Au Kakae ibukin te Koaua

Tamnei

illustration of young men and a woman talking

Kamatata n te korotamnei iroun Dan Burr

N rikirakeu n aban Atia ae korakora iai te kaiangatoa ao akea te aro iai, iai au iango n taainako bwa N na riki bwa te aomata ae nakoraoi arona, ma akea au atatai n reirei aika akea tokiia ke koaua ake a na kairai. N abau, “te nakoraoi” nanona te maiu ni kaubwai ao te kakannato.

Aki toki n reireinai au karo bwa a kakeaa te Atua. Ibukiia, te aro ke te Atua bon te bwai ae akea manenana ao tii ibukiia aomata aika akea aroia. N n te tai ae maan ao I aki kakoaua te Atua. A reireinai bwa I riai n aki onimakina temanna ma bon tii ngai. Ngaia are n rorou n ataei I a tia ni kamanenai au iango aika korakora bwa kaungaakiu ni kamatebwai ao te mwakuri ae matoatoa.

E rang korakora aia kantaninga au karo ibukiu. A tangira bwa e na totooka au bwi ieta n taainako. E karika nanokawakiu nooran mataia ae rawawata ke n ongo aia kakauntaeka i bon imarenaia ngkana e buakaka au bwi. N raonaki ma au bwai n reirei ni katoa tai, N na bae ni karaoi ni mweengau n tain te wiikente bwa I aonga ni kateimatoa au bwi ae A.

E ngae ngke imwiin kakoroan nanon taian kouru ake I bairei, I namakinna bwa e mwaiti riki ae N na kakoroi bukiia inanon maiu. I kabin nanou, I ataia bwa ni koauana iai riki aika a na roko.

Te boong teuana I baireia bwa N nang bon kakae nako i bon irou ngkana arona bwa bon iai te Atua. Ngkana E maiu, I kan ataia bwa tera ae E tangiria mairou ke ngkana arona bwa te aro te bwai ae akea mananana ae riki man aia iango aomata. I aki maaku ni karekea teuana mai buakon kaeka aika uoua aikai. I tii tangira te koaua.

I nanon taai akaane, I a rang rena ma temanna raoraou man te tiim ni bwatiketibooro ae arana Taylor. Te ingaboong teuana I bubutia bwa e na nikirai n te reirei. E taku eng, ma I riai ni moantaai n uti teuana te aoa imwaain bwa N na kaea te tieminari ma ngaia. I kabwarabae ni kangai eng, n aki ataia bwa tera. I rang kukurei n te tieminari, e ngae n aron anne e raka riki are I namakinna nakon are I reiakinna.

N te tai ae waekoa imwiin anne, e bubutiai Taylor bwa N na nako n taromauri ma ngaia. N te moan I taku bwa e na taraa ni kabotu teutana te taromauri ao n aki bomaongina, ma n te kabane e a anaaki nanou n namakinan te rau n tain te taromauri.

Ma e ngae n anne, I teimatoa n aki kaumakaki bwa te namakin ae tamaroa anne iai rekerekena ma te Atua. N na kanga n ataia ae e aki roko mairou? N na kanga n ataia bwa I aki karekea te aekaki n namakin anne?

Imwiin kakauntaekau mai inanou, I a nako ni kawara tinan Taylor ni kakaea te kaeka. E tuangai bwa I kona ni karekei au kaeka man warekan booki aika tabu n tataroakin taian kaeka ake I uaiakin. I tataro n akea te kaeka ao n rootaki n te ongotaeka nakon kaetieti ma tuua ake I reiakin. I taonaki n te tabeaianga n angiin te tai. I kantaninga kamimiin ma kakawakin tein taraakin te Atua ke tabeua taai aika riki aika kamimii ni kakoaua bwa e boni koaua te Atua. N te aro ae iai aana, I tangira au koaua ae matoatoa n te tai ae waekoa. N ae boni koaua, ngkana I kabatia riki te tataro, e a korakora riki te ota ae I namakinna inanon maiu. Ngkana I kabatia riki irirakin tuua, I a kukurei riki. Ngkana I kabatia riki warekan booki aika tabu, I a karekei riki kaotioti. Teutana imwiin teutana, e a rikirake au koaua, n aron otin taai n te ingaboong.

I kabanea uoua te ririki ni bairea bwa N na bwabetitoaki n riki bwa kaain ana Ekaretia Iesu Kristo ibukiia aika Itiaki ni Boong aika Kaitira. E ngae ngke I maiukain taian kainibaire ma reirei mai imwaaina, I kona n taekinna ngkai bwa I a tia ni kunea te koaua ae akea tokia. E maiu te Atua. Iesu bon te Kristo, ara Tia Kamaiu ao ara Tia Kabooira. E a uki karawa. Ana burabeti te Atua e nakonako iaon te aba n te boong aei Ana Mwakuri ni Kamaiu Iesu Kristo e bon koaua. Te Atua e bon kabwarai raoi aia bure tan bure ake a rairinanoia. I bae n aki wanawana ke ni bwaintangiraaki n aroia tabeman aomata, ma rabakau are I karekea e bon kakawaki.