Akong Gibati nga …

Si Kristo mibati sa tanang kasubo nga kinahanglan nakong masinati, aron Siya makahupay kanako.

Doktrina ug mga Pakigsaad 121:1–9: Samtang didto sa Liberty Jail, gibati ni Jospeh Smith ang pagpakawala sa paglaum tungod kay ang mga miyembro sa Simbahan nag-antus, ug mao usab siya. Siya nag-ampo ug nakadawat og kasiguroan. Ang Dios magauban kanako kon ako moduol ngadto Kaniya alang sa kahupayan.

Si Jesukristo mibuntog sa tanang butang, mao nga wala akoy angay nga kahadlokan.

Marcos 4:36–41: Ang mga disipulo nangahadlok sa dihang anaa sila sa dagat ug naabtan og dako nga unos. Gipahunong ni Kristo ang unos uban sa sugo nga “Hilum! Hunong!” Kon ako mahadlok, motawag ako sa Ginoo, ug Siya motabang kanako nga makalma.

Ang Ginoo nasayud kon unsaon sa pagsulbad sa kada problema nga akong atubangon, mao nga ako makasalig sa Iyang Pag-ula.

Joseph Smith—Kasaysayan 1:5–20: Naglibog si Joseph Smith kon unsa nga simbahan ang iyang apilan. Siya nangutana sa Dios ug nakadawat og tubag, nga miresulta sa Pagpahiuli sa Simbahan sa Ginoo. Kon mobati ko og kalibog, mag-ampo ko ngadto sa Dios, ug Siya motubag kanako.

Ang Manluluwas mikuha sa akong mga sala diha sa iyang Kaugalingon aron ako mapasaylo ug makalingkawas gikan sa kasubo ug kahasol sa konsensya.

Alma 36:16–21: Si Alma nga Batan-on nakahimo og seryoso nga mga sala, apan siya nahimo gihapon nga mapasaylo ug ang iyang palas-anon sa kahasol sa konsensya gikuha. Pinaagi sa paghinulsol, ako makabaton sa kalinaw nga gihulagway ni Alma.

Makabuntog ko sa kawalay kadasig kon magtinguha ako sa pagsabut sa Pag-ula ni Kristo ug sa paggamit sa Iyang gahum.

Alma 26:27: Si Ammon nagpahinumdom sa iyang mga kaigsoonan nga sa dihang sila nawad-an sa kadasig, ang Ginoo mihupay kanila ug misaad nga hatagan sila og kalampusan. Ang Dios naghimo niana nga saad ngari kanako kon ako mobalik ngadto Kaniya.

Pinaagi sa Pag-ula ni Jesukristo, makadawat ako og hugot nga pagtuo ug kalig-on sa paglahutay sa tanan nga mga butang.

Mosiah 24:13–15: Ang mga tawo ni Alma mga ulipon ngadto sa usa ka dautan nga tinugyanan sa buhat. Sila nag-ampo ug nakadawat og kalig-on sa pag-agwanta sa ilang mga palas-anon. Kon mabug-atan ko, ang Dios molig-on usab kanako.

Ako makakaplag og mga tubag sa akong mga pangutana diha sa ebanghelyo ug mosalig sa Manluluwas sa pagtabang kanako sa pagbuntog sa bisan unsang pagduha-duha.

Santiago 1:5–6: Si Santiago nag-awhag kanako sa pagpangutana sa Dios kon wala ko kasabut, apan siya naghatag sa pahimangno sa pagpangutana nga may hugot nga pagtuo. Siya nakasabut nga ang pagpangutana mopadulong ngadto sa usa ka tinguha nga mosabut, samtang ang pagduha-duha mopadulong ngadto sa pagkawalay pagtuo.

Ang grasya ni Kristo makahatag kanako og pailub sa pagbuntog sa kasagmuyo sa akong kaugalingon ug sa uban.

2 Nephi 4:16–35: Bisan si Nephi, nga matinud-anon na gani kaayo, nasagmuyo sa iyang kaugalingon. Kon magtinguha ko sa pagbuntog sa akong mga kahuyang, mokompleto og buluhaton, o mobatok sa mga tintasyon, ako makakaplag og kahupayan sa pagkasayud nga ang Dios motabang kanako ug mohatag og kalinaw.

Si Kristo nag-antus alang kanako tungod kay Siya nahigugma kanako ug nasayud sa akong tumang kabililhon.

Lucas 15:3–7: Ang sambingay sa nawala nga karnero nagpakita nga ang Maayong Magbalantay sa Karnero, si Jesukristo, mobuhat sa tanan aron makuha og balik ang nawala nga karnero. Dako kaayo ko og bili ngadto sa Langitnong Amahan ug ni Jesukristo nga Sila mihatag og paagi sa pagbalik ngadto Kanila ug mahimong sama Kanila.

Ang Ginoo nasayud unsaon sa pagtabang kanako ug tungod Kaniya ako sa umaabut mamaayo gikan sa tanan nakong mga sakit.

Lucas 8:43–48: Samtang dinhi sa yuta, si Kristo miayo sa daghang mga tawo. Ako mamaayo usab. Kana nga pagkaayo mahimong dili moabut diha-diha dayon o niini nga kinabuhi, apan Siya mohupay kanako (usa ka matang sa pag-ayo) ug hingpit nga moayo kanako sa Pagkabanhaw.

Tungod kay si Kristo nag-antus sa Pag-ula alang kanako, ako dili kinahanglan nga molahutay sa bisan unsang pagsulay nga mag-inusara.

Job 1:21–22: Si Job nag-antus sa makalilisang nga mga butang, lakip ang kamatayon sa iyang mga anak. Siya nakalahutay pinaagi sa pagsalig sa Ginoo. Kon ako moduol sa Ginoo pinaagi sa pagkaila Kaniya, akong makita nga ako wala gayud mag-inusara tungod kay Siya uban kanako.

Ang kalooy ug grasya ni Kristo mohatag kanako og kalig-on sa pagbuntog sa mga hagit bisan kon mobati ko og kahuyang.

Alma 2:27–31: Sa dihang ang mga Nephite nakig-away, sila mitawag sa Ginoo ug Siya milig-on kanila. Samtang ako nag-atubang sa tanang matang sa espiritwal ug emosyonal nga mga pag-ataki, ako mahimong mobati og kahuyang, apan ang Ginoo molig-on kanako.

Bisan unsa nga sakit nga akong gibati mamaayo pinaagi sa Pag-ula ni Kristo, ug ang Iyang gugma modasig kanako sa pagpasaylo sa uban.

1 Nephi 7:6–21: Si Laman ug Lemuel migapos ni Nephi ug mihulga nga biyaan siya sa kamingawan. Si Nephi nag-ampo ug, uban sa tabang sa Ginoo, nakalingkawas ug mipasaylo sa iyang mga igsoon. Ako usab mahimo nga mag-ampo, mobati og kalinaw, ug makakaplag og kalig-on aron sa pagpasaylo.