Reireiniia Kairake Bwa Ana Kanga ni Kairiiri n Ana Kawai te Uea
Iroun Carol F. McConkie
Te Moan ni Kauntira n aia Beretitentii ni Kabuta Ataeinaine
Ara roronrikirake tiaki tii taan kairiiri n taai aika a roko. Bon taan kairiiri n te boong aei. Ti kiona ni buokiia n aron te Tia Kamaiu.
Nakoia kaaro ao taan kairiia kairake, Unimwaane David A. Bednar man te Kooram n Abotoro n te Tengaun ma Uoman e taetae iaon te bwai ae teimatoa ae ti kona ni kunea: “Kaoia aomata aika kairake bwa a na karaoia. Ko riai ni mena ikekei, ma kariaia kairake bwa a na kairiiri. Ko riai n anga kaetieti n aki iangoa te tararua.”1
A kona kaaro ao taan kairiiri ni buokia ataeinimwaane ao ataeinaine n reiakinii tuua aika e na katauraoia ni kairiiri n te raoiroi ao ni katea abanuean te Atua iaon te aba.
Ngke e a koro 14 au ririki, I kaitibo ma tabeman ataeinaine aika rangin n tamaroa aron aia kairiiri. N te tai anne, a mwaing au utu rinanon te United States ao n riki bwa kain te aro n te uoote ae boou. I aki uringnga bwa antai kain te beretitentii n te kiraati ae te Mwaia Maite, ma I uringnga raoi bwa ataeinaine a rangin n akoi nakoiu. A kariaia te ataeinaine ae mamaku man kaairariki ae boou kanga ai aron te rao ae a tia ni bua n te tai ae a maan ao n anganai te namakin ni butimaeaki raoi. N roko mai Delaware, ike ti ngai te ataeinaine ae te Moomon n au reirei ibukiia ataei ae aia ririki 12 nakon 14 ao ti ngaia ataeinainen te Moomon ae I ataia ae maeka teuana te aoa te buti n te kaa man mweengau, I iango, “Aio ae kanga ti tebo ma karawa!”
Ibukin te moantai inanon maiu, iai raoraou aika a maiuakin kainibaire inanon Ibukin Kakorakorakiia Kairake, e kaoai bwa n na irii waaki ni kakukurei, ao n tibwauai aia koaua n te euangkerio ma ngai. Aia katooto n te tangira n-akoi e rangin ni mwaiti ni kaniau riki nakon Ana Ekaretia Iesu Kristo ibukiia Aika Itiaki ni Boong Aika Kaitira n te tai anne nakon taetae tabeua ke reirei ake a tia ni karaoaki. N aia tangira ao te ota kanga Ootan Kristo, ngaia bon rongorongon ana euangkerio Kristo, ao ngaia aika a na kawakinai ao ni kairai nakon Ana nanai.
Tera ae a karaoia raoraou aika boou bwa taan kairiiri aika tamaroa?
Te kairake ni mitinare e kabwarabwara te kairiiri n ae rangin ni bebete. E taku: “Ti riai ni mena n te tabo ae eti n te tai ae eti ni karaoa nanon te Uea ao ni buoka te aomata ae rangin ni kainnanoa ara ibuobuoki. Anne are e karikiira bwa taan kairiiri.”2 Ibukina bwa antai ngaia ao Ootan Kristo are e ota inanoia, ataeinimwaane ao ataeinaine aika onimaki ni kabuta te Ekaretia aei iai aia konabwai ni kairiiri n ana kawai te Tia Kamaiu ao ni “buokiia aomata tabeman bwa a na riki bwa taan iriiria ni koaua … Iesu Kristo.”3
N tabera ae taan kairiiri ti kairiiri, tararua, ao ni boutokaia ara ataeinimwaane ao ataeinaine. Ma bon beretitentii n te kiraati ao te kooram aika a mwiokoaki ibukin kairan ao kaetan te mwakuri n aia kiraati ao kooram, n raonaki ma rinean reirei n te Taabati ao ni bairei waaki ni kakukurei inanon boongin te wiiki. Taan kairiiri n te kiraati ao n te kooram a weteaki ao ni katabuaki iaan aia kaetieti naake iai irouia kiingin te nakoaniboonga; bwa aonga ni karekea te kariaiakaki ni kairiiri ao ni kakorakoraia kairake ake tabeman. A ira ana katooto te Tia Kamaiu ao n reirei ni beku n aron are ngke E beku ao ni kabwarabwara n aron ae E karaoia.
