Pagsunod sa mga Baruganan sa Pagpaningkamot sa Kaugalingon

Sa milabayng walo ka tuig, kining 46 anyos nga amahan sa unom ka bata nagtrabaho ug nag-eskwela aron makakuha og degree sa agronomy. Ang pagtuon ni Luis naglakip sa pagbiyahe og mga 60 ka milya (97 km) gikan sa gamayng lungsod sa Achacachi aron moeskwela sa Universidad Mayor de San Andres. Bisan ining sakripisyo, malampusong nahuman ni Luis ang iyang edukasyon ug karon nag-focus sa iyang sunod nga tumong nga makaangkon og kaugalingong umahan.

Si Luis maayong ehemplo sa pagpaningkamot sa kaugalingon sa temporal nga mga butang, sama sa trabaho, welfare, ug pagtipig og pagkaon. Apan ang baruganan sa pagpaningkamot sa kaugalingon espiritwal ingon man temporal. Si Elder Robert D. Hales sa Korum sa Napulog Duha ka mga Apostoles mihulagway sa pagpaningkamot sa kaugalingon nga “pag-angkon og responsibilidad alang sa atong kaugalingon nga espiritwal ug temporal nga kaayohan ug alang niadtong mga gisalig kanato sa Langitnong Amahan nga atong ampingan.”¹

Ang Ginoo miingon nga wala Siya maghatag og balaod nga temporal lang (tan-awa sa D&P 29:34–35). Tingali ang sugo sa pagtrabaho gituyo sa pagpanalangin nato sa espiritwal sama sa pagsangkap kanato sa pisikal (tan-awa sa Genesis 3:17–19).

Ang mga panalangin sa temporal nga pagpaningkamot sa kaugalingon maklaro panahon sa krisis sama sa natural nga kalamidad, walay trabaho, o kawad-on. Apan ang espiritwal nga pagpaningkamot sa kaugalingon susama ka kritikal ini nga panahon. Kadtong may lig-ong espirituhanong pundasyon mapanalanginan og kalinaw, kasiguroan, ug mas lig-ong pagtuo kon mangamuyo sa Langitnong Amahan og tabang.

Ang mga lider sa Simbahan mitambag nato sa pagpangandam sa espiritwal nga krises. Si Presidente Boyd K. Packer, Presidente sa Korum sa Napulog Duha ka mga Apostoles, miingon:

“Kita gitudloan na sa pagtipig og … pagkaon, sinina, ug, kon mahimo, sugnod—diha sa balay. …

“Dili ba nato makita nga susamang baruganan ang magamit sa inspirasyon ug pagpadayag, pagsulbad sa mga problema, pagtambag, ug paggiya? …

“Kon kita mawad-an sa atong emosyonal ug espirituhanong kagawasan, atong pagpaningkamot sa kaugalingon, kita mahimong mahuyang sama ka dako, tingali mas labaw pa, kay sa kita magsalig sa materyal nga paagi.”²

Ang pagpaningkamot sa kaugalingon kinahanglang dili masaypan nga hingpit nga di magsalig. Sa katapusan, kita nagsalig sa Langitnong Amahan sa tanang butang (tan-awa sa Mosiah 2:21). Kita nanginahanglan sa Iyang padayong paggiya, pagpreserbar, ug proteksyon.

Kita usab nagsalig sa usag usa. Tungod kay kita gihatagan og lain-laing espirituhanong gasa, kita gipaabut nga mopakigbahin aron ang tanan mapanalanginan (tan-awa sa D&P 46:11–12). Ang yawe mao nga mahimong mapaningkamuton sa kaugalingon diin kita makahimo, makaserbisyo sa uban, ug makatugot sa uban nga mapanalangin sa pagserbisyo nato kon gikinahanglan.

Kon mas mapaningkamuton ta sa kaugalingon—sa espiritwal ug temporal nga paagi—mas may abilidad kita nga mahimong instrumento sa kaayohan. Si Elder Hales mipasabut: “Ang atong katapusang tumong mao ang pagkahimong sama sa Manluluwas, ug kana nga tumong gipadako pinaagi sa atong dili hinakog nga pagserbisyo ngadto sa uban. Ang atong abilidad sa pag-alagad mahimong mapadako o mapagamay pinaagi sa matang sa atong pagka mapaningkamuton sa kaugalingon.”³

Nakita ni Luis Quispe ang iyang pagkamatinguhaon ug pagsalig sa Ginoo nga miresulta sa temporal nga mga panalangin diha sa trabaho, degree sa kolehiyo, ug mas lig-ong pamilya. Usab, kadtong temporal nga mga paglambo nakapalig-on sa iyang pagtuo. Iyang gisunod ang tambag ni Presidente Spencer W. Kimball (1895–1985): “Walay tinuod nga Santos sa Ulahing mga Adlaw, samtang makahimo sa pisikal o emosyonal, ibalhin ang responsibilidad sa kaayohan sa iyang kaugalingon o pamilya ngadto sa uban. Kutob siya makahimo, ubos sa inspirasyon sa Ginoo ug iyang pagpaningkamot, iyang sangkapan ang iyang kaugalingon ug pamilya sa espiritwal ug temporal nga panginahanglan sa kinabuhi.”⁴