Ang Saktong Kasulatan sa Saktong Panahon

Samtang nagserbisyo isip assistant chaplain sa Maricopa County Jail system sa Arizona, USA, mobisita ko ug mopakigbahin og kasulatan ug pag-ampo ngadto sa mga piniriso nga mohangyo og chaplain nga Santos sa Ulahing mga Adlaw. Usa ka higayon usa ka batan-ong babaye ang mihangyo niini.

Miadto ko sa iyang dapit sa prisohan, luyo sa pipila ka trinangkahan nga mga pultahan. Ang reception adunay duha ka lamesa sama sa cafeteria nga may lingkuranan sa isigka ka kilid ug usa ka lamesa nga may gwardiya. Gihatag nako sa gwardiya ang request slip, milingkod sa usa sa mga lingkuranan, ug mipaabut sa batan-ong babaye.

Mibarug ko sa iyang pagsulod sa reception area, mitimbaya kaniya, ug misugyot nga manglingkod. Siya subo ug hugaw tan-awon ug kahilakon. Samtang iyang gihisgutan ang iyang sitwasyon, naghunahuna ko og kasulatan nga ipakigbahin. Naminaw ko og maayo sa iyang mga problema, ug samtang iyang gipadayag ang mga kalisud nga iyang nasinati tungod sa bati nga batasan ug pagpili, naghunahuna ko og magamit nga kasulatan aron pagtabang kaniya: Mosiah 3:19.

Giablihan nako ang Basahon ni Mormon sa Mosiah 3:19, gipasa kaniya, ug gipabasa siya. Ingon og wala siya mahimuot sa pagsugod ug paspas niya kining gibasa, binugal-bugal nga tingog nga daw ipahayag nga wala siya maganahi sa pagbasa sa kasulatan. Sa iyang paghuman sa unang hugpong sa mga pulong, “Kay ang kinaiyanhon nga tawo mao ang usa ka kaaway sa Dios,” gipahunong nako aron ipasabut unsa ang “kinaiyanhon nga tawo.” Sa dihang iyang nasabtan ang reference, siya nagpadayon sa pagbasa. Hinay-hinay nga nausab ang tuno sa iyang tingog, ug mihinay-hinay siya sa pagbasa sa pagsugod niya og sabot sa mga pulong.

Sa dihang nagsugod na siya og basa sa daw pangbata nga mga kinaiya sa “usa ka santos,” mas gihinayan pa niya. Makaingon ko nga iyang gisabut ang kahulugan sa matag kinaiya diha sa bersikulo. Sa dihang iyang gibasa ang “manunuton, maaghup, mapainubsanon, mapailubon,” nabati nako ang Espiritu sa among palibut. Samtang iyang gibasa ang “puno sa gugma, mauyunon sa pagdawat,” nakamatikod ko nga may kausaban kaniya. Ang iyang panagway misanag ug ang iyang batasan, tuno sa tingog, ug kinatibuk-ang lihok ingon og natandog sa Espiritu. Nakita nako ang paglaum samtang siya natudloan sa Espiritu sa kahulugan niining mga pulong ug unsaon niya nga mausab sumala sa gihulagway sa kasulatan.

Nag-ampo ko ug dayon mainitong nakiglamano sa batan-ong babaye. Mibiya ko sa prisohan nga taas ang pagkaespirituhanon. Wala pa gyud ko kakita sama ka diha-diha dayon, gamhanan, kusganong epekto sa mga kasulatan. Nasayud ko sa Mosiah 3:19 kay kanunay nakong mabasahan kini diha sa kasulatan, apan karon pa nako masabti ang giladmon sa epekto niini ngadto sa usa ka tawo.