Ang Ehemplo sa Akong Mama

Akong gibundak ang plato ngadto sa hugasanan ug mihilak sa kasagmuyo.

“Erin, makaadto ka niana nga pool party,” miingon si papa. “Makalingaw-lingaw ka.”

“Dili ni bahin ana!” Misingka ko samtang nagdaling migawas sa kwarto.

Gisapot ko dili tungod sa party ni Adriane. Nasakit og pulmonya si mama ug ang kinamanghuran nakong igsoon, si Abby. Si papa ug ako migahin sa tibuok semana sa pag-atiman kanila ug naningkamot nga normal ang pagbuhat sa tanan sa panimalay. Kini mao ang pagpangluto, pagpanglimpyo, pagmerkado, pagpanglaba, ug paghatod sa akong duha ka igsoong babaye.

Tanan kini mitabon sa naghasol nako nga mga kabalaka ug kahadlok. Nabalaka ko sa akong pamilya ug gikulbaan nga hapit na ko mobiya aron moeskwela sa kolehiyo. Mao nga wala ko mag-urong ug gipaningkamutang ibaliwala ang akong mga kahadlok. Giplano gani nako nga dili moapil sa party ni Adriane, apan kapoy ko ug ang hunahuna sa usa ka gabii nga walay problema uban sa mga higala ngadto sa pool, nakapagawas sa akong kalagot. Wala na ko kapugong ug akong gipahimungtan si papa.

Mihilak ko sa makadiyot didto sa akong kwarto. Dayon, gibati nga nasayop, misaka ko og gisusi kon may gikinahanglan ba ang akong mama ug si Abby. Akong nakita si mama nga naghatag og tambal sa gihilantan nakong igsoon. Naglisud sa pagginhawa ang akong mama ug naghigda ra sulod sa mga adlaw. Gihangyo siya namo ni papa sa pagbalik og higda. Miingon mi nga kami ra ang moatiman ni Abby. Wala siya maminaw.

“Ok ra ko. Kamong duha pangatulog,” miingon siya. “Si Abby nagkinahanglan nako.”

Naningkamot kong dili makahilak samtang nagtan-aw ko ni mama nga mihupay sa 10-anyos nakong igsoon. Gisusi niya ang iyang kainiton, gitabangan sa pagpahigda, dayon mitupad niya paghigda ug gigakos ang nagkurog niya nga lawas. Nahunong sa pag-agulo ug nahupay si Abby ubos sa proteksyon sa akong mama.

Mas luya ang akong mama kay sa una. Sa katapusan gidala siya sa ospital sulod sa pipila ka adlaw tungod sa pulmonya. Apan taliwala sa iyang pagsulay, gikalimtan niya ang iyang kaugalingon. Kay sa moreklamo sa kaugalingon niyang sakit, nakahupay pa siya sa sakit sa iyang anak.

Giplano nakong magpakamartir nianang gabhiona nga mopundo sa balay aron sa pagtabang. Hinoon, naulaw ko sa akong pagkasapot ug napaubos tungod sa gibuhat sa akong mama. Sa pagtan-aw kaniya, nahibalo kong buhaton niya ang tanan sa pagtabang sa akong mga igsoon ug kanako.

Akong gibati ang iyang gugma nianang gabhiona ug nagtinguhang sundon ang iyang ehemplo. Mihukom ko sa pagpakita ngadto sa akong gipangga nga anaa ako kon ila kong gikinahanglan, bisan nagkinahanglan og personal nga pagsakripisyo.