Wala Ko Makahibalo Nganong Anaa Ko Didto
Amber Cheney, Alabama, USA
Paghulagway pinaagi ni Kathleen Peterson
Ang akong mama ug ako bag-o lang gyud nahuman sa among ginabii nga pag-ampo. Naggakos mi ug miingon og,“gihigugma ko ikaw.” Dayon misulod na ko sa akong kwarto. Sa dihang migunit na ko sa gunitanan sa pultahan, kusog kaayo ang pag-aghat sa akong hunahuna nga ugma mamatay na si mama.
Ang akong utok ug kasingkasing nagkigbisug sa maong hunahuna. Dili na mahimong mahitabo sa akong mama. Maayo ra ang tanan alang kaniya.
Sa diha na ko sa kwarto, miluhod ko sa pag-ampo ug misulti sa Langitnong Amahan nga ang pag-aghat bahin ni mama dili mahimong tinuod. Mihangyo ko Kaniya nga kuhaon intawon kining hunahuna, apan dili kini mopahawa. Mibalik ko sa kwarto sa akong ginikanan ug misulti sa akong mama nga mogakos ko og kausa pa ug mohalok sa dili pa ko matulog. Nagbinayloay na usab kami og ingon, “gihigugma ko ikaw,” ug mibalik ko sa akong kwarto. Dugay-dugay kong nakatulog nianang gabhiona.
Sa dihang mibangon na ko pagkabuntag, gikulbaan ko. Salamat, anaa ang akong mama, malipayon ug piskay. Apan sa akong hunahuna, anaa lang gihapon kana nga pagbati nga dunay dili husto. Atol sa miting sa puasa ug pagpamatuod nianang adlawa, mibarug si mama og mipakigbahin og maanindot nga pagpamatuod.
Human sa miting sa sacrament mipadayon siya sa pagtudlo sa klasi sa Primary, ug miadto ko sa Sunday school. Laing pag-aghat na usab ang akong nabati, niining higayona sa pagbarug ug pagbiya sa Sunday School. Dili ko buot nga maoy sentro sa atensyon, apan naa gayuy nag-aghat nako sa pagbiya sa akong gilingkoran ug mogawas. Sulod sa pipila ka minutos, didto na ko naglingkod sa klase sa akong mama sa Primary naminaw niya nga nagtudlo. Wala ko kahibalo nganong anaa ko didto, apan nakahibalo ko nga kinahanglan ko nga anaa didto.
Nianang pagkahapon sa balay sa akong igsoong lalaki, mitutok si mama diretso sa akong mga mata sa katapusang higayon samtang natumba siya ug namatay gumikan sa pulmonary embolism. Alang sa Iyang mga rason ug sa Iyang kalooy, ang Langitnong Amahan mipadala sa Espiritu Santo aron maandam ko. Kadtong mga pag-aghat mihatag kanakog sobra nga panahon uban sa akong mama nga dili unta nako matagamtam kon ako pang gibaliwala ang hinay, gamay nga tingog.
Ang gugma sa akong Langitnong Amahan wala pa sukad nga ingon ana ka klaro ngari kanako hangtud sa mga panghitabo sa pagkamatay sa akong mama. Pagkabulahan nato nga naa ang Amahan sa Langit kinsa naghigugma kanato nga mihatag nato sa espesyal nga gasa sa Espiritu Santo.