Mensahe sa Visiting Teaching
Pagpa-aktibo
Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana aron pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kinabuhi. Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Ang atong propeta, si Presidente Thomas S. Monson, miawhag nga “tabangan nato kadtong nagkinahanglan sa atong tabang ug agakon sila ngadto sa mas maayong agianan ug mas maayong dalan. … Buhat kini sa Ginoo, ug kon anaa kita sa buluhaton sa Ginoo, … aduna kita’y katungod sa panabang sa Ginoo.”1
Daghang tuig ang milabay si LaVene Call ug iyang kompanyon sa visiting teaching mibisita sa dili kaayo aktibo nga sister. Mituktok sila sa pultahan ug nakita ang batan-ong inahan nga naka-bathrobe. Morag may sakit siya, apan sa wala madugay ilang nasayran nga may problema siya sa ilimnong makahubog. Ang mga visiting teacher milingkod ug nakig-istorya sa nanlimbasug nga inahan.
Dihang nakabiya na, sila miingon, “Siya anak sa Dios. Kita may responsibilidad sa pagtabang niya.” Busa kanunay siya nilang bisitahan. Kada bisita, ilang makita ug mabati nga may maayong kausaban. Ilang gidapit ang sister sa pagtambong sa Relief Society. Bisan nagduha-duha, sa katapusan kanunay na siyang mitambong. Human sa pagdasig, siya, iyang bana ug anak misimba. Ang bana mibati sa Espiritu Santo. Siya miingon, “Buhaton nako ang gisugyot sa bishop.” Karon sila aktibo sa Simbahan ug nabugkos diha sa templo.2
Gikan sa mga Kasulatan
Gikan sa Atong Kasaysayan
Ang pagtabang niadtong nahisalaag nga mobalik sa ebanghelyo ni Jesukristo kabahin na sa usa ka Santos sa Ulahing mga Adlaw ug miyembro sa Relief Society. Si Presidente Brigham Young (1801–77) miingon, “Himoa nga kita adunay pagkamanggiloy-on diha sa matag-usa, … ug himoa nga kadtong makakita mogiya sa buta hangtud nga sila makakita sa agianan sa ilang mga kaugalingon.”3
Si Eliza R. Snow, ikaduhang kinatibuk-ang presidente sa Relief Society, mapasalamatong miila sa mga paningkamot sa mga sister sa Ogden, Utah, USA, sa paglig-on sa usag usa. “Nahibalo kaayo ako nga dagkong butang ang gidonar [kabahin sa pagserbisyo] nga wala masulat sa libro [sa rekord],” siya miingon. Apan miila nga may rekord sa langit alang sa buhat sa mga sister samtang mitabang sila adtong nabugnaw na, siya miingon: “Si Presidente Joseph Smith miingon nga kini nga kapunongan giorganisar aron pagluwas sa mga kalag. … Lain nga basahon ang gitipigan para sa inyong hugot nga pagtuo, inyong kamabination, inyong maayong mga buhat, ug mga pulong. … Walay nawala.”4
Paghulagway sa litrato pinaagi ni Robert Casey; background pinaagi ni Steve Bunderson