Bwaukin ke Meron?

Tamnei

illustration of a pumpkin on a vine

Kamatata iroun Carolyn Vibbert

E rangin ni mimi tamau ni kunea bwa koraan te bwaukin ake e uniki n te ririki ae nako e iangoia bwa e na bwebwerake i nukan kunin te meron n te tiamwa aei. E rikirake te meron ni maiuraoi—ma te bwaukin naba. E nakoraoi, ni koauana, e iangoia tamau bwa e na kariaia baan te bwaukin bwa a na teimatoa n rikirake. Ngaia ae e ataia ae karaoia, te bwaukin e na totokoa rikiraken te meron.

Ngaia ae e karaoa ana rinerine. E kona n ae e na katikirakei bwaukin bwa aonga meron n reke aia tai n rikirake ni mwaiti ke ni kariaia baan te bwaukin n rikirake ao ni matakuakiniia n ibetutu irarikin baan te meron, ae a na taraa n ae e na kariki uaana man aroka aika uoua aikanne. Bwaukin ke Meron? Te rinerine bon imarenan iango aikana uoua aika raoiroi.

Ma taraan iango aikana uoua aikanne, e iangoia tamau ni katikirakei baan te bwaukin aika maiu raoi. Ti aki ae a rimwi ni bwebwerake, ma e iangoia bwa e tangirii riki meron aika baireaki nakon tangiran te bwaukin ae kakubwanako.

Te taneiai aei e kauringai n iangoi taekan rinerine aika ti karaoi, riki n ara reitaki ma tabeman. Tao ma ara utu, raoraora, ara tia kamwakuri, ke naake ti kareketangira mangaia ke ni mare mangaiia, ngkana te rinerine imarenan uoua bwaai aika tamaroa, kinakin te rinerine ae eti ke te kabanea n tamaroa n tabetai e kanganga, riki ngkana ti tangiria n totokoi karaoakin rinerine aika bure. Maakan karaoan rinerine aika bure n tabetai e kamwaukuira, ao te maaku anne e kona ni kawaeremweira man te waaki rake n te onimaki. Ma te koaua, n tabetai bon tiaki te rinerine ae bure. Anne bon ti te rinerine. N ana keiti tamau, e kabotoa ana iango iaon te bwai ae kakawaki riki. E aki tangiria n noora te bwaukin ni mate, ma e ataia e na nanokawaki n aia urubwai are a na karaoia rimwii nakon te meron.

N te maiu, tabeua rinerine aika ti kaitara ma ngaai aki rangin ni kakawaki, n aron, tera te amwarake ae n na riai ni kanna ibukin te moaningaboong? Tera karan te kunnikai ae I riai ni bwainna n te boong aei? Ngkana ti kaitara ma te rinerine imarenan uoua bwaai aika raoiroi, ti kona ni karaoia n aron are e karaoia tamau ao n titiraki, “Tera ae I taku bwa e kakawaki riki?” Ngkanne karaoa te babaire ao waakinna ma te onimaki, n onimakina te Uea bwa e na kaetiira ngkana ti kairua.

Ma tabeua rinerine a rangin ni kakawaki. E taku n te taina Beretitenti Thomas S. Monson: “Ti teimatoa ni kaitara ma iango. Ni karaoakiia ma te wanawana, e kainnanoaki te nano ae korakora—te nano ni kan taekina tiaki, te nano n taekina eng. Iango a bairea te tabo ae ti na nakio iai” (“The Three Rs of Choice,” Liahona, Nobembwa 2010, 68). Ngkana ti kaitara ma aeka n rinerine aikai, te tititraki ae tikiraoi riki e kangai, “Tera ae kakawaki riki iroun te Uea?” Ngkana ti ata te reke nakon te titiraki anne, te bwai ae ti riai ni karaoia bon kaboraoan kakawakina ma Ngaia ao ni mwakuria ni kaineti ma te rinerine anne. E na teimatoa n riki bwa te rinerine ae eti.