“Naadik ako sa pornograpiya. Giguba niini ang akong kinabuhi. Unsay akong mahimo aron mahunong ang pagkaadik?”

Pag-ampo alang sa kalig-on. Si Enos nag-ampo sa tibuok adlaw, nangamuyo sa Ginoo nga mapasaylo ang iyang mga sala, ug tungod sa iyang hugot nga pagtuo, gibati niya ang hilabihan nga kalinaw ug ang kahasol sa konsensya nawala. Basaha ang mga kasulatan aron maangkon ang Balaang Espiritu, kon Siya imong kauban, dili ka makahunahuna o mohimo og hugaw nga mga butang. Basaha ang Salmo 24:3–5 (mahitungod sa pagpabilin sa kaugalingon nga limpyo). Ayaw pag-urong: magdula og sports, paglingaw-lingaw, ug ayaw tuguti nga maimpluwensyahan ka sa nagpakaaron-ingnon nga mga higala. Kon moabut ang mga tintasyon, pagmalig-on ug balibari kini. Hinumdumi nga ang Langitnong Amahan nahibalo sa tanan nimong gihuna-huna ug gibuhat.

Ang pornograpiya miguba sa akong kinabuhi, apan sa katapusan nahunong ra nako kini human sa daghang pag-antus. Ang proseso sa paghinulsol dugay ug lisud, apan pag-ampo sa tinuoray matag adlaw alang sa tabang sa Ginoo atol niini nga pagsulay. Ayaw gayud paghunahuna nga ikaw dili takus alang sa paghinulsol, kay ang Pag-ula alang man sa tanan. Hinumdumi usab nga sa matag higayon nga tintalon ka, naningkamot si Satanas sa pagbunlot kanimo ngadto sa pagpakasala. Apan sa kanunay imo ra kini nga pagpili sa pagnunot ba o pagbaliwala sa tintasyon. Ayaw gayud paghunong sa imong kaugalingon o sa Ginoo, kay dili Siya mohatag og pagsulay kanimo nga dili nimo mapas-an (tan-awa sa 1 Nephi 3:7).

Pakigsultihi dayon ang imong bishop sa pinakadali nga panahon. Lisud ang paghimo nianang una nga lakang, apan kinahanglang makigsulti ka kaniya aron sa paghinulsol. Dili ka niya himoon nga kataw-anan o masuko kanimo. Naghunahuna siya kanimo ug ang pinakamaayo lamang ang iyang gusto alang kanimo. Nag-antus si Jesukristo alang sa imong mga sala aron bation nimo nga gawasnon na usab gikan sa kasaypanan ug kasubo nga gibati nimo sa dugayng panahon (tan-awa sa Alma 5:9). Dili pa kaayo ulahi ang pag-usab. Bation nimo pag-usab ang tinuod nga kalipay. Pag-ampo sa Dios nga hatagan ka og kaisug nga maghinulsol.

Ang pornograpiya dili Iya sa Dios. Ang proseso sa paghinulsol dugay ug sakit, apan posible kini! Kinahanglan nga duna kay tinguha sa pag-usab, sa pag-ila sa gibug-aton sa sala, ug labaw sa tanan sa pagpangayo og tabang gikan sa Langitnong Amahan. Aron malikayan ang tintasyon, duna koy litrato ni Jesukristo tapad sa akong computer. Anaa Siya kanunay nagbantay kanako! Kon ang mga hulagway o musika sa pornograpiya mosulod sa akong hunahuna, mokanta ko og himno ug sa dili madugay kining dautan nga mga butang makalimtan ra.

Ang gahum sa pag-ampo dili mahulagway; naghatag kini kanato og kusog aron makasagubang sa mga kalisud ug magmadaugon (tan-awa sa D&P 10:5). Kon mangita ka sa Langitnong Amahan pinaagi sa pag-ampo, mohatag Siya kanimo og kusog aron makalingkawas gikan sa tintasyon. Kon magbasa ka sa mga kasulatan matag adlaw, madugangan ang imong kalig-on. Kon ikaw magasalig sa Dios ug dili sa kaugalingon nimong kusog, Siya mopalingkawas kanimo sa mga kadena nga naghigot kanimo. Pinaagi sa Pag-ula ikaw mamaayo.

Aduna ko niini nga problema. Naghasol gihapon kini kanako. Una sa tanan, hununga ang pagtan-aw og pornograpiya. Duola ang Langitnong Amahan. Akong gibati nga Siya mipasaylo kanako dihang wala ko magtuo nga mapasaylo diay ko. Ug dayon naghunahuna ko nga wala na koy problema. Dili ko gusto nga dunay tawo nga mahibalo mahitungod niini, maulaw kaayo ko. Apan kinahanglan kini nimong isulti sa imong bishop. Gisulayan nako nga dili himoon. Apan kanunay nakong nadungog ang mga pulong, “Kon duna kay problema sa pornograpiya, duola ang imong bishop.” Usa ka adlaw, sa interbyu alang sa akong rekomend sa templo, nasulti ko ra kini. Ug nindot kaayo ang akong gibati pagkahuman niini. Gawasnon na ako. Ang kabug-at nawala. Pagkahuman, gisultihan nako ang akong mga ginikanan. Naguol sila, apan gidawat nila kini. Ayaw kahadlok sa pagtug-an niini.

Nalulong ko sa pornograpiya sa dugay nga panahon. Pinaagi lamang sa suporta sa akong mga ginikanan ug sa tabang sa akong bishop nga sa katapusan nakalingkawas ko. Ang pagkontrolar sa akong paggamit sa internet o ang pipila ka semana nga dili makaambit sa sakrament mao ang gamayng kantidad nga bayaran alang sa kalipay nga mahimong limpyo. Ang propesyonal nga mga magtatambag makatabang usab ug dili ka nila hukman. Sila usab usa ka himan nga gihatag sa Ginoo kanato.