Pagtudlo sa Kabatan-onan kon Unsaon sa Pagpangulo sa Pamaagi sa Manluluwas
Ni Carol F. McConkie
Unang Magtatambag sa Kinatibuk-ang Kapangulohan sa Young Women
Ang atong kabatan-onan dili lang mga lider sa umaabut. Sila mga lider karon. Makatabang kita kanila sa pagpangulo sama sa Manluluwas.
Ngadto sa mga ginikanan ug mga lider sa kabatan-onan, si Elder David A. Bednar sa Korum sa Napulog Duha ka mga Apostoles namulong mahitungod sa sensitibo nga balanse nga kinahanglan natong pangitaon: “Dapita ang mga batan-on sa paglihok. Kinahanglan naa mo, apan kinahanglan tugutan ninyo ang kabatanan-onan nga maoy mogiya. Kinahanglan kamong mohatag og direksyon apan dili mokontrol.”1
Ang mga ginikanan ug mga lider makatabang sa batan-ong mga lalaki ug batan-ong mga babaye nga makat-on sa mga baruganan nga nag-andam kanila sa pagpangulo diha sa pagkamatarung ug sa pagtukod sa gingharian sa Dios dinhi sa yuta.
Sa dihang ako 14 anyos, nakahimamat ko og pipila ka batan-ong mga babaye nga maayo kaayo nga mga lider. Nianang higayuna, ang akong pamilya mibalhin ngadto sa laing bahin sa Estados Unidos ug nahimong sakop sa bag-o nga ward. Wala ko kahinumdom kinsa ang nagserbisyo sa kapangulohan sa klase sa Mia Maid, apan klaro nakong nahinumduman ang batan-ong mga babaye nga mabination kaayo kanako. Sinsero nilang gidawat ang nahadlok ug niwang nga bag-ong batang babaye isip higala nga dugay nang nawala ug mipabati nako nga welcome. Nagagikan sa Delaware, diin ako mao ang bugtong Mormon nga batan-ong babaye sa akong junior high school ug ang laing Mormon nga batan-ong babaye nga akong nailhan nagpuyo og usa ka oras nga pagdrayb gikan sa akong balay, ako naghunahuna, “Kini tingali sama sa langit!”
Sa unang higayon sa akong kinabuhi, ako adunay grupo sa mga higala kinsa nagsunod sa mga sumbanan sa Alang sa Kalig-on sa Kabatan-onan, midapit kanako sa pag-apil sa mga kalihokan, ug mipakigbahin sa ilang mga pagpamatuod sa ebanghelyo ngari kanako. Ang ilang mga ehemplo sa mahigugmaong pagbati dako og nahimo aron duol ako sa Ang Simbahan ni Jesukristo sa mga Santos sa Ulahing mga Adlaw niana nga panahon kay sa bisan unsa nga pakigpulong o leksyon. Sa ilang gugma ug kahayag nga sama kang Kristo, sila mao ang mensahe sa ebanghelyo ni Jesukristo, ug sila ang nangulo ug naggiya kanako ngadto sa Iyang panon.
Unsa man ang nakapahimo sa akong bag-ong mga higala nga maayong mga lider?
Usa ka batan-ong misyonaryo yano kaayong mihatag og kahulugan sa pagpangulo. Miingon siya: “Kita kinahanglan nga anaa sa tukma nga dapit sa tukma nga panahon nagbuhat sa kabubut-on sa Ginoo ug nagtabang sa tawo nga nagkinahanglan sa atong tabang. Kana ang nakahimo kanato nga usa ka lider.”2 Pinaagi sa kon si kinsa sila ug ang Kahayag ni Kristo nga nagdan-ag diha kanila, matinud-anon nga batan-ong mga lalaki ug batan-ong mga babaye sa tibuok niini nga Simbahan adunay kapasidad sa pagpangulo diha sa pamaagi sa Manluluwas ug “motabang sa ubang mga tawo nga mahimong tinuod nga sumusunod ni … Jesukristo.”3
Isip mga lider kita mangulo, mogiya, ug mosuporta sa atong batan-ong mga lalaki ug batan-ong mga babaye. Apan ang kapangulohan sa klase ug korum maoy responsable sa pagpangulo ug pagdumala sa buluhaton sa ilang mga klase ug mga korum, lakip ang pagpili sa mga leksyon sa Dominggo ug pagplano og mga kalihokan sa adlaw sa semana. Ang mga lider sa klase ug korum gitawag ug gi-set apart ubos sa direksyon niadtong kinsa naghupot sa mga yawe sa priesthood; sa ingon sila adunay awtoridad sa pagpangulo ug sa paglig-on sa ubang kabatan-onan. Sila mosunod sa ehemplo sa Manluluwas ug sa pagkat-on sa pagserbisyo sama sa Iyang pagserbisyo ug sa pagpangalagad sama sa Iyang gibuhat.
