Ang Ikapulo Makapakabig

Nahimong isyu ang pagbayad sa ikapulo sa among pamilya dihang nagpamiyembro among anak sa Simbahan. Anang higayona, ang akong bana ug ako dili mga miyembro. Siya aduna nay iyang kinitaan, apan tungod kay nagpuyo siya uban namo, among gihiusa among kinitaan. Dili nako mahunahuna kon unsaon namo pagbadyet nga wala na ang 10 porsyento sa iyang kinitaan dihang mihukom siyang mobayad sa ikapulo, apan hinay-hinay naanad ko. Kon iya nang ihatag iyang sweldo, una nakong pangutana, “Imo na bang gilain ang imong ikapulo?”

Nainteresado ko sa pagkat-on sa ebanghelyo, apan mihukom kong dili magpamiyembro sa Simbahan tungod kay mobayad ko og ikapulo. Duha ka bayad sa ikapulo sa badyet sa usa ka pamilya sobra ra kaayo!

Human og sige’g simba sobra sa usa ka tuig, mibati kong dili kontento ug wala mahimutang. Samtang namalandong ug nag-ampo, nakaamgo ko nga ganahan kong mobayad og ikapulo. Natingala ko sa akong tinguha, kay supak ko ini sa una.

Pagkasunod Dominggo, nangayo ko sa presidente sa branch og tithing slip. Nasagmuyo ko pagkadungog nga dili ko makabayad og ikapulo, hangtud mamiyembro ko. Apan, makahatag ko og donasyon. Busa nagdonar ko og 10 porsyento sa akong kinitaan sa Simbahan sa Ginoo. Diha-diha dayon mibati ko og kahupay, kalipay, ug katagbawan. Dili nako kapaabut sa adlaw sa akong bunyag aron makabayad ko og ikapulo.

Nasayud ko nga ang temporal nga mga panalangin nga natagamtam sa among pamilya gumikan sa pagbayad og ikapulo. Apan ang pinakadakong panalangin mao ang dili hitupngang pagbati kon mosunod ta sa atong Langitnong Amahan: katagbawan gumikan sa pagkamasulundon, pagsalig nga dili ta pasagdan sa atong Langitnong Amahan, ug pagbati sa kalinaw ug kalipay.