

Nao i tru we stamba toktok we i kamaot gud long Buk blong Momon—blong stap invaetem evriwan blong kam long Kraes—i stamba blong visen blong Lihae. Wanem i pulum tingting plante i rel blong aean we i lidim man long tri (luk long 1 Nifae 8:19). Rel blong aean i toktok blong God.

Papa Lihae i bin luk fo grup blong pipol long visen blong hem. Tri long ol grup ia oli bin stap traehad blong go fored folem stret mo smol rod, mo stap lukaotem blong kasem tri mo frut blong hem. Wan nambafo grup i no bin stap lukaotem tri ia nating, be oli bin wantem blong go long bigfala haos ia we i gat fulap spes, olsem ples ia nao we oli jusum blong stap long hem (luk long 1 Nifae 8:31–33).

Long 1 Nifae 8:21–23 yumi lanem abaot fas grup blong ol pipol we oli bin traehad blong go fored mo stat blong wokbaot long rod we i go kasem tri blong laef. Be, taem pipol ia i stat blong kasem klaod blong tudak, we i ripresentem “ol temtesen blong devel” (1 Nifae 12:17), oli bin lusum rod blong olgeta, oli go aotsaed long rod, mo oli bin lus.

Lukgud se oli no tokbaot nating rel blong aean long ol ves ia. Olgeta we oli no wantem save, o stap tingting nating long toktok blong God, oli no save kasem tabu kampas ia we i soem rod i go long Sevya. Tekem nomo se grup ia i bin kasem rod mo oli bin traehad fored, mo gat wan smol fet long Kraes mo strong tingting long spirit, be ol temtesen blong devel i bin pulum olgeta mo oli bin go lus.

Long 1 Nifae 8:24–28 yumi stap rid abaot wan nambatu grup blong ol pipol we oli bin kasem stret mo smol rod we i go kasem tri blong laef. Grup ia “i bin go fored tru long ol klaod blong tudak, oli holem strong long rel blong aean, mo tu, kasem taem we oli bin kam fored mo kakae long frut blong tri” (ves 24). Be, taem ol man we oli dresap long flas klos we oli stap long haos ia we i bigwan mo i gat fulap rum long hem oli stap jikim nambatu grup blong ol pipol ia, “oli bin sem” mo “oli bin foldaon i go long ol rod we i no blong folem, mo oli bin lus” (ves 28). Plis lukgud se grup ia oli tokbaot olgeta we oli bin “holem strong long rel blong aean” (1 Nifae 8:24; oli ademap italik).

Hem i impoten blong luk se nambatu grup i gohed blong muv fored wetem fet mo komitmen. Olgeta tu oli bin gat wan moa blesing ia blong gat rel blong aean, mo oli bin stap holem strong rel blong aean ia! Be, taem oli bin fesem hadtaem mo fasin blong agens, oli bin foldaon long ol nogud rod mo oli bin lus. Nomata oli bin gat fet, komitmen, mo toktok blong God, grup ia i bin go lus—ating from se oli ridim o stadi o lukluk long ol skripja wanwan taem. Blong holem strong rel blong aean, long mi, i minim blong gat “strong filing” blong stadi we i hapen wanwan taem nomo, o blong stap digdig wanwan taem be i no blong stap draon oltaem long ol toktok blong God.

Long ves 30, yumi save ridim abaot wan nambatri grup blong ol pipol we oli bin gohed blong go fored, oli stap holem taet rel blong aean oltaem.

Nambatri grup tu i bin gohed blong go fored wetem fet mo strong tingting; be, i no gat wan ples i talem se oli bin lus smol, o foldaon long ol rod we i no blong go long hem, o oli bin lus evriwan. Ating nambatri grup blong pipol ia i bin ridim ol skripja oltaem mo i bin stadi mo i bin lukluk long ol skripja oltaem. Ating hem i fasin blong olgeta blong stap strong mo gat strong tingting blong mekem wanem we yumi luk olsem wan “smol mo simpol [samting]” (Alma 37:6) we i bin sevem nambatri grup blong oli no lus evriwan. Ating hem i “save long saed blong Lod” mo “save long saed blong trutok” (Alma 23:5, 6) we oli bin kasem from oli bin stadi long skripja oltaem we i bin mekem se oli kasem presen blong spirit ia blong gat tingting i stap daon—mekem se grup ia i bin “foldaon mo oli bin kakae long frut blong tri” (1 Nifae 8:30; oli ademap italik). Ating hem i kaekae long saed blong spirit mo paoa we i kam taem oli bin stap “kakae gud long toktok blong Kraes” (2 Nifae 31:20) oltaem we i bin mekem se grup ia i no bin lisin mo mekem folem ol nogud toktok, mo toktok blong jik blong ol pipol blong bigfala haos ia we i gat plante rum long hem (luk long 1 Nifae 8:33). Grup ia nao, yu mo mi i mas traehad blong joenem.

