Mi Bin Filim Wan Faea Insaed long Mi

Mi groap mo stap go long wan Sandei Skul long wan jos we i stap kolosap long hom blong mi long Mijigan, YSA. Mi bin gat wan gudfala tija we i bin fulumap mi wetem lav long Jisas Kraes.

Evri wik, bae hem i pasem ol kad we i soem ol taem blong ministri blong Sevya long wol, wetem tu ol prinsipol we Hem i bin tijim mo ol merikel we Hem i bin mekem. Evri wik, mi putum ol kad ia long wan buk mo stap ridim bakegen ol stori ia insaed long Baebol. Taem mi gro i kam bigwan, mi bin gohed blong stadi long ol buk blong Gospel insaed long Niu Testeman.

Sam yia afta, long sama blong yia 1968, ol misinari blong Jos blong Jisas Kraes blong Ol Lata-dei Sent oli bin visitim hom blong wan memba blong famle. Hem i no wantem akseptem invitesen blong ol elda blong lanem abaot Jos be hem i sendem olgeta i kam long haos blong mi.

Long fas miting blong mifala, ol misinari oli bin tijim mi se “wan foldaon” i bin hapen long Jos we Jisas Kraes i bin stanemap (luk long 2 Tesalonaeka 2:3). Wanem we oli bin tijim i bin go wetem stadi blong miwan, mekem se taem oli bin askem sapos oli save kam visitim bakegen, mi bin agri.

Long taem blong nekis visit blong olgeta, mi bin gat wan lis blong ol kwestin. Ol Lata-dei Sent oli mekem baptaes andanit long wota? Oli stap biliv o no long prishud atoriti? Oli stap biliv o no long fasin blong hilim ol sikman? Ol ansa blong olgeta i bin sapotem wanem we mi bin stadi insaed long Niu Testeman. Long en blong visit blong tufala, tufala i bin livim wan buk we tufala i talem se hem i testifae abaot Jisas Kraes.

Mi putum buk ia antap long TV mo mi go long bed. Be long medelnaet, wan strong filing i wekemap mi, we afta, mi luksave olsem Tabu Spirit. Mi bin filim se mi mas stat blong ridim buk, mekem se mi bin ridim blong wan aoa mo haf bifo mi gobak long bed. Sot taem afta, mi wekap bakegen wetem sem filing ia, mekem se mi ridim sam moa.

Paten ia i bin gohed blong tu moa naet. Mi bin lavem wanem we mi bin stap ridim mo mi bin luksave se Buk blong Momon i bin testifae abaot Jisas Kraes.

Mi bin disaed blong askem God blong kasem wan daereksen. Blong fas taem stat we mi smol gel i kam, mi bin nildaon blong prea. Mi bin askem Papa long Heven blong helpem mi blong save wanem blong mekem wetem faea we mi filim insaed long mi. Taem mi bin finisim prea blong mi, mi bin filim blong ridim bakegen stori blong Ol Man blong Leman we oli bin jenisim laef blong olgeta, we i stap long 3 Nifae 9. Mi ridim se oli bin “baptaes wetem faea mo wetem Tabu Spirit, mo oli no bin save” (ves 20).

Toktok ia “oli no bin save” i toktok i kam stret long mi. Tingting ia i kam long mi: “I tru we Jos blong Jisas Kraes blong Ol Lata-dei Sent i stap long wol!” Mi wantem tumas blong toktok long ol misinari abaot wanem mi bin ridim mo wanem we mi save naoia. Be taem oli bin ansa long ol kwestin blong mi wetem wan invitesen blong kasem baptaes, mi talem long olgeta se mi no save mekem. Bae hasban blong mi bae i no andastanem.

Taem mi bin gohed blong tingting long ves ia, nao mi luksave se i tekem ol klia daereksen blong mi blong mi mas mekem sakrifaes blong wan “hat we i stap daon mo wan spirit we i wantem sakem sin.” Mi bin prea mo mi bin askem Papa blong mi we i stap long Heven blong helpem mi, mo Hem i bin mekem. Afta we hasban blong mi i bin lisin long ol lesen blong ol misinari, hem i bin agri blong mi kasem baptaes.

Mi talem tangkyu tumas long wan Papa long Heven we i gat lav from spesel mo strong eksperiens ia we mi bin gat olsem wan yang mama we i stap ridim Buk blong Momon. Hem i lidim mi long gospel blong Jisas Kraes we i kambak. Long en, paoa blong Tabu Spirit we mi bin filim long ol naet ia long 1968, oli stap naoia olsem wan presen we i stap oltaem—wan samting we i bin lidim mi blong moa long 40 yia olsem wan memba blong Jos.