Beku n te Ekaretia
E Tau Ae I Karaoia?
E maeka te tia korokaraki i Utah, USA.
Te reirei ni buan te tiibu e buokai bwa n na kanga ni kakoroa nanon au mwakuri.
Kamatataan tamnei aika ikotaki iroun Mike Boyland/iStock/Thinkstock and Oleksiy Fedorov/Hemera/Thinkstock
N te ririki ae 23, I weteaki bwa te beretitenti n te Bootaki n Aine n ara uoote irouia ataein te reirei ake a tia n iein. I uringa bwa e ngae ngke i aki tau, I tangiria ni karaoa au kabanea n tamaroa. I ingainga ao n anaki nanou ni beku ma I raraoma n au konabwai n riki bwa te tia kairiiri ae tamaroa.
Imwiin tabeua te namwakaina n riki bwa te beretitenti n te Bootaki n Aine, I namakinna bwa I aki karaoa ae tau. I tangiria bwa n na kona n reitaki ma titita ao n ata kainnanoia n tatabemania, ma I namakinna bwa I aki kakoroa nanon aei.
I taetae ma au bitiobi ao ni kaota raraomau. I kabwarabwara bwa I aki kona ni buokiia aine aika I tangiria ni buokiia. I kabwarabwara bwa n na kanga n iangoia bwa n na karekeia niman ibukin katian te mwakuri nakon ae I tangiria. I kataia ni kamatata tabeaiangau n ae bebete ma te kangare ao n aki rangin ni iangoia, ma a waekoa n onrake matau ma rannimata ibukin aki kukureiu. E matangare au bitiobi ao e anga taeka n reirei aika moan te tamaroa ae I tuai mani karekei mai imwaina.
“Ko taneiai ma karakinan te tia kawakin tiibu are, ni buan ana tiibu temanna, e kitania ‘ake ruangaun ma ruaman’ ni ukoukoria?” e titiraki (taraa Ruka 15:4–7). I kaenga n atuu.
“E tara n ae bati te wanawana n te karaki ni kaikonaki anne,” e reitianako. “E ataia te tia kawakin tiibu bwa a na akea aia kanganga ake ruangauni ma ruaman ngkana e kitania ni kakaea temanna te tiibu are bua.”
Ngkanne au bitiobi e anga reirei aikai:
“Ko noria, iai aia kawai ake ruangauni ma ruaman n tararuaia bon irouia ngke ko nako. Ana kaungaia bon irouia ao ni buoka temanna ma temanna. E raoiroi riki ngkana ko kabanea am tai iaon temanna ae taraa ni bua. Nikiraia tiibu ana bon OK.”
I namakina te kakoaua ae matoatoa bwa te bwai ae a tia n tuangai e bon koaua ao I aki kainnanoia n raraomaeakiniia tiibu ni kabane n te tai ae ti teuana. Au kantaninga bwa n na kakaeia ake a bua ao ni kaoia n oki nakon te nanai. N te kawai anne, ana kantaninga te Tama are i Karawa e kona ni koro bukina, ao I kona n riki bwa te bwai ni mwakuri Inanon baina.
Man irakin ana reirei te bitiobi, Inamakina mwaitin riki atakina bwa n te anga ra ae tangirai te Uea bwa n na beku n Abanueana. I karekea naba koronbukina n tamnei ae kakorakoraai n au mwakuri ibukina bwa I mwakuri n te kawai ae a tia n tuangai te Tia Kamaiu. Rinanon mwakan te Tamnei ae Raoiroi, e a tia au bitiobi n anganai ana bwaintangira n atatai ao n niniwana.
I kakoaua bwa ngkana ti tataro ao n ukoukora te kairi mai ieta mairouia ara taan kairiiri n te nakoaniboonga, ana anganaki te kairi anne ni kaotia nakoira bwa ti na kanga ni kairiiri ni kawai aika raraoi.