Usa ka Tinuod nga Perlas

Imahe

a true pearl

Si Jetta Pearl Stewart mikuha sa iyang bonnet ug milingkod sa may balkon tupad sa iyang Papa. “Unsa ang perlas?” nangutana siya sa iyang Papa.

Ang otso anyos nga si Jetta nasayud kon unsa ang perlas, apan ganahan siyang makabati sa tubag sa iyang Papa. Sama sa kanunay, ang iyang Papa mipasabut sa unsang paagi ang perlas motubo gikan sa kinhason, sa usa ka ang-ang ngadto sa laing ang-ang, hangtud nga kini mahimong usa ka masanag, masidlak nga mutya.

“Ang mga perlas mosidlak sama nimo, akong gamayng Jetta Pearl,” miingon ang iyang Papa, nga nagpahiyom. Mibawos sa pagpahiyom si Jetta. Ganahan siya sa iyang pagkaperlas sa iyang Papa.

Sa pagpanihapon nianang gabhiona, si Jetta giingnan sa iyang Papa nga may importante siyang pangutana alang niya.

“Sukad sa gamay ka pa, duna kay espesyal nga pamaagi sa musika,” si Papa miingon. “Gusto ka bang magkat-on og piano?”

Nanagko ang mga mata ni Jetta. “Ah, oo!”

“Nagpasabut kini nga mobiyahe ka og layo ug mopuyo uban sa imong teacher sulod sa mubong panahon,” si Mama miingon. “Walay usa dinhi sa Milburn ang makatudlo nimo.”

Milubad ang pahiyom ni Jetta. Wala pa siya sukad malayo sa iyang pamilya og kapin sa usa ka adlaw. Ug ang pag-adto sa layo …

“Apan importante nga kita makapalambo sa atong mga talento, bisan kon kini lisud,” miingon si Papa.

Si mama miuyon. “Kinahanglan nga maningkamot ka,” miingon siya.

Si Jetta ganahan og musika. Ug gusto siyang motukar kanunay sa piano. Sa hinay-hinay, ang pahiyom mihulma sa iyang nawong. “Kinahanglan kong makatukar og piano!”

Apan sa pagka sunod buntag, dihang nagtan-aw si Jetta sa iyang Papa nga nag-andam sa kabayo para itaod sa karwahe, wala na siya mibati og kahinam. Karon nahadlok gayud siya. Wala siya magtuo nga mobiya diay dayon siya.

Si Jetta hinay-hinayng mikat-kat sa karwahe tupad sa iyang Papa.

“Andam na ba ka, Jetta Pearl?” miingon si Papa.

Wala pa niya batia nga andam, apan miyango si Jetta. Ang karwahe miabante na.

Pagkataud-taud, si Papa mipasiplat ngadto niya. “Nahibalo ka ba unsa ka mapasigarbuhon ang imong mama ug ako diha nimo?”

Si Jetta miyango. “Apan unsaon na lang kaha kon nagkinahanglan mo sa akong tabang didto sa balay?”

Mipahiyom si Papa. “Siguradong mingawon mi nimo, apan mao ra ni paagi nga makatabang mi nimo. Makaserbisyo ka sa Langitnong Amahan pinaagi sa pagpalambo sa gasa nga Iyang gihatag nimo.”

Wala pa si Jetta makahunahuna og ingon niana. Ang iyang talento sa musika gasa ba gyud gikan sa Langitnong Amahan?

Ang iyang Papa mipadayon. “Magkinahanglan kini og panahon, apan sa ngadto-ngadto mas momaayo ra ka nga motukar og piano. Ug dayon makahimo ka sa pagserbisyo og daghang mga tawo.”

Gibati ni Jetta nga ang iyang kahadlok nagsugod sa pagkawala. Moadto siya aron makakat-on sa pag-piano ug makaserbisyo sa Langitnong Amahan. Tingali makahadlok kini, apan nasayud siya nga Siya motabang niya.

Mikidhat si Papa. “Sa hinay-hinay, ang akong Perlas magkaanam og kasanag ug kasidlak.”

Sama sa giingon ni Papa, sa hinay-hinay si Jetta nakakat-on sa pagtukar og piano. Gani nakakat-on siya kon unsaon sa pagtukar sa organ.

Human sa pipila ka bulan, si Jetta miuli na. Nianang pagka-Dominggo siya ang nahimong pinakaunang organist sa Milburn! Nagbutok-butok ang iyang dughan dihang milingkod siya sa dako kaayong organ nga gipaningkamutan nga mapalit sa komunidad para iyang matukar. Nindot kaayo ang organ nga si Jetta sa kakulba ingon og nahadlok nga mohikap niini. Kinahanglan siyang molingkod sa gipatong nga libro aron makaabut siya sa mga key.

Miginhawa siya og lawom ug nagsugod sa pagtukar. Ang mga nota nanuotsuot sa tibuok kwarto, makatagbaw ug matahum.

Si Jeta misuway sa paglingi sa kongregasyon. Ang mga tawo nagpahiyum samtang nanganta. Si Jetta mipahiyom usab. Ang iyang pagtukar layo pa sa pagkaperpekto, apan gigamit niya ang iyang talento sa pagserbisyo.

Nahinumduman niya ang mga pulong sa iyang Papa: “Ang mga perlas mosanag sama nimo, Jetta Pearl.”

Sa hinay-hinay, sa anam-anam, ang Langitnong Amahan mihimo kaniya ngadto sa usa ka tinuod nga perlas.