Presensya sa Simbahan Nagkalig-on sa South America, Report ni Elder Oaks ug Bednar

Ang pangbukas nga seksyon sa Mga Doktrina ug mga Pakigsaad naglakip sa mga propesiya nga ang Simbahan mopatim-aw “gikan sa kangiub ug gikan sa kangitngit” (1:30). Kana nga adlaw daw miabut na sa dakong bahin sa South America.

“Kita nakagawas na sa kangiub ug kangitngit,” matud ni Elder David A. Bednar sa Korum sa Napulog Duha ka Apostoles human sa iyang pagpauli gikan sa South America niadtong Oktobre. “Ang kamatuoran makita diha sa pamaagi sa gobyerno sa [South America] pagpasidungog sa Simbahan ug sa pagdawat sa mga representante sa Simbahan bisan kanus-a kami moabut.”

Si Elder Bednar gikuyugan ni Elder Dallin H. Oaks, usab sa Korum sa Napulog Duha ka Apostoles, niadtong Oktubre 19–28 nga pagbisita didto sa South America sa South Area, nga naglakip sa pagrebyu sa erya, mga miting sa misyonaryo ug mga lider sa priesthood, ug debosyonal sa mga kabatan-onan ug single adult nga gisibya sa Chile, Argentina, Uruguay, ug Paraguay.

Ang nagbisita nga mga authority nakighimamat sa sobra sa 1,800 ka misyonaryo nga nagserbisyo sa mga area sa upat ka mga nasud. “Milamano mi sa tanang mga misyonaryo nga among nahimamat, ug nindot silang tan-awon,” miingon si Elder Oaks. “Dalaygon kadto nga pwersa sa mga misyonaryo gikan sa North ug South America.”

Mga 15,000 ka tawo ang mitan-aw sa duha ka debosyonal alang sa kabatan-onan ug sa mga single adult sa erya. Si Elder Oaks nangulo sa debosyonal sa batan-ong single adult, nga gisibya ngadto sa 326 ka mga lokasyon sa tibuok erya. Si Elder Bednar mao ang nangulo sa debosyonal sa kabatan-onan, nga nakita sa mga kabatan-non gikan sa 10 ngadto sa 18 anyos ug ang ilang mga ginikanan nagpundok sa 439 ka mga lokasyon.

Sa matag pagbansay ug debosyonal, ang mibisita nga mga Kaigsoonan namulong sa ka-importante sa pag-angkon og mas kusog nga “tinuod nga pagtubo” pinaagi sa dugang nga pagtambong sa sacrament, mga endowment sa templo ug kaminyoon, ug kabatan-onan nga nagserbisyo og mga full-time nga misyon.

Sa debosyonal sa kataban-onan, ang batan-ong mga lalaki ug mga babaye gi-imbitar sa pagpangutana. Ang mga General Authority mitubag sa nagkadaiyang mga pangutana bahin sa pagpangandam sa misyon ug sa pagpabiling matarung dinhi sa nagkadautan nga kalibutan.

Ang mga Kaigsoonan mitambag usab sa mga lokal nga mga lider sa priesthood nga ang tinuod nga pagtubo matuman sa area pinaagi lamang sa dugang nga serbisyo sa misyonaryo ug retensyon. Ang mabungahong kusog sa mga nakahuman na og misyon gikinahanglan aron dunay umaabut nga henerasyon sa lig-on nga mga lider, matud ni Elder Oaks.

Si Elder Mervyn B. Arnold sa Seventy, Presidente sa Erya niadtong panahuna, mihulagway sa pagbisita sa mga General Authority ug sa ilang mga asawa isip “makadasig, makapabayaw, ug puno sa impormayon.”

“Ang ilang gugma, kabuotan, ug panudlo sa kanunay mahinumduman,” siya miingon.