Usa ka Buok nga Kendi
Ang tagsulat nagpuyo sa Utah, USA.
Sayon ra ang pagpakigbahin sa kendi, apan unsa man kasayon ang pakigbahin sa ebanghelyo?
“Gusto Ko Karon nga Mamisyonaryo” (Songbook sa mga Bata, 90).
“Gusto kag kendi?” Mitunol si José og usa ka buok nga brown nga kendi ngadto sa iyang higala nga si Pedro sa ilang pagpamauli gikan sa eskwelahan samtang nanakay sila sa city bus.
“Sige,” matud ni Pedro. Mikuha siya sa kendi ug gibutang sa iyang ba-ba.
Si José mipili sa yellow nga kendi gikan sa gamay nga bulsita. Ang mga batang lalaki naghilom ra samtang nagdagan ang bus. Dako ang ilang siyudad sa Argentina. Layo ang ilang byahe sa bus kada adlaw paingon sa eskwelahan. Ang mama ni José kanunay naghatag kaniya og kwarta aron ipalit og usa ka gamay nga putos nga candy aron naay kalingawan palabay sa oras.
“Gusto pa ka?” Si José mitunol og usa ka kumkom nga brown nga kendi.
“Oy, salamat!” Matud ni Pedro. “Nganong dili man ka ganahan ani?” Lami man gyud ni.”
Si José mihunong sa makadiyot naghunahuna ug nagpanilap sa iyang mga ngabil. “Mura man gud og kape ang lami ani.”
“Ngano man dili ka ba ganahan sa lami nga kape? Lami kaayo ni.”
“Kuan man gud, usa ko ka Mormon, ug dili mi moinom og kape, mao nga murag wala sad ko maanad sa lami.”
Si Pedro daw naglibog. “Unsa nang Mormon? Ug nganong dili ka moinom og kape?”
“Ang Mormon usa ka tawo nga miyembro sa Ang Simbahan ni Jesukristo sa mga Santos sa Ulahing mga Adlaw. Kami nagtuo nga ang Dios gusto nga atong ampingan ang atong mga lawas, mao nga dili mi moinom og kape, tsa, o alkohol. Ug dili mi manigarilyo.”
“Apan kendi ra man ni,” matud ni Pedro. “Dili gyud tinuod nga kape.”
“Kahibalo ko,” matud ni José. “Apan dili gihapon ko gustong mokaon niini.”
Mitando si Pedro. “Kon mao, ambi nang tanan nga brown. Unsa pa may gitudlo sa Simbahan diha ninyo?”
“Matag Dominggo moadto mi sa simbahan ug magkat-on mahitungod ni Jesus ug sa Langitnong Amahan. Magkat-on usab mi og daghang makalingaw nga mga kanta. Sa tinuoray, ang tanang mga bata manganta ug moistorya diha sa among mga miting sa Simbahan karong Dominggo. Pwede ba ka nga mananghid sa imong mama nga mokuyog nako sa simbahan? Mahimo usab nimong maila-ila ang mga misyonaryo.”
“OK,” matud ni Pedro. “Aduna ba usab silay mga kendi nga kape nga gusto nilang ilabay?”
Si José mikatawa. “Wala, apan sila adunay mas maayong butang nga ipakigbahin!”