Paghunahuna sa Akong Kaugalingon nga didto sa Templo

Isip batan-ong babaye, nangandoy kong mahimo nga bahin sa usa ka mahangturon nga pamilya. 12 anyos ko dihang nabugkos ang akong pamilya sa Templo sa São Paulo Brazil. Hingpit ang akong panumduman nga nagluhod uban sa akong pamilya sa altar sa templo ug gibugkos uban sa akong mga igsoon ngadto sa among mga ginikanan alang sa karon ug alang sa tanang kahangturan. Didto nahibalo ko nga kini ang matang sa pamilya nga akong gusto. Gibutangan nako og litrato sa Templo sa São Paulo ang kilid sa akong higdaanan, ug tan-awon ko kini matag gabii, nagbag-o sa akong pasalig nga makabaton og mahangturon nga pamilya.

Pipila ka tuig ang milabay nagtrabaho ko sa usa ka komersyal nga departamento sa dako nga kompanya. Usa ka adlaw ang among manager mipaila kanako sa usa bag-ong empleyado. Taas siya nga lalaki nga dunay madanihon nga blue nga mga mata, yano nga pahiyom, ug maayo nindot ang pamayhon.

Dili ko makatuo nga sa wala madugay nagsugod siya sa pag-ibid ibid nako. Akong gibati ang tumang kalipay! Sa una namo nga panag-date, na-excited kong mahibalo nga usa diay siya ka drummer sa banda nga nakasinati og mga kalampusan. Nahibaloan sab nako nga manabako siya ug moinom, apan nangatarungan ko nga, kay dili man siya miyembro sa Simbahan, dili kini sayop alang kaniya.

Nianang gabhiona sa akong pag-abut sa balay, ang akong hunahuna mao lamang kadtong ambongan nga batan-on. Apan sa dihang miluhod ko sa pag-ampo, akong nakita ang litrato sa templo, ug usa ka lahi nga pagbati ang miabut kanako. Gibaliwala ko kini ug natulog.

Sa pagkasunod adlaw, dihang nagkuyog mi, ang kamatuoran nga moinom siya ug manabako naghatag kanako og ngil-ad nga pagbati. Naulaw ko nga molingkod sa usa ka lamesa nga may mga ilimnon, bisan wala ko motandog bisag usa niini. Sa una excited ko ug dayon nasagmuyo dihang misulay siya sa paghalok kanako. Dihang akong napanimahoan ang sigarilyo ug bino sa iyang ginhawa, wala siya molampus sa iyang tinguha!

Miluhod ko kilid sa akong higdaanan sa pag-ampo nianang gabhiona, nagtan-aw sa litrato sa templo. Nakita nako nga dili kining matanga sa tawo ang makadala kanako ngadto sa templo alang sa mahangturon nga kaminyoon.

Mihigda ko og natulog, nga malipayong naghunahuna sa akong tumong nga magminyo sa takus nga tawo nga uban niya makaestablisar ko og mahangturong pamilya.

Bisan og ang drummer madanihon gihapon, ang iyang pagkaromantiko wala na makadani kanako. Nahibalo ko sa matang sa kaminyoon nga akong gusto.

Paglabay sa usa ka tuig naminyo ko sa Templo sa São Paulo sa usa ka takus nga naghupot sa priesthood nga akong gihigugma. Tugbang gayud ang paghulat og usa ka matinud-anon nga batan-ong lalaki kinsa makadawat uban nako nianang talagsaon nga panalangin gikan sa Ginoo.