I Aki Ataia bwa Bukin tera I Mena Ikekei
Amber Cheney, Alabama, USA
Korotamnei iroun Kathleen Petersen
Tinau ao Ngai e a tibwa bane ara tataro n te tairki. Ti rabwatiira ao n taekina, “I tangiriko.” Imwiina I nakon au ruu ni matu. Ngke I kaainakoa baiu nakon bwain kaukan te mataroa, te namakin ae korakora e roko n au iango bwa te boong are imwiina e na mate tinau.
Kaburorou ao nanou a kataia n un ma iangoana. Akea te kawai are te bwai teuana e na kona n riki nakon tinau. A na bane n tamaroa bwaai ni kabane ma ngaia.
Ngke I mena inanon au ruu, I katorobubua n tataro ao n tuanga te Tama are i Karawa bwa te namakin ibukin tinau e na aki koaua. I butiia bwa e na taiaoka ni kanakoa te iango aio, ma e aki nako. I oki rikaaki nakon aia ruu au karo ao n tuanga tinau bwa I tangira rabwatakiu ao te kaboria teuana rikiimwaain nakou ni matu. Ti a manga atonga riki, “I tangiriko,” ao I oki nakon au ruu. E ana au tai imwaain ae I a matunako n te tairiki anne.
Ngke I a uti n te ingaboong are imwiina, I a nako n nano. Kakaaitau, bon iai tinau, e kukurei ao ni marurung. Ma inanon au iango, I teimatoa n tiku irou te namakin bwa iai te bwai ae e aki tamaroa. N tain te aki mamatam ao ni kaoti koaua n te boong anne, Tinau e teirake ao ni kaota ana kakoaua ae tamaroa.
Imwiin te bootaki n toa e nako n reireiniia ana kiraati n te Buraimwari, ao ngai I nakon te Reirei n Taabati. I a karekea te namakin ae okoro, nteirake n te tai aio ni kitaana te Reirei n Taabati. I aki tangiria n katika mataia aomata nakoiu, ma te bwai teuana ae e kateirakeai man au kaintekateka ao n otinako n te mataroa. Inanon tabeua te miniti, I a kuneai n tekateka inanon ana kiraati ni Buramwari tinau n ongora nana reirei. I aki ataia bwa bukin tera I mena ikekei, ma I ataia bwa I kainnanoaki bwa N na mena iai.
Imwiina n te bwakantaai anne inanon ana auti tariu, tinau e tarai matau ibukin te kabanea n tai ngke e a bwaka ao ni mate man te raraa ae bwanin inanon mamaana. Ibukin Ana iango ao Ana nanoanga, te Tama are i Karawa e kanakoa te Tamnei ae Raoiroi ni katauraoai. Wirikiriki akanne anganai au tai ma tinau are N na bon aki tia ni kimwareirei iai ngke I mwanuokina te bwanaa ae rau, n uarereke.
Ana tangira te Tamau are i Karawa e a tia n aki rangi n teretere raoi nakoiu ni karokoa te tai are e a motirawa iai tinau. Ai kakabwaiara ngaira n iai te Tama are i Karawa are e tau ana tangirira n anganiira te bwaintituaraoi ae onoti mai iroun te Tamnei ae Raoiroi.