Nganong Nagbayad Gihapon Kamo og Ikapulo?

Pipila ka tuig na ang milabay ang akong bana nataktak sa trabaho. Ang iyang mga employer, klarong nagmahay sa ilang gibuhat, mitanyag niya og laing trabaho, apan kinahanglan kaming mamalhin ug lisud kini. Bisan pa niana, among nalantawan ang daghang mga panalangin, lakip na sa padayon nga panarbaho.

Apan, human makabalhin, among nadiskobrehan nga ang trabaho wala na. Walay usa nga resonabling mipasabut. Ang amo ra gayung nahibaloan mao nga anaa na sa bag-ong dapit, walay trabaho, ug hapit wala nay kwarta tungod kay among gibayran ang among mga utang ug migasto sa among tinigum sa pagbalhin.

Naningkamot ang akong bana kutob sa mahimo sa pagpangita og full-time nga trabaho. Sa kasamtangan nagtrabaho siyag bisan unsa, ug ako nag-handicraft, nga igo-igo ra nga ikasuporta namo human mobayad sa among ikapulo ngadto sa Ginoo. Nagdaginot gyud mi pag-ayo, apan dili sayon ang pagbayad sa mga galastuhan sa eskwelahan, pagpalit og pagkaon ug sinina ug pagpangita og kwarta nga gikinahanglan sa akong bana sa pagpangita og trabaho.

Pirme kaming mohilak, apan wala gayud kami mohunong sa pagsalig nga ang Ginoo mopanalangin namo. Ug nagpasalamat kami sa mga panalangin nga amo nang nadawat: mga anak nga babaye nga himsog ug matinud-anon, nagkahiusa nga kaminyoon, ug matinabangon nga mga paryente ug mga miyembro sa ward.

Daghang mga higala nga dili mga miyembro sa Simbahan mangutana namo, “Kon nanginahanglan kaayo mo, nganong nagbayad gihapon mo og ikapulo?” Ang tubag mao ra gihapon: tungod kay gisugo kini sa Ginoo, ug dili kami gusto nga mangawat sa Dios (tan-awa sa Malaquias 3:8–9).

Nasayud gayud kami nga kon kami magmasulundon, ang Ginoo mopanalangin namo—tingali dili sa among gilauman apan sa Iyang giisip nga labing maayo sa among pamilya. Wala gayud namo himoa nga rason ang problema sa kwarta sa paghunong sa pagserbisyo sa Ginoo; gani, ang among tinguha sa pagserbisyo Kaniya midako.

Karon ang akong bana adunay trabaho nga makatabang namo nga makabayad sa among nautang sa dihang siya wala pay trabaho. Taas-taas pa ang panahon usa pa kami makapahulay sa problema sa kwarta, apan nasayud kami nga kon among “dad-on … ang tibuok ikapulo ngadto sa balay tipiganan,” ang Dios mobukas sa tamboanan sa langit “ug mobu-bu [namo] og panalangin, nga wala na unyay dapit nga igong kabutangan sa pagdawat niini” (Malaquias 3:10).