Ang Panawagan sa Manluluwas sa Pagserbisyo

Kadtong nagtuon og mathematics nasayud kon unsa ang common denominator. Alang sa Santos sa Ulahing mga Adlaw, adunay common denominator nga naghiusa kanatong tanan. Ang common denominator mao ang indibidwal nga call nga madawat natong tanan sa pagbuhat sa buluhaton sa gingharian sa Dios dinhi sa kalibutan.

Kamo ba nagbagulbul sa dihang kamo gihatagan og calling? O inyo bang gidawat uban sa pasalamat ang matag oportunidad sa pagserbisyo sa inyong mga kaigsoonan, nasayud nga ang atong Langitnong Amahan mopanalangin niadtong Iyang gitawag?

Naglaum ko nga dili mawala kanato ang tinuod nga tumong sa atong kinasingkasing nga pagserbisyo. Kana nga tumong, kana nga mahangturong tumong, mao ang gipamulong sa Ginoo ug makita sa Perlas nga Labing Bililhon: “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.”¹

Hinaut kanunay natong hinumdoman nga ang atong pagkamiyembro sa Ang Simbahan ni Jesukristo sa mga Santos sa Ulahing mga Adlaw dili pagpahayahay apan usa ka responsibilidad. Ang atong katungdanan, dugang sa pagluwas sa atong kaugalingon, mao ang paggiya sa uban ngadto sa celestial nga gingharian sa Dios.

Pinaagi sa andam nga paglakaw sa dalan sa pagserbisyo sa Dios, kita dili mahisama sa Cardinal Wolsey ni Shakespeare. Nakuhaan og gahum human sa dugayng pagserbisyo sa iyang hari, siya nagbakho sa kaguol:

Unsa nga matang sa pagserbisyo ang gikinahanglan sa langit? “Ang Ginoo nagkinahanglan sa kasingkasing ug sa usa ka andam nga hunahuna; ug ang andam ug ang masulundon mokaon sa kaayo yuta sa Zion niining katapusan nga mga adlaw.”³

Mohunong ko kadiyot kon maghunahuna sa mga pulong ni Presidente John Taylor (1808–87): “Kon kamo dili mopalambo sa inyong balaang mga tawag, ang Dios mohimo kaninyo nga responsable alang niadtong kinsa mahimong inyo untang maluwas kon kamo naghimo pa sa inyong katungdanan.”⁴

Sama sa nagbanwag nga kahayag sa kamaayo ang kinabuhi ni Jesus samtang Siya nangalagad sa katawhan. “Ako ania kaninyo ingon nga mag-aalagad,”⁵ Si Jesus mideklarar samtang Iyang napalakaw ang bakol, nag-ayo sa buta, sa bungol, ug nagbuhi sa mga patay.

Sa sambingay sa maayong Samarianhon, ang Agalon nagtudlo kanato sa paghigugma sa atong silangan sama sa atong kaugalingon.⁶ Sa Iyang tubag sa datu nga batan-ong tigmando, Siya nagtudlo kanato sa pagwagtang sa atong pagkahakog.⁷ Sa pagpakaon sa 5,000, Siya nagtudlo kanato sa pag-atiman sa panginahanglan sa uban.⁸ Ug sa Wali sa Bukid, Siya nagtudlo kanato nga unahon ang gingharian sa Dios.⁹

Sa Bag-ong Kalibutan, ang nabanhaw nga Manluluwas mideklarar, “Kamo nasayud sa mga butang nga kamo kinahanglan gayud nga mobuhat diha sa akong simbahan; kay ang mga buhat nga kamo nakakita nga Ako mihimo kana kamo mobuhat usab.”¹⁰

Kita nagpanalangin sa uban samtang kita nagsunod sa serbisyo ni “Jesus nga taga-Nazaret … nga nagpangadto-ngadto sa paghimog mga kaayohan.”¹¹ Ang Dios mopanalangin kanato nga makakaplag og hingpit nga kalipay sa pagserbisyo sa atong Amahan sa Langit samtang kita nagserbisyo sa Iyang mga anak dinhi sa yuta.