Taai Ibukiia Taan Kairiiri irouia Kairake
Te kairiiri e moanaki man te mweenga. “Karaoan tabera ibukin te Atua n aroia kaaro ao taan kairiiri e moanaki man te kairiiri n te katooto—reitinako n maiuakin reirein te euangkerio n te mweenga ma te teimatoa ao te wanawana,” e reirei Unimwaane Robert D. Hales man te Kooram n Abotoro ake Tengaun ma Uoman. “Aio e tangira te mwakuri korakora ao kamatoan te kantaninga ni katoaboong.”4 Kaaro a reirei taekan ana reirei Kristo. A buokiia kairake ni katei ao ni kakoroi nanon aia kouru. Rikirakem I bon Iroum ao te Beku ibukin te Atua e buokiia kairake ni kakorakorai aia koaua iroun Iesu Kristo, n tauraoi ni karaoi ao ni kaawakin berita aika tabu, ao ni kakoroi nanon tabeia mai ieta ao tabeia n te utu, te mweenga, ao te Ekaretia.
N te taromauri, taan kairiiri n te Nakoaniboonga ae te Aaron ao te Bootaki n Aine a kona ni buokiia kairake ni mwakuri inanon kooram ao beretitentii n taian kiraati n atai tabeia aika tabu ao ni karikirakea nakoaia n tabeakini ao ni kakorakorai kooram ake tabeua ao kaain te kiraati.
Ngkai taan kairiiri aika ikawai, ti katauraoia kairake ni kairi bootaki n te kooram ao n te kiraati. Ti kaitibo ma roronrikirake inanon bowii ni beretitentii ngke a kakaai kawai n tabeakiniia naake a kekeiaki, ni karin araia ni kabane kairake n taian reirei n te Taabati ao ni bairei waaki ni kakukurei, mwakuri n ibuobuoki, kaembwa, ao aia mwaungatabu kairake.
Ti kaungaia beretitentii n te roronrikirake ni buokia kaain te kooram ao kaain te kiraati bwa a na iri iteran nako ni kabane te mwakuri ni kamaiu, n ikotaki ma aia mwakuri ni mitinare membwa, tauakiia aika tibwa rairaki, kawarakia kain te aro aika aki kakaonimaki, mwakurin te tembora ao rongorongon te utu, ao reiakinan te euangkerio.5 Beretitentii n te roronrikirake a buokia ataeinimwaane ao ataeinaine ni kabane n reiakina te kimwareirei ao te kakabwaia n te beku n aran te Tia Kamaiu ao ni kamwarakeia Ana tiibu.
Ana mwakuri te tia Kairiiri tiaki ibukin ara konabwai ni karaoi beeba n reirei aika eti raoi ke n tibwatibwai beeba n reirei aika a tia ni kanoaki. Ana mwakuri te tia kairiiri bwa e na buokia ataeinimwaane ao ataeinaine n reiakina ao ni karaoi reirei aika a na buokiia ni kairiiri n ana kawai te Tia Kamaiu. Aikai bon reirei ake aua.6
Katauraoi n te Maiu n Tamnei
E buokia kairake n ataa mwakan aia katauraoi n te maiu n tamnei. Reireiniia ni kamwakura te onimaki ni berita ake a karaoi n te otenanti n te toa. Nanoia ni katoka iaoia aran Kristo, n Uringa, ao ni kaawakin Ana tua e katauia ni karekea ana iraorao te Tamnei ae Raoiroi n taainako. Tiaki ti ngaia n aia mwakuri n ibuobuoki ngkana a kona ni karekea, kinaa, ao ni karaoia nakon ana wirikiriki te Tamnei Ae Raoiroi.
A katauraoi n te maiu n tamnei man ukoukoran te kairi n te tataro ae raoiroi ao ni ukoukori booki aika tabu ibukin kaekaaia. A kekeiaki ni kaawakin tuua bwa e aonga te Tamnei ae Raoiroi n taetae nakoia mai inanoia ao aia iango bwa a na namakina ao n ataia bwa antai ae kainnanoa aia ibuobuoki ao tera ae a kona ni karaoia. A namakina ana tangira Kristo ae itiaki ibukiia kaain te kiraati n tatabemaniia ke te kooram.
