Unsaon nako sa pagpadayon sa panag-istoryahanay mahitungod sa ebanghelyo kon ang ubang tawo gusto lang makadaog sa debate? Ang mga tawo sama niana dili gusto nga makadungog og pagpamatuod.

Ang logic ug ang rason makatabang nato nga makasabut sa kamatuoran, dayag lang, ug posible sa paghimo sa argumento sa logic sa pagpanalipod sa Simbahan ug sa mga pagtulun-an niini. Apan kon ang usa ka tawo mas interesado nga modaog sa argumento kay sa pagsabut sa pagtuo sa laing tawo, ang panagbingkil maoy kanunay nga sangputanan. Pagmalig-on sa paghatag og pagpamatuod sa unsay inyong gituohan ug nasayran nga tinuod.

Kon ang tawo nga inyong gikaistorya mamugos sa isyu, pahibaloa kana nga tawo nga nagrespetar kamo sa iyang gituohan apan kinahanglang kamo dili mouyon. Ang pagpanaghisgot mahitungod sa relihiyoso nga mga pagtuo kinahanglang dili kabahin sa “pagdaog.” Ug kon kamo makigbingkil o masuko, kamo dili mahimong ehemplo sa unsay inyong gituohan, ni kamo makabaton sa Espiritu Santo uban kaninyo.

Si Elder Robert D. Hales sa Korum sa Napulog Duha ka mga Apostoles mitudlo nga kon makigsulti kita sa mga tawo mahitungod sa Simbahan, “ang atong tumong mao ang pagtabang nila nga makasabut sa kamatuoran, dili manalipod sa atong garbo o makapuntos sa teyolohikanhon nga debate. Ang atong kinasingkasing nga mga pagpamatuod mao ang labing gamhanan nga tubag nga atong ikahatag sa atong tig-akusar. Ug ang mao nga mga pagpamatuod mahatag lamang tungod sa gugma ug kaaghup.”¹

Ang mga butang sa Espiritu makat-unan “dili pinaagi sa makabibihag nga kaigmat sa mga pulong, kondili pinaagi sa pagpadayag sa Espiritu ug sa gahum” (1 Mga Taga-Corinto 2:4). Bisan og kini dili makausab sa hunahuna sa usa ka tawo, kinahanglan kamong mopamatuod ug mopahibalo sa mga tawo unsay inyong gituohan. Ug kon kamo mopakigbahin sa ebanghelyo, giunsa ninyo pagsulti ang mga butang tingali sama ka importante sa unsay inyong gisulti. Sulti nga mapailubon ug uban sa gugma. Sunda ang Espiritu ug kamo maaghat nga makahibalo unsay isulti (ug unsay dili isulti) ug unsaon sa pagtubag.