Ang Gubat Nakahatag Nako og Kalinaw
Robert Swenson, Alabama, USA
Mga paghulagway pinaagi ni Allen Garns
Lima ka adlaw human sa akong paggradwar sa high school, nagpalista ko sa militar. Sa wala pa ko mobiya para sa Vietnam, may tin-aw ko nga impresyon nga ang akong pagpalista maoy sinugdanan sa usa ka espirituhanong panaw.
Duha ka oras sa akong pag-abut sa bag-o nakong unit, ang mga rocket sa kaaway mibuto didto sa kampo. Usa ka pag-ataki gamit ang mortar misunod nianang gabhiona. Kining tanan ingon og kulbahinam hangtud sa ikaduhang semana, dihang ubay-ubay sa mga sundalo ang nangamatay. Seryuso, nagsugod ko sa pagpamalandong sa kahulugan sa kinabuhi.
Sa wala madugay nakahimamat ko og helicopter crew chief nga ginganlan og Graig Stephens. Usa ka adlaw miabut ang paghisgot bahin sa relihiyon. Giingnan ko niya nga miyembro siya sa Simbahan ni Jesukristo sa mga Santos sa Ulahing mga Adlaw ug nangutana kon gusto ba kong masayud pa og dugang. Bisan tuod og ang akong mga ginikanan dili mga miyembro sa Simbahan, gitudloan ko nila og pagtuo ni Jesukristo.
Nianang gabhiona sa walay sulod nga bunker, gibasahan ko ni Graig sa una nga diskusyon. Unsay diha sa akong hunahuna dili kabahin sa katarungan sa mga gihisgutan o kon giunsa niya kini sa pagpresentar apan hinoon sa sinseridad ug kamapaubsanon niining batan-ong sundalo.
Sa misunod nga pipila ka adlaw, gitudloan ko ni Graig sa ubang mga diskusyon. Human sa matag diskusyon mangluhod mi sa pag-ampo. Kanunay ko niyang hangyoon sa pag-ampo, apan ingon og dili kaayo ko makahimo. Nahinumdom ko nga nasagmuyo sa pipila ka mga baruganan sa doktrina ug nakahukom nga dili na ko maminaw pa bahin sa Simbahan. Si Graig sa pagkasunod adlaw migahin sa pagpangita og tawo nga makatubag sa akong mga pangutana.
Pagkakilum-kilum na nagdala siya og usa ka piloto sa helicopter—usa ka returned missionary—gikan sa laing grupo sa pakigkita kanako. Kini nga brother mitubag sa akong mga pangutana ug mipamatuod nga siya nasayud nga ang Simbahan tinuod. Dayon giingnan ko niya nga andam na kong bunyagan kay sa uban nga sukad iyang nakita. Dili ko makalitok og pulong. Sa dihang nahuman siya sa pagsulti, naghunahuna ko, “Ikaw nasayud, nga siya husto.”
Sa wala madugay, samtang naglingkod ko sa bunker nga nagbasa sa Basahon ni Mormon, mihukom ko nga buhaton ang gisugo sa kasulatan ug mangutana sa Dios kon ang Basahon ni Mormon tinuod (tan-awa sa Moroni 10:4–5). Miduko ko, mihimo sa akong paghangyo ngadto sa Ginoo. Wala madugay sa akong pagbuhat niini akong gibati ang dili ikalimud nga mainitong pagbati ug kalinaw nga sukad wala pa nako masinati. Nasayud ko nga ang Dios mitubag sa akong pag-ampo. Nasayud ko nga ang Basahon ni Mormon tinuod. Sa pagkasayud nga ang Basahon ni Mormon tinuod, nasayud ko nga si Joseph Smith usa ka propeta. Wala madugay human niana, nabunyagan ko didto sa Gulf of Tonkin.
Sa akong paghaw-as gikan sa tubig sa pagbunyag, akong gibati ang hingpit nga pagkalimpyo. Dili gayud ingon katam-is ang kinabuhi kaniadto. Mikabat og liboan ka milya ang pagbiyahe ngadto sa panggubatan, apan sa katapusan akong nakaplagan ang kalinaw nga gipangita sa akong kalag.