Brata blong Nifae i bin askem, “Wanem mining blong rel blong aean we papa blong yumi i bin luk, we i bin go long tri?

“Mo [Nifae] bin talem long olgeta se i bin toktok blong God, mo eni man we bae i lisin long toktok blong God, mo bae i holem taet long hem, bae oli no save lus; mo tu ol temtesen mo ol spia blong devel, we i gat faea long hem, i no save winim olgeta kasem taem we oli kam blaen, blong lidim olgeta i gowe blong lus” (1 Nifae 15:23–24; oli ademap italik).

Nao. Wanem samting i difren bitwin fasin blong stap holem strong mo fasin blong stap holem taet rel blong aean? Bae mi talem olsem, blong holem strong rel blong aean, i minim, long bigfala toktok, blong yusum tabu skripja wetem prea, oltaem mo wetem strong tingting olsem wan ples we trutok we God i talemaot i stap long hem, mo blong yusum tabu skripja olsem wan gaed long rod blong yumi long stret mo smol rod we i go long tri blong laef—i go long Lod Jisas Kraes.

“Mo i bin hapen se mi bin luk se rel blong aean, we papa blong mi i bin lukim, i bin toktok blong God, we i bin go stret long springwota blong ol wota we i laef, o long tri blong laef” (1 Nifae 11:25).

Buk blong Momon i talemaot ol trutok we oli stret mo i nid long dei blong yumi tedei, mo i stret mo i nid long situesen blong yumi. Hamas nao Buk blong Momon i wan samting we yumi nidim long spirit mo long praktis long laef blong yumi, Moronae nao i tokbaot gud: “Luk, mi toktok long yufala olsem se yufala i stap long ples ia, be yufala i no stap. Be luk, Jisas Kraes i bin soem yufala long mi, mo mi save ol wok blong yufala” (Momon 8:35). From we oli bin luk taem blong yumi mo situesen blong laef blong yumi tru long save we God i gat finis, olgeta we oli bin raetem Buk blong Momon oli bin putum ol topik mo ol eksampol we oli impoten tumas speseli long ol pipol we oli stap long wol ia long ol lata dei.

Mi invaetem yufala blong tingting gud mo wetem prea long kwestin ia we i stap kam: Wanem lesen nao mi save lanem, mo mi mas lanem aot long visen blong Lihae long saed blong tri blong laef mo aot long prinsipol ia blong stap holem taet oltaem rel blong aean we bae i mekem se mi save stanap strong long saed blong spirit long wol ia we yumi stap laef long hem tedei?

Taem yu stap wok strong wetem strong tingting mo stap lukaotem blong kasem insperesen long ansa blong impoten kwestin ia, bae yu kam blong andastanem moa fulwan, tru long paoa blong Tabu Spirit, insaed long hat mo maen blong yu, olsem wanem i impoten blong stap holem taet rel blong aean. Mo bae yu kasem blesing taem yu yusum ol lesen ia wetem fet mo fasin blong wok strong, long laef blong yuwan mo insaed long hom blong yu.

Bae yumi evriwan i gat ol ae blong luk, mo ol sora blong harem sam moa lesen we i kamaot long visen blong Lihae, we bae i helpem yumi blong “mas wokbaot fored wetem strong bilif long Kraes, wetem wan stret mo klin hop, mo wan lav blong God mo blong evri man. From samting ia, sapos [yumi] gohed strong, kakae gud long toktok blong Kraes, mo stap strong kasem en, luk, olsem ia nao Papa i talem: Bae [yumi] kasem laef we i no save finis” (2 Nifae 31:20).