Natural nga mga Kalamidad

Niadtong Septyembre 2005, nagserbisyo ko isip Area Seventy sa North America Southwest Area, nga naglakip sa mga bahin sa Estados Unidos sama sa Houston, Texas. Among nahibaloan nga ang Hurricane Rita—ang pinaka kusog nga bagyo sa kasaysayan nga naobserbar sa Gulf sa Mexico—padulong kanamo. Gihangyo ko sa pagdumala sa Church’s emergency response sa maong dapit. Kada adlaw kami mag-conference calls uban sa mga priesthood leader, mga stake president, mga mission president, mga Church welfare ug humanitarian aid representative, ug emergency response leader. Among gihisgutan ang daghang mga butang—kon ang bishops’ storehouse andam na, asa ang mga tawo makabakwit, ug unsaon sa paghan-ay sa mga paningkamot sa pagtabang human sa unos. Maayo kining pagkahan-ay nga tubag sa Simbahan ug makapadasig nga kasinatian.

Usa sa mga stake president sa dapit nadasig sa pag-aghat sa iyang mga miyembro sa stake sa pag-andam mga walo o siyam ka bulan sa wala pa ang unos. Siya mipasabut nga wala siya nangangkon nga propeta apan ang mga pagdasig gikan sa Espiritu klaro kaayo. Ang mga miyembro sa stake misunod sa nag-unang stratehiya sa pagpangandam nga gisugyot sa Simbahan. Sa dihang miigo ang unos, walay miyembro sa stake ang namatay. Dugang pa, tungod kay ang mga miyembro nakaandam sa gikinahanglang suplay ug may plano, ang ilang kahimtang mas maayo kaysa wala sila mangandam. Ilang gisunod ang pasidaan sa Espiritu.

Susama nga sitwasyon ang nahitabo sa akong pamilya ug kanako. Mga tulo ka bulan sa wala pa ang unos, kami nadasig nga ipasusi ang among generator. Daghang mga tawo sa dapit adunay gagmay nga mga generator aron nga kon may unos ug walay kuryente, sila may igong kuryente aron dili madaut ang mga pagkaon nga anaa sa ilang refrigerator ug freezer. Sa dihang among gipasusi ang among generator, among nahibaloan nga kini guba. Amo kining napaayo sa wala pa moabut ang unos. Ang among pamilya, mga miyembro sa among ward, ug mga silingan migamit sa among generator human miigo ang unos. Ang pagpaayo niini nahimong usa ka dakong panalangin.

Kining baruganan sa pagpangandam magamit sa mga indibidwal ingon man usab sa mga pamilya. Mga ginikanan, kamo makaimpluwensya kaayo sa inyong pamilya pinaagi sa pagpaapil sa inyong mga anak sa pagpangandam ug sa pag-ampo sa pamilya alang sa giya sa Ginoo. Buot ipasabut, kon ang inyong pamilya nagkonsiderar sa pagpangandam, ang pangutana, unsa ang atong buhaton? kinahanglang malakip sa pag-ampo sa pamilya. Makahisgut kamo niining hilisgutan ug mopakigbahin og mga ideya sa family home evening. Dayon buhata kadto nga mga plano.

Dugang pa, ang pinaka maayong buhaton sa ginikanan mao ang pagsunod niining pagtulun-an. Adunay miingon nga kini nga mga kinaiya “masunod” dili “matudlo.” Akong nasayran nga kini tinuod. Samtang ang mga bata makakita sa ilang mga ginikanan nga nagtinguha ug nagsunod sa giya sa Espiritu, sila makakat-on unsa ang proseso sa pagpadayag.

Samtang nagkaduol ang unos, usa ka lisud nga pangutana ang among gikonsiderar, ang mga tawo ba among pabakwiton. Ang Espiritu miderekta kanako nga dili mobuhat og kinatibuk-ang rekomendasyon alang sa tanang area apan sa paghangyo sa matag stake leader, bishopric, ug sa pamilya nga mainampuong ikonsiderar ang sitwasyon ug makadawat og ilang kaugalingong inspirasyon sa angay nga buhaton. Sa hapit na ang unos, nahimong klaro nga ang Espiritu nasayud unsa ang labing maayo sa matag pamilya.

Ang mga lider sa usa ka stake, pananglit, nasayud nga sila maigo gayud sa unos ug ang mga miyembro gipasidan-an nga mobakwit. Ang stake president ug ang iyang asawa mibakwit ngadto sa balay sa iyang igsuon. Pagkahuman, ang unos miliko, padulong nila usab. Ang ilang gibakwitan naigo sa unos!