Mga Oportunidad sa Pagpangulo sa Kabatan-onan
Ang pagpangulo magsugod diha sa panimalay. “Ang pagbuhat sa atong katungdanan ngadto sa Dios isip mga ginikanan ug mga lider magsugod sa paggiya pinaagi sa ehemplo—makanunayon ug makugihon nga pagsunod sa mga baruganan sa ebanghelyo diha sa panimalay,” mitudlo si Elder Robert D. Hales sa Korum sa Napulog Duha ka mga Apostoles. “Kini nagkinahanglan og matag adlaw nga determinasyon ug kakugi.”4 Ang mga ginikanan motudlo sa doktrina ni Kristo. Sila motabang sa kabatan-onan sa paghimo ug pagtuman sa mga tumong. Ang Personal nga Kauswagan ug Katungdanan ngadto sa Dios makatabang sa kabatan-onan nga molig-on ang ilang mga pagpamatuod ni Jesukristo, nga andam sa paghimo ug paghupot og sagradong mga pakigsaad, ug pagtuman sa ilang balaanong mga tahas ug mga responsibilidad sa pamilya, sa panimalay ug sa Simbahan.
Sa simbahan, ang mga lider sa Aaronic Priesthood ug Young Women makatabang sa kabatan-onan nga nagserbisyo sa kapangulohan sa korum ug klase nga makasabut sa ilang sagrado nga katungdanan ug mopalambo sa ilang mga calling sa pag-amuma ug paglig-on sa ubang tanang mga miyembro sa korum ug sa klase.
Isip hamtong nga mga lider, kita moandam sa kabatan-onan sa pagdumala sa mga miting sa korum ug klase ug mga kalihokan sa Mutual. Makigkita kita sa kabatan-onan diha sa mga miting sa kapangulohan samtang sila motino sa mga paagi sa pagpangalagad niadtong kinsa nanlimbasug, nga molakip sa tanang kabatan-onan diha sa mga leksyon sa Dominggo, ug sa pagplano og mga kalihokan, mga proyekto sa pagserbisyo, mga kamping, ug mga komperensya sa kabatan-onan.
Kita moawhag sa mga kapangulohan sa kabatan-onan sa pagtabang sa tanang mga miyembro sa korum ug klase sa pag-apil sa matag aspeto sa buhat sa kaluwasan, lakip sa misyonaryo nga buhat sa miyembro, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug sa pagtudlo sa ebanghelyo.5 Ang mga kapangulohan sa kabatan-onan motabang sa tanang batan-ong mga lalaki ug batan-ong mga babaye nga makakat-on sa hingpit nga kalipay ug sa panalangin sa pagserbisyo sa ngalan sa Manluluwas ug sa pagpakaon sa Iyang karnero.
Ang buhat sa mga lider dili mahitungod sa nindot nga tan-awon nga handout [Pinterest-perfect handouts] o sa paghatag og puno sa kamatuoran nga mga lecture. Kita makatabang sa batan-ong mga lalaki ug batan-ong mga babaye sa pagkat-on ug paggamit sa mga baruganan nga makatabang kanila sa pagpangulo sa pamaagi sa Manluluwas. Ang mosunod mao ang upat niini nga mga baruganan.6
Mangandam sa Espirituhanon nga Paagi
Tabangi ang kabatan-onan nga makasabut sa gahum sa ilang personal nga espirituhanong pagpangandam. Tudloi sila sa paggamit sa hugot nga pagtuo diha sa mga pakigsaad nga ilang gihimo sa ordinansa sa sakrament. Ang ilang pagkaandam sa pagdala diha kanila sa ngalan ni Kristo, sa paghinumdom Kaniya, ug sa pagsunod sa Iyang mga sugo mopasarang kanila sa kanunay sa pakig-uban sa Espiritu Santo. Sila dili mag-inusara sa ilang pagserbisyo kon sila makahimo sa pagdawat, pag-ila ug pagsunod sa mga aghat sa Espiritu Santo.
Sila makaandam sa espirituhanong paagi pinaagi sa pagtinguha sa giya sa matinguhaong pag-ampo ug pagsiksik sa mga kasulatan alang sa mga tubag. Sila maningkamot sa pagsunod sa mga sugo aron ang Espiritu Santo mamulong ngadto kanila sa ilang mga kasingkasing ug hunahuna nga sila unta mobati ug masayud kinsa ang nagkinahanglan sa ilang tabang ug unsay ilang mahimo. Sila mobati sa tiunay nga gugma ni Kristo alang sa matag sakop sa klase o korum.
