Gipili Nako ang Maayong Bahin

Samtang nangandam ko sa kasal sa akong anak nga babaye, busy kaayo ko sa mga plano sa kasal nga wala na koy laing gihunahuna gawas sa tsiklist. Usa ka buntag gitan-aw nako ang taas nga listahan sa mga buluhaton. Ubay-ubay nako og nahimo, apan kinahanglan pa nakong maglimpyo og maayo. Dugay na akong nagplano nga limpyohan ang mga kitchen blind, busa gibuhat ko kini.

Sa akong pagsaka sa counter nga may mga trapo, brush, ug para limpyo, nakita nako kon unsa kini ka hugaw. Samtang nagtrabaho ko, naghunahuna ko sa istorya ni Marta ug Maria, ang managsuon nga miabi-abi sa Manluluwas sa ilang balay. Samtang si Marta “nagkalibug-libug sa hilabihang pag-amuma,” si Maria “milingkod sa tiilan ni Jesus, ug nagpatalinghug sa iyang mga pulong.” Si Marta mihangyo ni Jesus nga sultian ang iyang igsoon sa pagtabang sa mga buluhaton, apan ang Manluluwas miingon kaniya “hingpilian ni Maria ang maayong bahin” (tan-awa sa Lucas 10:38–42).

“Karon magpaka-Marta lang ko,” mihunahuna ko. Ang tinuod nagpaka-Marta nako sulod sa pipila ka semana, “nagkalibug-libug” sa balik-balik nga mga buluhaton ug pagpangandam sa kasal.

Naghunahuna na usab ko, ug naghinumdom kanus-a kadtong katapusang panahon nga nalimpyohan og maayo ang mga blinds. Naghunahuna ko sa duha ka babaye nga mitabang nako sa pagpangandam sa pagtipon-tipon sa balay duha na ka tuig ang milabay. Ilang gilimpyuhan pag-ayo ang kusina gikan sa sawog hangtud sa kisame, apil ang mga blinds. Kadto nga panumduman nakapahinumdom nako sa ilang inahan, higala nga dugay na nakong wala ikaistorya.

Nianang higayona gidayal nako ang iyang numero aron sa paghisgut kaniya sa kasal sa akong anak. Wala ko magdahum nga iyang tubagon kay nagtudlo siya sa eskwelahan, apan natawagan nako siya atol sa oras sa pagplano. Kami nagkinataw-anay, naghinilakay, ug nag-istoryahanay. Siya bag-ohay lang nakigdiborsyo ug mibati nga nag-inusara ug sinalikway. Samtang nag-istoryahanay mi, mibati kami nga gibayaw ug ang among kasingkasing gihupay.

Nahingangha ko sa paagi ang Ginoo midasig kanako bisan nagbuhat og balik-balik nga buluhaton sama sa paglimpyo sa mga blinds. Mas nahingangha ko sa kamatuoran nga Siya nasayud ug naghigugma kanato og maayo aron magpadala og tabang sa panahon nga kinahanglanon nato.

Nianang gabhiona mipahiyum ko samtang gitsikan ang “paglimpyo sa mga blinds sa kusina” sa lista. Bisan tuod nalipay ko nga nahuman ang buluhaton, mas mapasalamaton ko nga nahimong instrumento sa mga kamot sa Ginoo. Iyang gipakita kanako unsaon nga mahimong Maria kinsa mipili sa “maayong bahin” bisan ako sama ni Marta “nagkalibug-libug” sa akong buluhaton.