Tingali kamo makapangutana, “Unsa man na nga matang sa pagpadayag?” Apan ikonsiderar unsa ang nahitabo. Kini nga stake president ug iyang asawa nasayud unsaon pagpangandam atol sa unos, kay sa iyang igsoong babaye nga wala. Sila nakatabang sa ilang mga paryente nga maandam inig-abut sa unos, ug sa dihang miigo kini, ang kadaut gamay lang kay sa wala mangandam. Ang Ginoo migiya kanila unsa ang labing maayo nga buhaton.

Sa among pamilya, mibati kami nga dili mamakwit. Busa nagpabilin kami. Wala lang mi maluwas human sa unos, nakatabang pa usab kami sa ubang mga tawo sa dapit. Pipila sa among minyo nga mga anak nadasig nga mobakwit, mao nga sila mibiya. Ang pagsunod sa Espiritu mipanalangin sa matag pamilya, ward, ug stake.

Usahay ang buotang mga tawo mag-antus atol sa mga kalamidad. Dili wagtangon sa Dios ang pag-antus—apil kini sa plano. Sama pananglit, usa sa ka stake center sa tunga-tungang Estados Unidos nagun-ob tungod sa buhawi. Kini nga buwahi miguba usab sa balay sa stake president. Ang kabtangan niya ug sa iyang pamilya nahanaw. Apan, kini mga butang lang: kalibutanong kabtangan. Makapaguol ang pagkawala, apan kini dili makagun-ob sa kahangturan. Usahay ang atong gihunahuna nga importante dili gayud diay importante. Kini nga pagkaamgo dili ingon sayon dawaton, apan kini tinuod, ug ang pagsabut niini makapahupay.

Ang labing pait nga mahimo niining mga kalamidad mao nga adunay tawo nga mamatay. Kana makapaguol kaayo. Apan tungod kay nasayud kita sa kamatuoran, ang ingon nga pagkamatay kabahin sa plano sa Langitnong Amahan. Atong nasayran unsa ang kahulugan sa kinabuhi; nasayran nato nganong ania kita dinha ug asa kita paingon. Tungod niining mahangturong panglantaw, ang kasakit mahupay. Ang kahibalo sa plano sa kaluwasan makapawala sa ikos sa kamatayon (tan-awa sa 1 Mga Taga-Corinto 15:55).

Kaniadto, sila si Shadrach, Meshach ug Abed-nego wala masayud sa mahitabo kon sila ibutang sa hudno sa kalayo sa pagdumili sa pagsimba og dios-dios. Sila miingon sa hari, “Ang among Dios … makahimo sa pagluwas kanamo. … Apan kong dili ugaling, kami dili [gayud] moalagad sa imong mga dios” (Daniel 3:17–18).

Susama usab, daghang mga pioneer sa gipahiuli nga Simbahan andam sa pagsulay sa pagtabok sa mga kapatagan sa North Amerika sa tunga-tungang siglo sa 1800, bisan sa posibilidad sa kamatayon. Ang Basahon ni Mormon naghulagway sa buotang mga tawo nga gipangpatay ug nagtudlo nga sila “bulahan, kay sila miadto na aron sa pagpuyo uban sa ilang Dios” (Alma 24:22).

Sa matag usa, ilang gidawat ang kamatayon uban sa hugot nga pagtuo. Alang kanila, tungod sa kalinaw nga mahatag sa ebanghelyo, ang ikos sa kamatayon mawala. Bisan tuod kini masakit nga mamatyan og usa ka tawo nga inyong gihigugma ug bisan daghan kanato dili ganahang mamatay tungod kay daghang butang nga angayang ipakabuhi, ang tinuod mao nga ang tanan mamatay sa umaabut. Kon nasayud mo sa plano sa ebanghelyo, inyong nasayran nga ang kamatayon dili mao ang katapusan sa kalibutan. Ang inyong pagpakabuhi magpadayon, ug ang relasyon sa pamilya magpadayon bisan ang atong mortal nga mga lawas anaa sa lubnganan. Sa kinatibuk-ang panglantaw sa mga butang, ang kamatayon dili makapasubo sa kahangturan. Sama sa gitudlo ni Elder Russell M. Nelson sa Korum sa Napulog Duha ka mga Apostoles: “Kita nabuhi aron mamatay, ug kita mamatay aron mabuhi pag-usab. Gikan sa usa ka mahangturong panglantaw, ang wala damha nga kamatayon mao lamang ang kamatayon sa usa nga dili pa andam sa pagsugat sa Dios.”¹ Ang mahangturong panglantaw kabahin sa kalinaw nga mahatag sa ebanghelyo kanato.

Ang Ginoo nakaila kanato. Ang Ginoo nahigugma kanato. Ug ang Ginoo gusto nga motabang kanato. Ang mga kalamidad moabut, apan kita dili kinahanglang mahadlok. Kon kita andam nga magiyahan ug mohangyo sa Iyang direksyon, ang Ginoo pinaagi sa Espiritu Santo makatabang kanato sa pagpangandam, sa paglahutay, ug pagkaayo gikan sa natural nga mga kalamidad.