Tan-awa sa Katapusang Pahina

Sa dihang nagpamiyembro ko sa Simbahan, naghinam-hinam kaayo ko sa family history work. Mibisita ko sa lokal nga mga archive aron sa pagsiksik diha sa publikong rekord og impormasyon sa akong katigulangan.

Akong nakita nga ang buhat mabungahon, apan dili sayon sa kanunay. Ang karaang agi sa pagsulat lisud kanunay basahon, ug pipila sa mga libro giagup-op na, nga nakapagrabe sa akong hubak. Apan, padayon gihapon ko sa pagsiksik kutob sa mahimo.

Usa ka adlaw nagsiksik ko kabahin sa akong lolo, nangita sa petsa sa natawhan. Nakakita ko og 1,500 ka pahina nga basahon nga makatabang. Apan unsaon na lang kon wala dinhi akong gipangita? Nagduha-duha ko nga mangita pa ngadto sa mas dako, abugong mga libro.

Nagsugod ko sa pagtan-aw-tan-aw sa sulod sa libro, nanghinaut nga makakita og pamilyar nga ngalan. Sa kalit lang, daw nakadungog ko og tawo nga misulti, “Sa katapusang pahina.” Mitan-aw ko sa palibut, apan ingon og walay tawo nga miistorya kanako. Nagpadayon ko ug nagbasa og pipila pa ka pahina. Dayon nakadungog ko pag-usab sa samang pulong: “Sa katapusang pahina.” Ingon nga nagduha-duha, gitan-aw nako ang katapusang pahina. Nakita nako ang kasagarang isulat didto: Summary sa mga bata nga natawo ug sumada sa tanang pahina. Ingkaso lang, gitan-aw nako ang gisundan niini nga pahina apan wala ra gihapon, busa gibalikan nako ang pahina nga akong gitan-aw kaganina.

Nabaling ang akong atensyon pag-usab sa hinay apan mapugsanong tingog: “Sa katapusang pahina!” Mihukom ko nga balikon ang katapusang pahina ug gibalik og basa ang pamilyar nga teksto sa makadaghan.

Dayon nakamatikod ko og usa ka butang nga wala nako mabantayi: sobra nga pahina nga gipapilit sa luyo sa hapin. Samtang akong gibasa ang gisulat sa pahina, nakita nako ang ngalan sa mga bata nga natawo sa naghinapos ang Disyembre. Didto akong nakita ang ngalan sa akong apohan ug nakasulat didto kon asa ug kanus-a siya natawo ug nabunyagan. Nahingangha ko apan mapasalamaton nga gigiyahan ko sa impormasyon nga akong gikinahanglan.

Ang family history usahay mahagiton, apan nasayud ko nga ang Dios naggiya ug nagtabang sa atong mga paningkamot.