Ol Kwestin we Oli Askem Oltaem abaot Buk blong Momon

Buk blong Momon i wan buk blong ol skripja we i semmak long Baebol. Hem i wan nara testeman blong Jisas Kraes.¹ Baebol i tokbaot bigwan laef mo ol tijing blong Isrel blong bifo. Buk blong Momon i tekem ol raeting blong plante grup we i bin go long ol Amerika, wetem histri blong wan famle we i bin livim Jerusalem long yia 600 B.K. Ol pipol ia, oli kamaot long laen blong haos blong Isrel. Nao Baebol mo Buk blong Momon, tugeta ol pipol we oli kamaot long sem laen nomo oli bin raetem, be oli bin stap long ol defren pat blong wol.

Semmak olsem Baebol, Buk blong Momon i moa bitim wan rekod blong histri. Hem i tekem ful gospel blong Jisas Kraes (luk long D&C 20:9): ol tijing, ol doktrin mo ol profesi we i testifae abaot God Papa, mo Pikinini blong Hem, Jisas Kraes.

Profet Josef Smit i bin eksplenem se Buk blong Momon “i talem long yumi se Sevya blong yumi i bin kamaot long graon ia (Ol Amerika) afta long taem we Hem i bin laef bakegen long ded; mo Hem i bin putum Gospel long ples ia, we i fulwan, we i rij, mo i gat paoa mo blesing; se oli bin gat ol Aposol, ol Profet, ol Pasta, ol Tija, mo ol Ivanjelis, semfala oda, semfala prishud, semfala odinens, presen, paoa, mo blesing, olsem we i bin stap long graon long Is; … se laswan long ol profet we i bin stap long medel blong olgeta, i bin kasem oda blong raetem wan sot stori blong ol profesi blong olgeta, histri mo sam moa, mo blong go haedem olgeta insaed long graon, blong hem i save kamaot mo kam wan wetem Baebol blong ol stamba tingting blong God long ol las dei oli kamtru.”²

Ol memba blong Jos oli stap stadi long tugeta, Baebol mo Buk blong Momon. Be i tru we aot long fo yia, i gat tu yia we i blong stadi nomo long Baebol long taem blong Sandei Skul. (Blong save moa long saed blong topik ia, luk long ol pej (16, 24, mo 52) insaed long magasin ia.)

Ol profet blong bifo, olsem Nifae, Jekob, Momon, mo boe blong Momon, Moronae, oli ol stamba man we oli raetem buk ia. Momon i putum tugeta mo i raetemsot ol rekod we ol profet oli bin raetem abaot histri, profesi, mo ol tijing. Hem i putum tu sam long ol eksperiens blong hemwan. Momon i bin raetem ol histri ia long ol pej we oli wokem long aean—we kala blong hem i gol— mo plante taem oli tokbaot olsem ol buk blong gol.

Afta long ded blong Momon, Moronae i bin finisim rekod mo i bin berem long wan hil blong i stap gud kasem dei blong yumi. Long 1823, Moronae i kamaot olsem wan enjel long Josef Smit mo i bin soem hem weaples hem i bin berem buk ia. Fo yia afta, Josef i bin gat raet blong tekem buk ia. Hem i “translestem rekod ia tru long presen mo paoa blong God” aot long lanwis blong bifo we oli bin raet long hem, i go long Inglis.³ Afta, hem i bin pablisim mo serem Buk blong Momon. (Blong save moa long saed blong topik ia, luk long ol pej (22 mo 72) insaed long magasin ia.)

Josef Smit i bin kasem ol buk ia long Septemba 1827, mo i bin holem kasem long spring blong yia 1829. Taem hem i bin raetem histri blong hem long 1833, hem i bin eksplenem wanem i bin hapen long ol buk ia we oli wokem long gol: “Taem, folem toktok we i stap, mesenja Moronae i bin askem olgeta buk ia, mi bin givim long hem; mo hem i holem olgeta kasem tedei, hemia long 2 mei long yia wan taosen eit handred mo teti-eit” (luk long Joseph Smith—History 1:60).

Antap long Josef Smit, i gat sam moa man mo woman we oli bin luk ol buk ia we oli wokem long gol mo oli bin testifae se oli bin stap. Leven man stret, we oli save long olgeta olsem Olgeta Tri Witnes, mo Olgeta Eit Witnes, oli bin rekodem testemoni blong olgeta se oli bin luk ol buk ia, mo long saed blong Olgeta Eit Witnes, oli bin holem ol buk ia. Testemoni blong olgeta i stap long fored blong wanwan kopi blong Buk blong Momon.

Ol man ia, oli stap olsem ol strong witnes blong Buk blong Momon, ating moa from se sam long olgeta oli kam “agensem Josef blong smol taem,” Elda Jefri R. Holan blong Kworom blong Olgeta Twelef Aposol, i talem. Be, oli bin “testifae kasem ded blong olgeta se oli bin luk wan enjel mo oli bin holem olgeta buk ia we oli wokem long gol. ‘Tru long paoa blong God mo i no tru long paoa blong man, oli bin soem olgeta buk ia long mifala’ oli talem. ‘Taswe mifala i save gud se wok ia i tru.’”⁴

Nomata yumi no mekem bilif blong yumi i stanap long pruf blong wol ia, i gat pruf long saed blong lanwis, histri mo akeoloji (wok blong digim graon blong faenem samting blong bifo), abaot Buk blong Momon. Eksampol, aedia blong raet long ol pej we oli wokem long aean, wan taem oli bin talem se i no tru, be i no longtaem i pas, i bin gat plante eksampol blong ol tabu raeting we oli raetem long ol pej we oli wokem long aean—sam oli haedem long ol ston bokis—we oli bin faenem olgeta.

