Ang Pagluwas gikan sa Mina

Atol sa Gulf War, nangulo ako sa usa ka team sa mga sundalo didto sa Kuwait. Sa nalutsan na namo ang depensa, gipangita namo ang nahimutangan sa kaaway aron sa pagsiguro nga luwas kami ug mangita og bisan unsang mapuslanon nga impormasyon.

Mao pay pagsulod nako sa nailog nga command post sa dihang nakadungog ko sa usa ka British nga sarhento nga misinggit, “Hunong! Ayaw paglakang og lain!” Sa akong paglantaw gikan sa tagoanan, akong nakita ang usa sa akong mga sundalo nga diha sa kakuyaw. Naglakaw siya sa hawan aron sa pagkuha og dokumento ug karon nagtindog na sa tunga-tunga sa dapit nga daghang nakatagong bomba. Sa dihang nakadungog siya sa pagsinggit sa sarhento, mihunong siya ug nakaamgo nga anaa siya sa kakuyaw.

Nagpundok sa daplin sa mina, ang among team nakakita nga ang batan-ong sundalo nahadlok pag-ayo nga siya nagkurog. Kinahanglan kaming molihok dayon apan dili makapadala og sundalo sa pagkuha niya nga dili mamiligro ang ilang mga kinabuhi ingon man usab niya. Walay panagsabut o pagduhaduha nagsugod mi sa pagpakigsulti sa sundalo, naghupay niya, nag-awhag, ug naghatag og intruksyon. Nakita namo ang mga luha nga midagayday sa iyang nawong ug nakadungog sa nahadlok nga mga tubag, pero mikalma siya og diyutay sa among gihatag nga suporta.

Sa wala madugay nakabaton na siya og kaisug sa paglingi sa iyang giagian, ug miingon siya nga iyang nakita ang iyang mga tunob nga medyo hanap diha sa balas. Uban sa among pag-awhag, nagduhaduha siyang misubay pag-usab sa iyang dalan. Pinaagi sa pagtunob pag-usab sa iyang giagian, nakalingkawas siya gikan sa mina, among gigakos human sa katapusang lakang. Ang daghang mga sundalo nga diha misinggit sa kalipay sa among pag-welcome niya pag-usab. Mga luha sa kahadlok gipulihan sa mga pahiyom ug panaggakos.

Pipila nato ang nakabarug sa ngilit sa tinuod nga mina. Apan daghan nato nakaila niadtong espirituhanong mibiya sa luwas nga dapit aron malit-ag sa mina sa kinabuhi. Sama niadtong batan-ong sundalo, sila usab mibati nga nag-inusara, nahadlok, ug walay siguro. Apan kadto nga sundalo wala gayud mag-inusara. Duna siyay team nga diha nag-abiba kaniya, mga higala nga gustong makabalik siya ug wala mohunong. Duna siyay mga lider nga nagtanyag og giya ug pag-awhag. Siya ang kinahanglang mopalayo gikan sa mina, apan kaming tanan ang mitabang niya nga makakaplag og kalig-on sa pagbuhat sa ingon. Sa katapusan among gisaulog ang iyang pagkaluwas uban sa tinuod nga gugma ug kalipay.

Ang espirituhanong pagluwas mahimong sama niana. Motabang man kita isip pamilya, mga higala, o isip ward o branch, ang atong mga paningkamot makahatag sa kalainan. Tukma sa panahon nga mga pulong sa pag-awhag ug giya tingali nakaluwas sa kinabuhi sa sundalo. Mao usab, makatabang kita sa pagluwas sa uban gikan sa mga kadaot sa espirituhanong kangitngit pinaagi sa paghatag og awhag ug giya nga maoy makapabalik nila. Kon buhaton nato, dako ang atong kalipay—dili lamang sa makadiyot niini nga kinabuhi apan sa kahangturan usab (tan-awa sa D&P 18:15).