Ang espirituhanong pagpangandam naghatag sa mga kabatan-onan sa pagsalig nga sila mga tinugyanan sa Ginoo ug nga sila anaa sa Iyang buluhaton (tan-awa sa D&P 64:29).
Moapil diha sa mga Konseho
Tudloi ang kabatan-onan sa sukaranang kapunongan ug sa gahum sa pagpadayag sa mga konseho samtang sila moapil niining balaanong gihimo nga proseso diin ang Simbahan sa Ginoo gidumala ug ang mga indibidwal ug mga pamilya mapanalanginan.7 Ang mga miting sa bishopric youth committee ug sa kapangulohan sa korum ug sa klase mao ang mga konseho diin ang kabatan-onan makat-on sa ilang mga katungdan ug makadawat og mga responsibilidad sa pagpangalagad ngadto sa uban.
Mga miyembro sa mga konseho:
-
Nagkahiusa sa ug mosunod sa direksyon sa mga lider sa priesthood, kinsa naghupot sa mga yawe sa priesthood.
-
Mopakigbahin sa ilang mga hunahuna ug mga ideya diha sa diwa sa pagkamatarung, pagkabalaan, hugot nga pagtuo, hiyas, pailub, gugma nga putli, ug inigsoon nga pagkamabination.
-
Magtambayayong, ingon nga gigiyahan sa Espiritu Santo, sa pagplano sa unsay ilang buhaton sa pagtabang niadtong nanginahanglan.
Mangalagad ngadto sa Uban
Ang kabatan-onan mangulo sa pamaagi sa Manluluwas kon sila mangalagad uban sa gugma ug pagkamabination. Si Joseph Smith mitudlo: “Walay laing labing maayo nga butang nga modala sa katawhan sa pagbiya sa sala kay sa pag-agak kanila, ug pag-amuma kanila uban sa kalumo. Kon ang mga tawo mopakita og bisan gamay nga pagbati ug gugma ngari kanako, O unsa ka gamhanan kini sa akong hunahuna.”8
Ang Manluluwas mitudlo sa talagsaon ug hilabihan nga bili sa matag kalag (tan-awa sa D&P 18:10–15). Tabangi ang atong kabatan-onan nga makasabut sa mahimayaon nga kamatuoran nga si Jesukristo mitugyan sa Iyang kinabuhi ug miabli sa agianan aron ang tanan mahimong moduol ngadto Kaniya. Sa pagpasalamat alang sa unsay Iyang nabuhat, ang tinuod nga mga sulugoon sa Ginoo motabang ug mangalagad nga mahigugmaon ngadto sa matag batan-ong mga lalaki ug sa matag batan-ong babaye, nga alang kanila ang Manluluwas misakripisyo sa tanan.
Magtudlo sa Ebanghelyo ni Jesukristo
Tabangi ang batan-ong mga lalaki ug batan-ong mga babaye sa pag-ila sa mga oportunidad sa pagtudlo sa ebanghelyo ug makasabut nga ang ilang labing importante nga pagtulun-an mao ang ilang ehemplo. Samtang ang kabatan-onan nagpuyo sumala sa mga pulong sa mga propeta ug nagsunod sa mga sumbanan sa Alang sa Kalig-on sa Kabatan-onan, sila nangulo sa pamaagi sa Manluluwas. Pinaagi sa kaligdong sa ilang mga pulong ug mga lihok, sila nagpakita kon unsay gipasabut nga mahimong usa ka tinuod nga disipulo ni Jesukristo. Sila mobarug ingon nga Iyang mga saksi nga walay pagpakaaron-ingnon. Dayon, kon sila mohatag sa pagpamatuod, motabang sa pagtudlo og leksyon sa Dominggo, o sa pagpakigbahin sa kamatuoran sa ebanghelyo uban sa ilang mga higala, sila mapuno sa Espiritu ug ang ilang mga pulong adunay gahum sa pagkabig.
Mangulo sa Pamaagi sa Manluluwas
Ang pagpangulo sa pamaagi sa Manluluwas mao ang usa ka sagrado nga pribilehiyo nga nagkinahanglan sa kabatan-onan sa paghatag sa ilang labing maayo samtang sila moserbisyo sa Ginoo diha sa panimalay, sa Simbahan, ug sa komunidad. Ang batan-ong mga lalaki ug batan-ong mga babaye kinsa mangulo sa pamaagi sa Manluluwas mahimong mensahe sa ebanghelyo ni Jesukristo, ang tubag sa pag-ampo sa usa ka tawo, ang mga anghel kinsa mangalagad ngadto niadtong nanginahanglan, ug ang kahayag ni Kristo ngadto sa kalibutan.