Ol man we oli stadi long ol lanwis, oli bin luk se ol wanwan toktok mo ful sentens blong Buk blong Momon, saon blong olgeta i defren smol long Inglis, be i gat ful mining blong hem long Hibru mo ol lanwis we kolosap i semmak long Hibru, we ating ol pipol long taem blong Buk blong Momon oli save long hem—ol lanwis we yangfala Josef Smit i no bin save nating long olgeta.

Be ol kaen pruf ia oli no wanem i winim tingting blong yumi se Buk blong Momon i tru. Hem i from fet mo revelesen we i kam long wanwan man.

Wan sua wei blong save hemia long yuwan i tru long paoa blong Tabu Spirit. Las japta long Buk blong Momon, i stap invaetem eniwan we i stap ridim, tingting hevi long hem, mo i wantem tru blong save sapos hem i tru, i blong askem long Papa long Heven long nem blong Jisas Kraes. Olgeta we oli folem wei ia, bae oli save tru long paoa blong Tabu Spirit se buk ia i tru (luk long Moronae 10:3–5). Plante milian memba blong Jos oli bin prea mo save tru long witnes blong Tabu Spirit se Buk blong Momon i tru. (Blong save moa long saed blong topik ia, luk long ol pej (4, 60, mo 80) insaed long magasin ia.)

Wan long ol ki bilif blong yumi i we God, oltaem, i bin talemaot tingting blong Hem long ol pikinini blong Hem long wol ia, mo bambae i mekem oltaem. Mifala i bilivim se Baebol i toktok blong God, be mifala i no biliv se hem i tekem evri revelesen we God i bin givim, o bae i givim long ol profet blong Hem. Tedei, Hem i gohed blong talemaot tingting blong Hem tru long ol profet mo ol aposol we oli stap laef, fandesen blong Jos blong Jisas Kraes blong Ol Lata-dei Sent (luk long Efesas 2:20).

Taem Aposol Jon i bin raetem buk blong Revelesen, hem i no las buk long Baebol. OlTesteman mo Niu Testeman oli bin joenem tufala i fas wanples olsem wan buk blong skripja nomo—we naoia oli singaotem Baebol—long nambatri senturi ia nomo A.K.

Long semfala wei, Dutronome 4:2 i talem long yumi blong no ademap eni samting long toktok blong Moses. I tru, ves ia, we i stap eli long OlTesteman i no mekem se evri nara toktok long Baebol oli nogud. Mo Moses o Jon i bin save tokbaot blong jenisim wan buk we i no stap yet; be oli bin wonem man agensem fasin blong jenisim ol tru tijing blong gospel.

Buk blong Momon, we i tekem ful gospel, i no jenisim toktok blong God, be i konfemem. (Blong save moa long saed blong topik ia, luk long ol pej (24 mo 38) long magasin ia.)

Ansa blong kwestin ia i dipen long hamas yu andastanem abaot translesen blong Buk blong Momon, mo rod blong go kasem taem oli pablisim.

1. Taem Josef Smit i bin transletem ol buk blong gol tru long paoa blong God, hem i bin talemaot ol toktok long wan man we i bin stap raet blong hem. Olgeta man we oli stap raet, oli mekem ol mistek long olsem wanem oli raetem toktok mo grama blong olgeta. Eksampol, long 1 Nifae 7:20 ol toktok ia “were sorrowful” oli bin raetem olsem “ware sarraful.” Ol man blong raet oli bin skul, be long taem ia, oli no gat wan standet nomo blong folem blong raetem ol toktok.

2. Orijinol buk we oli bin raetem, hemia translesen blong hem, oli bin mekem kopi long hem blong mekem wan niuwan blong printa i yusum. Long taem ia, oli bin stretem sam fasin blong raetem ol toktok mo sentens, mo fasin blong seperetem ol sentens, oli ademap tu. Be i bin gat sam niu mistek i go insaed, from se oli no bin kopi gud long ol toktok ia.

3. Printa i bin traem evri samting we hem i save mekem blong mekem raeting i stret. Be, wanwan taem hem i ademap sam moa mistek. Eksampol, long Alma 57:25 hem i no ridim gud toktok ia “joy” mo hem i taepem “foes.”

4. Profet Josef Smit i bin luk gud long ol fas tri edisen blong Buk blong Momon, mo hem i bin gohed blong help blong stretem ol samting blong i kam gud moa. Be, sam long ol mistek, oli no bin faenem olgeta kasem taem oli mekem sam long ol las edisen. Long 1981, mistek blong printa, oli bin stretem long Alma 16:5 mo oli bin jenisim toktok ia “whether” i go long “whither”—mekem se i go stret wetem orijinol buk olsem we Profet i bin transletem aot long ol buk blong gol.

5. Ol nara jenis, i gat wan niu japta, mo fasin blong mekem ol ves, mo ol futnot mo ol kros refrens.

I nomata wanem kwestin ol pipol oli stap askem abaot Buk blong Momon, buk ia i stap difendem hemwan nomo. Yu save testifae abaot buk ia, yu save serem wan kopi i go, mo invaetem ol narafala man blong prea abaot blong ogletawan. Sapos wan i gat wan tru hat mo i wantem tru blong save sapos buk ia i tru, Lod bae i “soemaot trutok blong ol samting ia long [hem], tru long paoa blong Tabu Spirit” (Moronae 10:4).