Pag-ampo sa Akong Pagpadulong sa Rotuma

Imahe

illustration of a ship at sea

Paghulagway pinaagi ni Allen Garns

“Ang Westerland mibiya gahapon,” ang akong bayaw miingon samtang siya mitimbaya kanamo sa Nadi International Airport sa Fiji.

Naguol ko ug nasagmuyo sa balita. Ang MV Westerland mao ang barko nga unta modala kanamo aron moduaw sa akong magulang nga lalaki sa Isla sa Rotuma. Ang Rotuma gibana-bana nga 375 ka milya (600 km) sa amihanang-kasadpan sa Viti Levu, ang labing dako sa mga isla sa Fiji. Kon dili nimo maabtan ang barko, kinahanglan gyud kang maghulat og mga adlaw o gani mga semana alang sa sunod nga sakay.

Usa ka tuig ang milabay miadto na ko sa Rotuma aron sa pagtabang sa akong igsoon nga lalaki nga ayohon ang balay sa among lola, ug ako mibiya kaniya tungod sa usa ka panagsumpaki kalabut sa trabaho. Karon gusto kong magkaatubang mi ug mosulti kaniya kon unsa kadako ang akong pagbasol.

Usa ka semana sa wala pa ang akong asawa, si Akata, ug ako mibyahi ngadto sa Fiji gikan sa Australia, ang akong pag-umangkon nga babaye miingon nako nga ang Westerland mogikan paingon sa Rotuma usa ka adlaw sa dili pa mi moabut. Mitawag dayon ko sa opisina sa barko ug mihangyo nila nga pugngan una ang byahe sulod sa duha ka adlaw.

“Dili, dili namo mahimo bisan kon gustohon pa namo,” maoy tubag. “Ang Rotuma Island Council nakahimo na og pagpangandam alang sa pag-welcome sa kapyestahan, ug ang barko kinahanglan molawig sigun sa eskedyul.”

Sa kalit lang naay nisulod sa akong hunahuna, ug mihukom ko nga magpuasa ug mag-ampo.

“Minahal nga Langitnong Amahan,” ako nag-ampo, “ganahan gayud kaayo ko nga makasakay nianang barko paingon sa Rotuma. Mituo ko nga dili na nila mapugngan ang paglarga og laing adlaw o duha, apan anaa Kanimo ang gahum nga mahimo kini. Kon mahimo palihug bisan usa lang ka tornilyo ang matang-tang bisan asa diha sa barko aron lang malangay ang byahe nga makasakay ko? Nagkinahanglan kaayo ko moadto sa Rotuma ug makig-uli sa akong igsoong lalaki.”

Human makadungog sa makaguol nga balita, mipaingon mi sa pantalan sa pikas bahin sa isla. Didto, bisan pa niana, among nahibaloan nga naabiriya ang makina sa barko ug wala pa kagikan. Gidungog ang akong pag-ampo sa Langitnong Amahan! Ang resulta, ang tibuok nga makina—dili lang usa ka turnilyo—kinahanglang habwaon tungod sa pag-agas sa acete.

Sa dihang milarga na sa katapusan ang barko human sa usa ka semana, nakasakay ko. Sa dihang miabut ko sa Rotuma, migakos ko sa akong igsoon lalaki ug nangayo og pasaylo, ug ang among maayong relasyon nabalik. Sigurado gyud nga adlaw kadto sa kasadya.

Hangtud sa hangtud kong mapasalamaton alang niining maanindot nga espirituhanon nga kasinatian ug alang sa gipahiuli nga ebanghelyo ni Jesukristo. Mao kini usa ka pagpamatuod nga ang mga milagro mahitabo pa gihapon karon, nga ang Langitnong Amahan buhi ug motubag sa sinsero nga mga pag-ampo, nga ang pag-ampo ug pagpuasa magkuyog, ug nga ang ebanghelyo tinuod—bisan diha sa gamay nga balangay sa gamay nga isla sa Rotuma.