Te katauraoi n te maiu n tamnei e anganiia kairake te aki nanokokoraki bwa ngaiia bon ana itabon te Uea ao a mena n Ana mwakuri (taraa D&C 64:29).
Tibwatibwa inanon Kauntira
Reireiniia kairake babaire aika kakawaki ao mwakan te kauntira ngkai a ira te kawai n reirei mai ieta ike e tautaekanaki iai ana Ekaretia te Uea ao ni kakabwaiakaki iai n tatabemaniia nako ao utu.7 Ana komete te bitiobiriki irouia kairake ao te kooram ao bootakin aia beretitentii kiraati boni kauntira ike a reiakina iai tabeia kairake ao ni karekei tabeia ni buokia tabeman.
Membwa n taian kauntira:
-
A katiteuanaki ma ao n ira aia kaetieti taan kairiiri n te nakoaniboonga, aika iai irouia kingin te nakoaniboonga.
-
Tibwauai aia kantaninga ao aia namakin n tamnein te raoiroi, mimitong, onimaki, tamaroa, taotaonakinnano, te ibuobuoki, ao te akoi n tari.
-
Mwakuri n ikotaki, n aron ae kairaki iroun te Tamnei ae Raoiroi, ni babairea te bwai ae a riai ni karaoia ni buokiia ake a kainnano.
Mwakuri n Ibuobuoki nakoia Tabeman
Kairake a kairiiri n ana kawai te Tia Kamaiu ngkana a ibuobuoki ma te tangira ao te akoi. E reirei Iotebwa Timiti: “Akea te bwai ae e a tia ni baireaki ni kairiia aomata ni kitana te bure nakon are a kairaki n tauaki baiia, ao ntabeakin kainnanoia. Ngkana te aomata e kaota tao te akoi nakoiu, O tera te mwaaka are e tia n roko n au iango.”8
E reirei te Tia Kamaiu kakawakin ao kakawakia aomata ni kabane ae korakora (taraa D&C 18:10–15). Buokia ara kairake n ataa te koaua ae kakimwareirei ae e anga Maiuna Iesu Kristo ao ni kauka te kawai ae a na kona iai ni kabane n nako Ina. Ni kaotan te kakaitau ibukin te bwai ae E a tia ni karaoia, ana toro ni koaua te Uea a kawaria ao ni buokia n te tangira ae korakora nakoia ataeinimwaane ao ataeinaine n tatabemaniia nako, ibukina bwa e anga nanona te Tia Kamaiu ni bwaai ni kabane.
Reirei Ana Euangkerio Iesu Kristo
Buokia ataeinimwaane ao ataeinaine ni kinai taai n anga reirei taekan te euangkerio ao n ataia bwa te kabanea ni kakawaki n te reirei bon aia katooto. Ngkana a maiu kairake ni kaineti ma aia taeka burabeti ao ni kawakin aia kainibaire n te Ibukin Kakorakorakiia Kairake, a kairiiri n ana kawai te Tia Kamaiu. Rinanon koauan aia taeka ao aia mwakuri, a kaota te bwai ae nanonaki n riki bwa ana reirei ni koaua Iesu Kristo. A tei bwa Ana taan kakoaua n akea te baka n raoiroi. Ngkanne, ngkana a kaota aia koaua, buokiia n te anga reirei n te Taabati, ke n tibwauai koauan te euangkerio ma raoraoia, a na kaonaki ma te Tamnei ao aia taeka a na iai mwaakaia ni kona n rairiia.
Kairiiri n ana Kawai te Tia Kamaiu
Te kairiiri n ana kawai te Tia Kamaiu bon te tai ae tabu are a na kainnanoia kairake bwa a na anga aia kabanea n tamaroa ngkana a mwakuri ibukin te Uea n te mweenga, ao inanon kaawa. Ataeinimwaane ao ataeinaine ake a kairiiri n ana kawai te Tia Kamaiu a riki bwa rongorongon ana euangkerio Kristo, kaekaan ana tataro temanna, anera ake a ibuobuoki nakoia naake a kainnano, ao ootan Kristo nakon te aonaaba.